Read Tzotzil 2 Crónicas 35 Bible Online

2 Crónicas 35 - Tzotzil bible

2 Crónicas 35

¹Xi s'elan laj sliques spasel q'uin colel ti Josías ta Jerusalene, ta sventa stoyel xi'el ti Diose: Ta xchanlajunebal (14) c'ac'al ta sliquebal u yu'un ti jabile, laj smilic ch'iom chij ta sventa ti q'uine.

²Lic yac'anbe yavilic ti bu ta xtunic ta yabtelic ti paleetique, laj xchapbe ya'iic ti tunicuc ta xch'ulna ti Diose.

³Ma'uc no'ox taje, xi xcholet laj sbijubtas ti levitaetic ti ja' jchanubtasvanejetic yu'un scotol ti Israele, xchi'uc ti t'ujbilic yu'un ti Diose: “Ti ch'ul caxae, ba tiq'uic ta ch'ulna ti bu laj smeltsan ti Salomón xnich'on ti David ajvalil to ox yu'un ti Israele. J'ech'el ac'o sta yavil yo' jech mu teyuc no'ox xacuchet achi'uquique. Avi tana li'e, o'ntolinic ti ac'o abaic ta tunel yu'un ti Ajvalil Dios avu'unique, jmoj xchi'uc ti Israel steclumal ti Diose.

⁴Chapo abaic lec ta jujuvoq'ue, xchi'uc ti ventainic lec ti bu atunelique, jech c'u cha'al ts'ibabil comel yu'unic ti David ajvalil yu'un ti Israele, xchi'uc ti Salomón ti ja' xnich'one.

⁵Ti ta ch'ulnae, jelilano abaic ta sq'uelel ti bu abainojic ta jujuvoc' levitaoxuque, ti jech jva'lej c'otemoxuc yu'un ti jujuvoc' israeletic ti avinquilel abaique.

⁶Milic ti ch'iom chij ta xtun ta sventa ti q'uin Colele, poco abaic tuso abaic, chapanic lec ti c'usitic ta xtune, yo' jech ta xch'unic ta spasel ec ti avinquileltac ti c'usi albil yu'un Dios ti Moisese.”

⁷Jech ti Josías eque, xi s'elan ti oy ta sventa xchon sbolomtac stuque, loc' ayan yo'nton ti tunuc yu'un scotol ti jteclum ta sventa ti q'uin Colele: ti ch'iom tot chijetique, xchi'uc ti xch'iom tot tentsunetic, ti c'ot ta lajuneb xcha'vinic mil (30,000) ta cot ta scotole, laj yac' xtoc oxmil (3,000) ta cot capon vacaxetic.

⁸Yaj'opisialtac ti ajvalil eque, loc' ayan ta yo'ntonic ta yaq'uel ta stojol ti jteclume, ta stojol ti paleetique, ta stojol ti levitaetique. Ti Hilcias une, ti Zacariase, xchi'uc ti Jehiele, ti buch'utic sbainojic ta sq'uelel xch'ulna ti Diose, laj yaq'uic jelavel ta sc'ob paleetic ti cha mil vac ciento (2,600) ta cot chon bolom sventa ti'el Colele, oxib ciento (300) ta cot ti capon vacax xtoque.

⁹Ti Conanías ec xchi'uc ti xchi'iltac ta abtele, ti Semaiase, ti Natanaele, ti yan xtoque, ti Hasabiase, ti Jehiele, ti Jozabade, banquilaletic yu'un ti levitaetique, laj yaq'uic vo'mil (5,000) ta cot chon bolometic sventa ti q'uin Colele, xchi'uc vo'ob ciento (500) ta cot capon vacax.

¹⁰Ti chapal xa ti c'usi ta xtun ta q'uin Colele, jech o xal ti paleetique ochic ta sbainel ti bu stunelique, ti levitaetic eque laj xchapan sbaic lec ti bu stunelic ta jujuvoc' jech c'u cha'al yaloj mantal ti ajvalile.

¹¹Va'i un, lic smilic ti chon bolometic sventa ti q'uin Colele. C'alal yacalic ta xcho'el ti chon bolometic ti levitaetique, jech ti paleetique ta svajic ch'ich' ta sti'il altar ti c'alal ta xaq'uic jelavel talel ti levitaetique.

¹²Ts'acal to un, laj sloq'uesic ti xepu' ti oy sc'oplal ta xich' chiq'uel ta sventa ti c'u s'elan nopbil ta spasic ta jujuchop jnaclejetic yu'un ti jteclum ta xaq'uic ta stojol Dios jech c'u cha'al albil ta jpoc vun yu'un ti Moisese, jech laj spasic xtoc ta stojol ti capon vacaxetique.

¹³Liquic ta svoel un, ti chon bolometic ti ta xtun ta sventa sq'uinal ti Colele, jech c'u cha'al ts'ibabil comel sc'oplale, ti jlom matanaletic xtoque, laj slacanic ta lumal binetic, ta taq'uin binetic, ta xaltemetic, ti anil no'ox lic spuquic ta stojol scotol ti jnaclejetic yu'un ti jteclume.

