Read Tzotzil 2 Crónicas 6 Bible Online

2 Crónicas 6 - Tzotzil bible

2 Crónicas 6

¹Va'i ti Salomón une xi laj yale: “Ti vo'ote, Dios, avaloj ti nacalot ta queoval axinal ti ic' ta j'ech'ele.

²Ja'uc le' une, laj jmeltsanbot jun ch'ulna yo' jech ta xanaqui, ti j'ech'el o ta xacom ta naclej ti bu taje.”

³Ta jech yepal ti ajvalil une laj sq'uel batel ti bu va'ajtic scotol ti jteclum Israele. Laj sc'anbe slequilal Dios ta stojolic.

⁴Yu'un xi laj yale: “Toj jun yutsil ti Ajvalil Dios yu'un ti Israel ti c'ot ta pasel yu'un sc'op laj yalbe comel ti David ti jtote, ti c'alal xi laj yalbee:

⁵‘Ti c'uxi lic jloq'ues tal ta Egipto ti jlumale, yoquel mu'yuc laj jt'uj ta scotol nitilulil yu'un ti Israel yo' jech ta xich' va'anel junuc ch'ulna ta jventae. Mi junuc vinic laj jt'uj yo' ta xc'ot ta jtojobtasvanej yu'un ti jteclumal Israele.

⁶Ti Jerusalene c'ot ta t'ujel cu'un yo' jech tabilun ta na'el ti bu taje. Laj jt'uj ec ti Davide yo' jech ta sventain ti jteclumal Israele.’

⁷Ti David ti ja' jtote, juteb ta yo'nton sc'an ox ta sva'an ya'i ch'ulna sventa stoyel xi'el ti Ajvalil Dios yu'un ti Israele.

⁸Manchuc mi jech un, le' une, xi albat yu'un ti Diose: ‘Lec ti oy ta avo'nton ta xameltsan ava'i ti jch'ulnae.

⁹Ja'uc le' une, ma'uc c'otem ta aventa ta smeltsanel. Ja' c'otem ta sventa ti anich'on ti ta to xavile. Ja' me unbi ma' ti buch'u ta sva'anbun ti jch'ulnae.’

¹⁰“Lec un cha'e, yu'un ti Diose c'ot xa ta pasel yu'un ti sc'op ti yaloje. Jech c'u cha'al laj yale, yu'un laj cuchbe yabtel ti David ti ja' jtote. Li'och ta ajvalil ta sventainel ti Israele. Laj jva'an ch'ulna ta sventa ti Ajvalil Dios yu'un ti Israele.

¹¹Laj jtic' ochel xtoc ti xcaxail trate yu'un Dios ti laj spas ta stojol ti israeletique.”

¹²Ta ts'acal to un, ta sba ta sat scotol ti israeletique, laj sva'an sba ti Salomón bu oy ti altar yu'un ti Diose. Lic snub ta toyol ti sc'obe.

¹³Muyem ta c'opojebal ti meltsanbil ta c'anal taq'uine, ti yac'oj ta meltsanel tey ta o'lol amaq'ue. Yich'oj chib metro xchi'uc vo'ob xcha'vinic centimetro (2.25 m.) ti snatile. Ja' jech yich'oj ti sjamlej xtoque. Yich'oj jun metro xchi'uc vo'lajuneb xcha'vinic centimetro (1.35 m.) ti staylej une. Ta jech yepal un, ta sba ta sat scotol ti jteclum israeletique, laj sq'uejan sba. Lic snub muyel sc'ob ta vinajel.

¹⁴Tsots ti xi liquel ti sc'opojel sti'inele: “Ajvalil, Dios yu'un ti Israele, mi ja'uc ta vinajel ta banomil oy jun Dios jech c'u cha'al ti vo'ote. Ta xc'ot ta pasel avu'un ti atratee, ta yaq'uel iluc ti yutsilal avo'nton ta stojol ti buch'u sjunul yo'nton ta xac' sba ta tunel ta atojole.

¹⁵C'ot ta pasel avu'un ti c'usi laj avalbe comel ti David ti ja' jtote, ti snupin sba c'ot xchi'uc yabtel ti ac'op ti c'ac'al avi tana li'e.

