Read Tzotzil 2 Crónicas 36 Bible Online

2 Crónicas 36 - Tzotzil bible

2 Crónicas 36

¹Ti jnaclejetic yu'un ti jteclume laj staic ta iq'uel ti Joacaz xnich'on ti Josiase, ti ta x'och ta ajvalilal ta Jerusalén ta yich'bel yabtel ti stote.

²Yich'oj oxib xcha'vinic (23) jabil c'alal och ta ajvalilal ti Joacaze. C'ajomal no'ox oxib u ech' ta ajvalilal ta Jerusalén.

³Jipe loq'uel ta ajvalilal ta Jerusalén yu'un ti ajvalil ta Egiptoe. Lic stsatsal c'anbe patan ti jteclum ta yaq'uel oxmil xchi'uc vo'lajunvinic (3,300) ta kilo ti platae, oxlajuneb xcha'vinic (33) ta kilo ti oroe.

⁴Ma'uc no'ox taje, ti ajvalil ta Egiptoe laj stic' ochel ta ajvalilal yu'un Judá, xchi'uc ta Jerusalén, ti Eliaquim xchi'il ta voq'uel ti Joacaze, xchi'uc laj sjelbe sbi, Joacim laj sbiin yu'un. Jech ti Joacaze, laj yic' batel c'alal to Egipto.

⁵C'alal och ta ajvalilal ti Joacime, vo'ob xcha'vinic (25) jabil yich'oj. Buluchib (11) jabil ech' ta ajvalilal ta Jerusalén. Ja'uc le' une, ti c'usitic lic spase, chopol laj yil ta sba ta sat ti Ajvalil Dios yu'une.

⁶Ti Nabucodonosor ajvalil yu'un ti Babiloniae laj stam talel sbe ta scontrainel ti Joacime. Laj xchuc ta c'anal carina taq'uin yo' jech ta xic' batel c'alal to Babilonia.

⁷Ti c'usitic laj sta ta xch'ulna Dios ti Nabucodonosore, jlom laj yich' batel, bat yac' ta xch'ulna ti oy ta Babiloniae.

⁸Ti yantic slo'il ya'yejal ti Joacime, xchi'uc ti c'usitic c'ot ta pasel ti laj soques sc'oplal xchi'uque, ts'ibabil com ta jpoc svunal yabtel ti ajvaliletic yu'un ti Israele, xchi'uc ti Judae. Laj xcuch comel abtelal ti Joaquín ti ja' xnich'one.

⁹Ti Joaquine yich'oj vaxaclajuneb (18) jabil c'alal lic ochuc ta ajvalilale. Laj spas ajvalilal oxib u xchi'uc lajuneb c'ac'al ta Jerusalén. Ja' no'ox un, ti c'usitic lic spase, chopol laj yil ta sba ta sat ti Diose.

¹⁰C'alal yorail xa ta xlic yaluc chaquilo' ti jech jabil taje, ti ajvalil Nabucodonosore laj yal mantal ti ac'o yiq'uic batel ta Babilonia ti Joaquine jmoj xchi'uc ti c'usitic toyol stojol xtun ta xch'ulna ti Diose. Va'i un, lic sva'an ta ajvalilal yu'un Judá, xchi'uc Jerusalén ti Sedequías yuts' yalal ti Joaquine.

¹¹Ti Sedequiase yich'oj jun xcha'vinic (21) jabil c'alal lic ochuc ta ajvalilale. Buluchib (11) jabil laj spas ajvalilal ta Jerusalén.

¹²Ti c'usitic lic spas une, mu lecuc laj yil ta sba ta sat ti Diose. Yu'un mu'yuc laj sbic'tajes sba ta stojol ti j'alc'op Jeremías c'alal c'opoj ta sventa Diose.

¹³Ma'uc no'ox taje, lic stoy sba ta scontrainel ti ajvalil Nabucodonosor ti buch'u albat ta jamal ti ac'o yal ta sba ta sat Dios ti xu' ta xcom ta yajcoltaobbae. Jbel yo'nton mu sc'an sbic'tajes sba ta stojol ti Ajvalil Dios yu'un ti Israele.

