Read Tzotzil 2 Crónicas 34 Bible Online

2 Crónicas 34 - Tzotzil bible

2 Crónicas 34

¹Yich'oj vaxaquib (8) jabil c'alal och ta ajvalilal ti Josiase, ti buluchib xcha'vinic (31) jabil ech' ta ajvalilale.

²Lec laj yil ta sba ta sat Dios ti c'u s'elan laj spase. Ja' jech laj spas jech c'u cha'al laj spas David ti smolmuc'tote, ti j'ech'el mu'yuc laj sq'uej sba mi jutebuque.

³Ti ta xvaxaquibal (8) jabil yochel ta yabtel ti Josiase, ti uni jch'iel querem to ta j'ech'ele, lic xa ono'ox sa'ilan talel Dios yu'un David ti smolmuc'tot ta vo'nee. Ta xlajchebal (12) jabil yochel ta yabtele, lic ta stenel loq'uel ti c'opojebaletique, sloc'obbail ti Aserae, ti loc'tabil diosetique, xchi'uc ti c'usitic va'ajtic loc'obbail ti unijesbil ta taq'uin ti oy ta jteclum Judae, xchi'uc ti oy ta Jerusalene.

⁴Ta sba ta sat stuc laj yich' lilinel loq'uel ti ep ta tos altaretic yu'unic ti ep ta tos sloc'obbail ti Baale. Laj yal mantal xtoc ti yich'uc lilinel ti altaretic yu'un chic'obil pom ti chotol ta sbae. Laj yal mantal xtoc ti yich'uc lilinel sloc'obbailtac ti Aserae, ti loc'tabil diosetique, xchi'uc ti c'usitic va'ajtic meltsanbil ta unijesbil taq'uine, ti laj xch'uch'ulta ta j'ech'ele. Ta jech yepal un, bat scunan ta taniel ta sba smuquinaltac ti buch'utic laj yac'beic to ox ti milbil matanaletique.

⁵Ma'uc no'ox taje, laj xchic'be sbaquiltac ti paleetic ta sba ti altaretic yu'unique, ti c'ot ta pasel yu'un laj smes laj stus ti Judae, xchi'uc ti Jerusalene.

⁶Jech laj spas xtoc ta jteclumetic yu'un ti Manasese, ti Efraine, ti Simeone, ti c'ot c'alal to ta steclumal ti Neftalie, xchi'uc ta yamaq'uil scotol ti jujun tsoblebal yu'un ti jteclumetique.

⁷Laj slilin loq'uel yaltartac sloc'obbail ti Aserae, xchi'uc yaltar ti loc'tabil diosetique, ti stuc xch'uch'ulil laj scomese. Laj slilin scotol ti altaretic sventa chic'ob pom c'u yepal oy ta yosilal ti Israele. Ts'acal to un, sut ech'el ta Jerusalén.

⁸Ta xvaxaclajunebal (18) jabil yochel ta ajvalilal une, ti c'alal laj xch'aybe sc'oplal loc'obbailetic x'ayan ta jteclume, xchi'uc ta ch'ulnae, laj stac batel ti Safán xnich'on ti Azalías, ti Amasías alcalte yu'un ti jteclume, xchi'uc ti yajts'ibajom Joa sbie, xnich'on ti Joacaze, yo' jech ta sbainic ta xcha'meltsanbel xch'ulna ti Ajvalil Dios yu'une.

⁹Va'i un, bat sc'oponic ti banquilal pale Hilciase. C'ot yac'beic yich' ti taq'uin ti ac'bil ta sventa xch'ulna Dios ti stsobojic ti jchabiej ti'na levitaetic ti laj staic ta steclumal ti Manasese, xchi'uc ta steclumal ti Efraine, xchi'uc ta stojol c'u to yepal comemic ta Israele, jech c'u cha'al yac'ojic ta sjunul steclumal ti Judae, ta steclumal ti Benjamine, xchi'uc ta stojol ti jnaclejetic ti oy ta Jerusalene.

¹⁰Ta jech yepal un, bat yac'beic ti buch'u sbainojic ta sq'uelel abtel yu'un xch'ulna ti Diose, yo' jech ti stuquique ta stojic ti j'abteletic ta smeltsanel ch'ulna ti bu soquemique.