¹⁶C'otuc ta pasel avu'un cha'e, Ajvalil, Dios yu'un ti Israele, ti xi s'elan laj avalbe ti avajtunel David ti ja' jtote: ti mu ono'ox xch'ay ta be ti ta yutsilal avo'nton ta xchoti ta sventainel Israel ti snitilule, yavil mi ta sq'uel sbae, mi ta xc'ot ta pasel yu'unic ti oy jbel c'usi tsots albil jech c'u cha'al laj spas stuc ti Davide.

¹⁷Ja' yu'un un cha'e, Ajvalil, Diosot yu'un ti Israele, c'otuc ta pasel avu'un ti c'usitic laj avalbe ti avajtunel David ti ja' jtote.

¹⁸“Ja'uc le' une, ¿mi jech van cac'tic, Dios, ti xu' ta xachi'in ta naclej ti viniquetic li' ta banomile, c'alal mi ja'uc xa'och o yu'un ti vinajel xchi'uc ti c'u sjamlej smacoje? ¡Bu la ba ochan o ta ch'ulna ti laj jmeltsanbot une!

¹⁹Manchuc mi jech un, Cajval Dios, a'yibun ti jc'opojel jti'inel ti xivocolet ta atojole. Ts'eteluc achiquin ta ya'yibel sc'opojel ti avajtunele.

²⁰C'ac'al ac'ubaluc, mu xavicta aba ta sq'uelel ti ch'ulnae, ti laj aval ta xava'an abae. A'yibo sc'opojel sti'inel ti avajtunel ti li' to ta staot ech'el ta c'oponele.

²¹A'yibun ti li' to xivocolet ta atojol xchi'uc ti jteclum Israele. C'alal to vinajel ti bu nacalote, a'yibun talel, ti ch'aybil c'otuc ti jmul jcolo'cutique.

²²“C'alal mi oy buch'u ta sta smul ta stojol ti xchi'ile, ti ta sujat ta sva'anel ta rextico ti altar li' ta ch'ulnae,

²³ta vinajeluc to, liqueso ti chapanel ta sc'an ti avajtuneltaque. Ac'bo stoj ya'i ti buch'u oy smule. Lamluc c'otuc ta sba ti c'usitic chopol ta spase. Pojo xtoc ti buch'u ch'abal smul ti c'u s'elan c'otem ta stojole.

²⁴“C'alal tsalbil ta xc'otic yu'un yajcontraic ti alumal Israel ta scoj ti ta sta smulic ta atojole, ti mi ta sutes sbaique, ti xaslequil-c'optaote, ti xvocolet ta sc'oponel sti'inelot li' ta ch'ulnae,

²⁵ta vinajeluc to, a'yibo ti sc'opojele. Ch'aybo ti smul scolo'e. Ta aventauc atuc, suticuc talel ta jteclum ti laj avac'bee, ti laj avac'be ti smolmuc'totic ta vo'nee.

²⁶“C'alal mi ta xva'i ti c'ac'ale, ti mu xac' ti vo' ta scoj ti laj sta smul ti jteclume, ti mi xc'opoj xti'inic xa liquel li'e, ti xaslequil-c'optaot xa liquele, ti ta sutes sbaic ti c'alal ta xatsitsic ta scoj ti smulique,

²⁷ta vinajeluc to, a'yibo ti sc'opojel sti'inele. Ch'aybo smul scolo' ti avajtuneltaque, xchi'uc ti ateclumal Israele. Tojobtaso ech'el ta lequil be ti bu xu' ta stamic batele. Va'i unbi, ac'o taluc avu'un ti vo' li' ta banomil ti laj avac'be ta xrexto ti ateclumale.

²⁸“C'alal mi ta xtal vi'nal, mi chamel ti li' ta jteclume, mi jtos o ti c'usi chopol ta xc'ot ta pasele, mi ta xtaquij ta c'ac'al ti c'usitic ta xch'ie, mi ja' ti c'usitic ta xulesbe sc'oplal ti ts'unubale, mi ta xtal ti c'ulubetique, mi yuch'al ti ts'unubale, mi ta xtal voliaticuc ta tsaquel ta leto ti jteclumalcutic li'e, mi yan ti c'usitic ta xvul ta loq'uele,

²⁹a'yibo sc'opojel sti'inel ti xvocolet ta atojole, mi ants, mi vinic, mi ja' scotol ti jteclume. C'alal ta xvinaj ti c'ot xa ta stojolic ti vocole, ti mu x'ech' xjelav ta xa'iique, ti snub xa sc'obic staelot ta c'oponel ta ch'ulnae,

³⁰ta vinajeluc to ti bu nacalote, a'yibo talel ti sc'opojel sti'inelique, ti ch'aybil c'otuc ti smul scolo'ique, ti stojuc jujun avu'un ti c'u s'elan stamojic batele, ti vo'ot no'ox xavojtiquin c'u s'elan ta snop ti ta yo'nton xnich'nab ti viniquetique.