¹⁴Jech lic spasic scotolic xtoc ti banquilaletic yu'un ti Judae, ti paleetique, xchi'uc scotol ti jteclume. Epaj ti sbolil yo'ntonic ta j'ech'ele. Lic yac'beic yipal ta spasel ec ti c'usitic mu lecuc liquem yu'unic ti muc'tiquil jteclumetique. Lic soquesbeic sc'oplal xch'ulna ti Dios c'alal st'ujoj stuc ti xch'ulna ti bu ta x'ich'at ta muc' ta Jerusalene.

¹⁵Ti Ajvalile, Dios yu'un ti smolmuc'totic ta vo'nee, mu'yuc ono'ox spajeb ta xal talel bijubtasel ta sventa ti yaj'alc'optaque, yu'un oy syail xc'uxul yo'nton ta stojol ti steclumale, xchi'uc ti bu nacale.

¹⁶Ja'uc ti stuquic une tse'ej no'ox laj ya'ibeic sc'op ti yaj'alc'optac Diose. Mu'yuc stu laj ya'iic ti c'usitic laj scaj'alique. Laj xchopol-c'optaic ti yaj'alc'optaque. Ta jech to yepal un, mu ta vocol laj syales yoc sc'ob ta sc'ac'al yo'nton ti Dios ta stojol ti steclumale, ti mu'yuc xa laj sta spojel scolelic ta j'ech'ele.

¹⁷Va'i un, ti Diose laj yac'be talel sbe xaneb ti ajvalil yu'un ti caldeotic yo' ta xcontrainatic yu'une. Lajic ta milel ta espada ti querem viniquetic ta yut ti ch'ulna une. Mu'yuc xa syail xc'uxul lajic ti jva'lej viniquetique, ti jva'lej tsebetique, ti moletique, ti buch'utic ch'abal ts'acal ti yoc sc'obique. J'ech'el aq'ueic ta c'abal yu'un Dios scotolic.

¹⁸Scotol ti c'usitic ti ta xtun ta xch'ulna ti Diose, mu'yuc ta alel mi muc' mi biq'uit, xchi'uc ti c'usitic toyol stojol q'uejbil ta ch'ulnae, xchi'uc ti c'usitic oy yu'un ti ajvalile, xchi'uc ti c'usi oy yu'un ti yaj'opisialtaque, scotol laj yich'ic batel c'alal to Babilonia ti ajvalil yu'un ti caldeoetique.

¹⁹Ma'uc no'ox taje, laj xchiq'uic xch'ulna ti Diose. Laj slilinbeic smocal ti Jerusalene. Laj stsanbeic sc'ac'al ti naetic yu'une. Laj slilinic scotol ti c'usitic toyol stojol meltsajeme.

²⁰Ts'acal to un, laj sbec' batel c'alal Babilonia ti c'u yepal mu'yuc xlajic ta milele, ti lic ochuc ta mosovinel yu'un xchi'uc ti yalab xnich'nabique. Jech com o ja' to ti c'uxi lic yich' yip ta spasel mantal ti muc' ta jteclum Persiae.

²¹C'ot ta pasel un ti c'u s'elan yaloj ti Dios ta sventa ti j'alc'ope, ti ta sta ti mu'yuc c'usi sna' ta xcux ti banomile, ti mu'yuc stijel ta c'op lilijem ta xcome, ja' to mi x'ech' xa ox ti lajuneb xchanvinic (70) jabile.

²²Ti sba sjabilal yochel ta ajvalilal ti Ciro, ajvalil yu'un ti Persiae, yo' ta xc'ot ta pasel sc'op Dios ti laj scaj'al ti Jeremiase, ti Diose laj stijbe yo'nton ti Ciroe, ti xi laj stac batel mantaletic ta ts'ibabil vunetic ta jteclumetic ti bu c'alal smacoje:

²³“Xi xcholet ta xal ti ajvalil yu'un ti Persiae: Ti Ajvalil ti ja' Dios yu'un ti vinajele, yac'ojbun ta coc ta jc'ob scotol ti ajvaliletic ti oy ta banomile. Laj yac'bun jbain ta sva'anel jun ch'ulna ta Jerusalén ti oy ta yosilal ti Judae. Buch'uucoxuc no'ox steclumaloxuc ti Diose, ac'o xa scoltaoxuc ti Ajvalil Dios avu'unique, batanic ti bu taje.”