¹⁴Ti levitaetic une lic xchapanic ti c'usitic ta xtun yu'un ti stuquique xchi'uc ti paleetique. Ti paleetic snitilultac ti Aarone, yich'oj ic'ub xchi'uquic ta yaq'uel ti chic'bil matanaletique, xchi'uc ti xepu'e. Jech o xal ti levitaetique laj xchapanic ti c'u yepal ta xtun yu'un ti stuquique, xchi'uc ti paleetic snitilultac ti Aarone.

¹⁵Ja'uc ti jq'uejimoletic snitilultac ti Asafe, j'ech'el oyic ti bu albil stunel jech c'u cha'al yaloj ti Davide, ti Asafe, ti Hemane, xchi'uc ti Jedutún ti jamal sba sat ti oy ta yajtunel ti ajvalile. Ti jchabiej-ti'naetic xtoque, j'ech'el teyic o, mi jliqueluc mu xictaic comel ti bu sbainojic ta sq'uelele. Ti levitaetic ti xchi'il sbaic ta abtele, sbainojic ta xchapanel c'u yepal ta xich'ic ec ti milbil matanaletique.

¹⁶Ti jech c'ac'al taje, c'ot ta chapajel scotol un, ti tunel yu'un Dios ti jech c'ac'al taje, ta sventa ti q'uin Colele, ti ta xich' xchiq'uel ti matanal ta yaltar ti Diose, jech c'u cha'al laj yal mantal ti ajvalil Josiase.

¹⁷Ti c'u yepal oy ti israeletique laj spasic ti q'uin Colele, xchi'uc laj spasic vucub c'ac'al q'uin sventa ta sve'ic pan ti mu'yuc ac'bil ti spajubtasobile.

¹⁸Yu'un ja' no'ox yorail c'alal cuxul ti j'alc'op Samuele, laj spasic q'uin Colel ta Israel jech c'u cha'al le'e. Ti ech'ic ti ajvaliletic yu'un Israele, mi junuc velta laj yich' pasel q'uin Colel ta Israel jech c'u cha'al laj spas ti Josías ti tsobolic lec xchi'uc ti paleetique, ti levitaetique, ti jnaclejetic yu'un Judae, xchi'uc ti jnaclejetic ta Jerusalene.

¹⁹Ti c'ot ta pasel ti q'uin Colel taje, ja' o ta xvaxaclajunebal (18) jabil stic'lej ta ajvalilal ti Josiase.

²⁰Ta sjalil xa ox un, c'alal chapajem xa ox lec ch'ulna yu'un ti Josiase, ti Necao ajvalil yu'un ti Egiptoe, laj stam batel sbe ta stuq'uil uc'um Eufrates yo' jech xbat stsac ta leto ti jteclum Carquemise. Ti Josías une bat smac ta be.

²¹Ja'uc ti Necao une xi laj yal ti laj stac batel yajtuneltaque: “Ch'an utun, mu xamacun ta be, ajvalil yu'un Judá. Ma'uc tal jtsacot ta leto. Yan jteclum ti oyun ta leto xchi'uque. Laj yalbun mantal Dios ti ac'o jsuj jbae. Alequilal atuc, ictao aba ti ta xatoy ave ta stojol ti Diose. Mu xata avocol yu'un ti sva'anoj sba ta jtojole.”

²²Ja'uc ti Josías une mu'yuc laj spajes sba. C'ajomal no'ox laj yac'be yipal ta stsaquel ta leto. Mu'yuc laj yac' ta venta ti va'i s'elan laj scaj'al ti Necao ti liquem talel ta stojol Dios ti c'usi laj yale. Ja' yu'un un, lic tsacvanuc ta leto ta stenlejal yu'un Meguidoe.

²³Ti j'ac'-yolobetique, laj syayijesic ti ajvalil Josiase. Va'i un ti ajvalile xi laj yalbe ti yaj'opisialtaque: “¡Jopicun loq'uel li'e, yu'un tsots xa liyayij!”

²⁴Loq'uesat talel yu'un ti yaj'opisialtac ta yut carreta yu'un ti ac'ob-letoe. Laj sjelubtasic batel ta xchibal carreta ti oy yu'unique. Laj yiq'uic batel c'alal to Jerusalén ti bu chame. Bat smuquic ta smuquinal ti smolmuc'totaque. Scotol jnaclejetic yu'un Judá, xchi'uc jnaclejetic yu'un Jerusalén, laj yoq'uitaic ti cham ti Josiase.

²⁵Ti Jeremiase lic xchapan jun q'uejimol sventa svulesobil yo'nton ti jlajel jtubele. Avi tana le'e, jech to comem yu'unic scotol ti jq'uejimol viniquetique, ti antsetique, ta svulesel ta o'ntonic sq'uejintael sventa svulesobil yo'nton ti jlajel jtubel Josiase. Ti q'uejimoletic taje, na'bil com o yu'unic ta Israel ti ts'ibabil jmoj xchi'uc ti yan q'uejimoletique.

²⁶Ti jlom slo'il ya'yejal ti Josiase, xchi'uc ti lequil abtel laj spas co'ol jech c'u cha'al ti ts'ibabil ta svunal ti oy c'usi jbel albil yu'un ti Diose,

²⁷xchi'uc ti c'usitic laj spas ta sliquebale, xchi'uc ta stsutsebale, ts'ibabil com ta jpoc svunal yabtel ti ajvaliletic ta Israele xchi'uc ta Judae.