³¹Ja' to jech ta xlic xi'taot ta xayich'icot ta muc' ti li' cuxulic ta banomil ti laj avac'be comel ti jmolmuc'totcutic ta vo'nee.

³²“Le'e, mi ja' jun jyanlum ti ta namal banomil ta xlic talel ta sventa ti jelavem ti amuc'ul atsatsale, ti muc'tic no'ox c'usi ta xc'ot ta pasel avu'une, ti xtal staot ta c'oponel li' ta ch'ulnae,

³³ta vinajeluc to ti bu nacalote, a'yibo ti sc'opojel sti'inele. Loc'uc ayanuc ta avo'nton ta spasel ti c'usi ta sc'anbote yo' jech ta xayojtiquinic scotol ti muc'tiquil lumetic ti oy ta banomile, yo' jech ta xi'taot ta xich'ot ta muc' jech c'u cha'al ti ateclumal Israele, ti c'otuc ta yo'ntonic li' ta xavich' tael ta na'el li' ta ch'ulna ti laj jva'ane.

³⁴“Ti buyuc no'ox ta xatac batel ti ateclumal ti c'alal ta xloq'uic batel ta stsaquel ta leto ti yajcontraique, mi xvocolet sq'ueloj talel ti jteclum ti vo'ot laj at'uje, xchi'uc ti ch'ulna ti laj jmeltsane,

³⁵ta vinajeluc to, a'yibo ti sc'opojel sti'inelic ti xvocolet ta atojole, ti pojbil c'otuc avu'un ti c'usi ta xc'ot ta stojolique.

³⁶“C'alal mi ta sta smulic ta atojol ti ateclumale, yu'un mu'yuc buch'u junuc ma' ti mu sa' ti smule, ti ta xcap ajol ta stojolique, ti ta xavac' ta yoc ta sc'ob ti scontraique yo' jech chucbil ta xbatic ta mosovil ta yan jteclum, mi nom, mi li' no'ox nopole, a'yibo ti sc'opojel sti'inelique.

³⁷Mi c'otic xa ta jteclum ti bu chucbil batique, ti ta sutes sbaic ta atojole, ti xvocoletic liquel ta xa'i ta yo'ntonic ti oy smulique, ti chopol ti c'usi laj spasique, a'yibo ti sc'opojel sti'inelique.

³⁸Mi ta sjunul xa yo'ntonic, ta sjunul xch'ich'elic, ta sut talel ta atojol ti jteclum ti bu ic'bil batic ta chuquele, ti xastaot xa ta c'oponel ti q'uelel batel satic ta stuq'uil ti banomil ti bu laj avac'be ti smolmuc'totic ta vo'nee, ta jteclum ti bu laj at'uje, ta ch'ulna ti bu laj jmeltsane,

³⁹ta vinajeluc to, ti bu nacalote, a'yibo ti sc'opojel sti'inelique, ti xvocoletique, ti pojbiluc c'otuc avu'un ti c'usi c'ot ta stojolique, ti ch'aybil c'otuc smulic ta atojol ti avalab anich'nabe.

⁴⁰“Ja' yu'un un cha'e, Cajval Dios, ts'etano ani' achiquin ti ich'biluc tsacbiluc ti sc'opic ti ta staot ta c'oponel li'e.

⁴¹“Dios Cajval, va'lan, tec'lan xchi'uc amuc'ul atsatsal ti oy ta acaxae. La' li' ti bu chapanbil xcuxobil avo'ntone. Ti avajpaletaque, Dios Cajval, sc'u'inojuc c'otuc ti pojel colele. Muyubajicuc no'ox ti buch'u jun yo'nton ta atojole.

⁴²Mu xa'ilin, Cajval Dios, yu'un ti ajvalil ti laj at'uje. Vuleso ta avo'nton ti syail xc'uxul avo'nton ta stojol ti David ti ja' avajtunele.”