¹¹Ti taq'uine, laj yac'beic ti jch'ul-te'etique, ti buch'utic sbainojic ta yaq'uel iluc ti abtele, yo' jech ta smanic ti anbil tone, xchi'uc ti te'etic ta xtun sventa stemal sjole, ti muc' ta ts'am-te'etic ta xtun ta sventa smeltsanel naetic ti laj soquesic comel ti ajvaliletic yu'un Judae.

¹²Ti viniquetic taje, loq'uem ayanem ta yutsil yo'ntonic ti ta xtunic ta abtele. Ti cajal yabtel yich'ojic ti c'otem ta jpas-mantaletic yu'unique, xi s'elan ti ja' chanvo' levitaetique: ti Jahat xchi'uc ti Abdiase, snitilultac ti Merarie, xchi'uc ti Zacarías xchi'uc ti Mesulame, snitilultac ti Coate.

¹³Oy yan levitaetic xtoc sbainojic ta sq'uelel ti j'icats-nometique, xchi'uc laj yalic scotol ti c'usitic abtelal sc'an pasele. Scotol ti levitaetique, oy lec ta xchiquinic c'u s'elan ta tijel ti ep ta tos vobetique. Oy jlom ochemic ta jts'ibajom, ti ta sts'ibaic ti c'usi ta xc'ot ta pasele, xchi'uc ti ochemic ta jchabiej-ti'naetique.

¹⁴C'alal ta sloq'uesic ech'el ti taq'uin ti ac'bil ta xch'ulna ti Diose, ti pale Hilciase tiq'uil laj sta jpoc svunal ti oy c'usi jbel tsots albil yu'un ti Dios ti ac'bil comel ti Moisese.

¹⁵Bat slo'iltabe ya'i ta anil no'ox ti Safán ti sbainoj ta sts'ibael ti c'usitic ta xc'otan ta pasele, ti laj sta ta ch'ulna jpoc svunal ti oy c'usi jbel tsots albil yu'un ti Diose. Laj yac'be jelavel jpoc svunal ti Safane.

¹⁶Va'i ec un, laj yich' batel ta stojol ti ajvalile, ti xi laj xchapbe ya'i sc'oplal taje: —Ti avajtuneltaque, Jcuch abtel, ta spasic scotol ti c'u s'elan laj avac'be sbainique.

¹⁷Laj xa yunijesic ti plata ti oy ta ch'ulnae. Laj xa yac'beic jelavel ta yoc ta sc'ob ti buch'utic sbainojic ta xaq'uic iluc ti abtele, xchi'uc ti buch'utic sbainojic ti c'usitic ta xtune.

¹⁸Ti Safán xtoque laj xchapbe ya'i ajvalil ti laj sta jpoc vun ti pale Hilciase. Ti Safane laj yavtabe ya'i ajvalil ti c'usi ta xal ti jpoc vune.

¹⁹C'alal laj ya'i ti ajvalil ti c'usi ta xal ti jpoc svunal ti c'usi jbel tsots albile, lic xch'i' ta jatel ti sc'u'e.

²⁰Ta jech yepal, xi laj yalbe mantal ti Hilciase, ti Ahicam xnich'on ti Safane, ti Abdón xnich'on ti Micaiase, ti Safán ti sbainoj ta sts'ibael ti c'usitic ta xc'otan ta pasele, xchi'uc ti Asaías yaj'opisial ti ajvalile:

²¹—Ba jaq'uicun ca'itic ta stojol Dios ti c'u s'elan ti jc'oplale, c'u s'elan sc'oplal ti jnaclejetic ti comem ta Israele, xchi'uc ti oyic ta Judae. Jaq'uicun ca'itic c'usi smelol slo'il ya'yej ti jpoc svunal laj yich' taele. Yu'un capem xa nan sjol ti Dios ta jtojoltique, yu'un ti jmolmuc'totique mu'yuc laj sts'etan xchiquinic ta ya'yiel ti c'usi laj yal ti Diose. Mi ja'uc laj yabtelanic ta spasel ti c'u s'elan ts'ibabil ta svunale.

²²Ti Hilciase, xchi'uc ti buch'u va'anbilic yu'un ti ajvalile, batic ta stojol ti Hulda ti jamal sba sat ta yalel ti c'usitic ta xc'ot ta pasele, yajnil ti Salum xnich'on ti Ticvae, smom xtoc ti Harhase, ti sbainoj ta sq'uelel ti abtelal c'u'il ta ch'ulnae. Ti Hulda une nacal ta Xchibal Barrio ta Jerusalén, ti xi c'ot yalbeic ti c'op ti c'u s'elan chapal xa no'ox ta ba'yele.

