Read Tzotzil 2 Crónicas 5 Bible Online

2 Crónicas 5 - Tzotzil bible

2 Crónicas 5

¹C'alal tsuts scotol ti abtel yu'un xch'ulna ti Dios ti laj yac' ta meltsanel ti Salomone, ti c'u yepal ti c'usitic meltsanbil ta oro ta plata ti yac'oj comel ta stojol Dios ti David ti ja' stote, ti Salomone bat sq'uej ta sq'uejobil ti oy ta xch'ulna ti Diose.

²Va'i ti Salomón une laj stsob scotol ta Jerusalén ti moletic yu'un ti Israele, scotol ti banquilaletic yu'un ti jujuvoc' nitilule, xchi'uc ti buch'u ich'bil ye sti'ic banquilaletic yu'un ti jujuchop Israele, yo' jech ta xich'ic loq'uel xcaxail strate Dios ti oy ta Sione, yo' jech ta xich'ic batel ta Steclumal David.

³Sc'ac'alil ti muc' ta q'uine, ta yucubal (7) u yu'un ti jabile, ti laj stsob sbaic ti israeletic xchi'uc ti ajvalil Salomone.

⁴C'otic scotolic ti moletic yu'un ti Israele, xchi'uc ti levitaetic ta xchechel loq'uel ti caxae.

⁵Jmoj laj yich'ic loq'uel xchi'uc ti Axibalna ti bu nupel ta be yu'un ti Diose, xchi'uc scotol ti c'usitic c'otem ta jtunel ti tiq'uil ta yute, ti ja' yich'ojic batel ti paleetique, xchi'uc ti levitaetique.

⁶Ti ajvalil Salomone, xchi'uc ti jteclum Israel ti laj stsob sba xchi'uque, vololic ta sts'el ti caxae, ta yaq'uel ti milbil matanal chijetic, xchi'uc tot vacaxetic ti mu atbajuc yepal ta j'ech'ele.

⁷Ta ts'acal to un, ti paleetique laj yich'ic batel c'alal to yut ch'ulna xcaxail strate ti Diose. C'ot yu'unic c'alal to bu oy ti Bats'i Cuxul Ch'ul Cuartoe, ta macbil yu'un ti chib ti c'usi oy xiq'uique,

⁸ti xlich'ojan xiq'uic ta smaquel ti c'u sjamlej ti caxae. Smacojic lec c'ot ti caxae, xchi'uc ti sc'atlomte'ale.

⁹Natic lec ti sc'atlomte'altaque, ti xvinaj ech'el ta q'uelel ta yut ch'ulna ta yeloval ti bu oy ti Bats'i Cuxul Ch'ul Cuartoe. Ti ta spate mu xvinaj ta q'uelel une, ti jech staoj yav comem avi tana le' une.

¹⁰Ti ta yut caxae, c'ajomal no'ox oy ti cha'pech pech-pech ton ti laj stic' comel ti Moisés c'alal oyic to ox ta Horebe, ja' xpech-xpech tonaltac strate Dios ti laj spas ta stojol ti israeletic ti c'alal loq'uic talel ta Egiptoe.

¹¹Scotol ti paleetique loq'uic talel ti ta Ch'ul Cuartoe. Ti c'u yepal ti paleetic ta scotole, spocoj stusoj sbaic, ti mu ja'uc laj sna'ic c'usi to ora ta xtunic ti jujuvoq'ue.

¹²Scotol ti jq'uejimol levitaetique, ti Asafe, ti Hemane, xchi'uc ti Jedutune, jmoj xchi'uc ti xnich'nabique, xchi'uc ti jlom yuts' yalalique, va'alic ta yeloval sloq'ueb c'ac'al yu'un ti altar ti naca sac ti sc'u' slapojique. Oy ta sc'obic ti set-set taq'uinetique, ti jtos o ta vobetique, xchi'uc ti arpaetique. Chapalic vacvinic (120) ta vo' paleetic ta yoq'uisanel ti oq'uesetique.

¹³Va'i un, jmoj vololic scotolic, lic yoq'uisanic ti oq'uese, ti jun no'ox snuq'uic lic q'uejinicuque, ta yalbel coliyal ti Diose. Xnic no'ox liquel ti oq'uese, ti set-set taq'uinetique, xchi'uc ti yan c'usitic ep ta tos vobetic ti c'alal xi yacal ta xq'uejinique: “Lequil c'optabiluc ti Diose, yu'un toj lec yo'nton. Sbatel osil oy syail xc'uxul yo'nton.” Ta jech no'ox yepal un, volibil c'ot ta toc xch'ulna ti Diose.

¹⁴Ta scoj ti toque, mu'yuc xu' yu'un ti paleetic ta spasel stoyel xi'el ti Diose, yu'un yutsilal slequilal ti Diose laj svol sba ta sjunul ti ch'ulnae.