²³Xi tac'batic yu'un ti antse: —Xi s'elan stac'obil yu'un ti Ajvalil Dios yu'un ti Israele: ‘Albeic ya'i ti buch'u laj stacoxuc talel sjaq'uel sba ta jtojole.

²⁴Xichi ta xcal ti vu'un Diosune: Ta xcac' taluc vocol ma' ti ta jteclum li'e, ta stojol ti jnaclejetic yu'une jech c'u cha'al ti bac vocoletic ts'ibabil ta jpoc svunal laj yich' avtael ta stojol ti ajvalil yu'un Judae.

²⁵Laj svalopatinicun comel. Lic xchic'beic pom ti bisbilic ta diosetique. Laj soquesbeicun co'nton yu'un scotol ti xlic ta lum ti c'usitic ta spasique. Jech o xal un, mu xa stac pajesel ma' ti sc'ac'al co'nton ta stojol ti jteclum li'e, mu cha'bel xtub.

²⁶Albeic ya'i un cha'e, ti ajvalil yu'un Judá ti laj stacoxuc talel ta sjaq'uel sba ta stojol ti Diose, ti Ajvalil Dios yu'un ti Israele, xi ta xal xtoque: Laj anijan aba ta snopel ti c'usi laj yich' alel ava'ie.

²⁷La'och ta at-o'nton yu'un. Laj axi'taun c'alal laj ava'i c'u s'elan laj calbe sc'oplal ti jteclum li'e, xchi'uc ti jnaclejetic yu'une. Laj abic'tajes aba ta jtojol. Laj ach'i' ta jatel ti ac'u'e. Xa'oc'olet xa ta jtojol. Jech o xal ti vu'une laj ca'i ma' ti ac'op une.

²⁸Ta xcac' que jti' ti lequil chamel ta xava'ie. Ta xbat achi'in ti amolmuc'totac ta vo'nee. Mu xavil ta aba ta asat ti vocol ti ta xcac' taluc ta stojol jteclum li'e, xchi'uc ta stojol ti jnaclejetic yu'une.’ Yajtaqueletic ti ajvalil une yich'ojbeic xa sutel ma' ti c'op c'u s'elan tac'batique.

²⁹Va'i ti ajvalil une lic staan ta iq'uel ti moletic ich'bil ye sti'ic ti oyic ta Judae, xchi'uc ti oyic ta Jerusalene, yo' ta stsob sbaic.

³⁰Ta jech yepal un, ti ajvalile batic ta xch'ulna Dios xchi'uc ti jnaclejetic yu'un Judae, ti jnaclejetic yu'un Jerusalene, ti paleetique, ti levitaetique, c'alal ta biq'uit ta muc', sjunul jteclum laj stsob sbaic batel. Ti bu taje, lic yavta ti ajvalil scotol ti c'usi ta xal ta svunal trate ti laj yich' tael ta xch'ulna ti Diose.

³¹Ta jech yepal, ti ajvalil une lic sva'an sba ta sts'el ti loc'tabil muc' ta oye. Lic yac' ye sti' ta stojol Dios ti ta sjunul yo'nton ta xlic yabtelan ta spasel ti mantaletic yu'une, ti c'usi nopbil yu'une, ti oy c'usi jbel tsots albil yu'une, ti ta xc'ot ta pasel yu'un ti c'usi ta xal ti trate ti ts'ibabil ta jpoc svunale.

³²Ts'acal to un, laj yalbe ya'i ti jnaclejetic yu'un ti Jerusalene, ti jnaclejetic yu'un ti Benjamine, ti yac'uc ye sti'ic c'otuc ta pasel yu'unique. Ti jnaclejetic yu'un ti Jerusalene c'ot ta pasel yu'unic strate ti Diose, Dios yu'un ti smolmuc'totic ta vo'nee.

³³Ti Josías une laj stubbe sc'oplal ti c'usitic chopol liquem yu'unic ta scotol yosilal ti israeletique. Laj yal mantal ta scotol c'u yepal oy ta Israele, ti c'otuc ta pasel yu'unic c'u s'elan ta ich'el ta muc' ti Ajvalil Dios yu'unique. Ti c'u sjalil cuxule, mu'yuc laj xch'ac sbaic ta stojol ti Ajvalil Dios yu'un ti smolmuc'totic ta vo'nee.