Read Tzotzil 2 Crónicas 7 Bible Online

2 Crónicas 7 - Tzotzil bible

2 Crónicas 7

¹C'alal laj yo'nton ta c'opojel ti'inel ti Salomón une, yal talel c'oc' ta vinajel ti laj xchic' ti matanale, xchi'uc ti milbil matanaletique. Noj ta sjunul ch'ulna yutsil slequilal ti Diose.

²Ti jech taj une, jech o xal un, mu xa xu' x'ochic batel ti paleetique.

³C'alal laj yilic scotol israeletic ti c'oq'ue, xchi'uc yutsilal slequilal ti Dios ti vul ta yalel ta ch'ulnae, xquejeletic xa laj spatan sbaic ta lumtic ti snupilan xa ti pac'bil tone. Lic xi'taic ti Diose, ti xi ta xcha'alilanbeic ti Dios ta yalbel colyale: “Stuc no'ox lec ti yo'ntone. Sbatel osil oy xc'uxul yo'nton.”

⁴C'alal laj taj une, ti ajvalile, xchi'uc scotol ti jteclume, laj yaq'uic milbil matanaletic ta stojol ti Diose.

⁵Ti ajvalil Salomón une laj yac'be matanal ti Diose, chib xcha'vinic mil (22,000) ta cot milbil tot vacax, xchi'uc vacvinic mil (120,000) ta cot chij. Jech ti ajvalile, xchi'uc scotol ti Israele, laj stsajic ti xch'ulna ti Diose.

⁶Ti paleetique j'ech'el tey va'alic o ti bu staoj ti yavilique. Jech ti levitaetic eque chapalic xchi'uc ti ep ta tos xch'ul vobic ti laj sliques comel ti ajvalil David jun q'uejimol ti xi ta xale: “Sbatel osil oy ma' ti syail xc'uxul yo'ntone.” Xnic no'ox yu'unic oq'uesetic ti paleetic c'alal va'alic scotol ti israeletique.

⁷Ti Salomón xtoc une laj yac' ta ventainel ti o'lol amac oy ta yeloval sti' xch'ulna ti Diose. Ti bu taje, laj yac' ta chiq'uel ti matanaletique, xchi'uc xepu'al ti milbil matanaletic sventa ti lajesobil o'ntonale, yu'un ti ta altar laj yac' ta meltsanel ta c'anal taq'uine, mu x'och o ti chic'bil matanaletique, ti matanal sat ts'unubaletique, xchi'uc ti xepu'e.

⁸Ta yorail taj une, ti Salomón xchi'uc scotol ti Israele, xchi'uc mu no'ox albajuc yepal talic ta spasel ti q'uin yu'un ti Lambil Yanal Te' Axibal Nae, ti liquem talel ta ochebal yu'un ti Hamate, c'alal to ta sti'il yuc'umal ti Egiptoe.

⁹Ta yoc'omal un, ja' jun muc'ul q'uin ech', yu'un vucub c'ac'al sjalil laj spasic ti laj yaq'uic ta ventainel ti altare. Vucub to c'ac'al jalij yu'unic xtoc ta spasel sq'uinal ti Lambil Yanal Te' Axibal Nae.

¹⁰Ta yoxibal xcha'vinic (23) c'ac'al yu'un ti yucubal (7) u une, ti ajvalile laj sc'oponan batel ti jteclume, ti mu'yucuc c'usi sna'ic suticuc ech'el ta snaique, ti muyubajicuc yu'un ta sventa ti oy c'usi lec laj spas ti Dios ta stojol ti Davide, ta stojol ti Salomone, xchi'uc ta stojol ti Israel ti ja' slumale.

¹¹C'alal c'ot lec ta tsutsel yu'un Salomón xch'ulna ti Diose, xchi'uc ti jbej na ta xc'ot ta spasob mantale, xchi'uc scotol ti c'usitic laj snop ta meltsanele,

¹²xi albat yu'un Dios ti c'alal laj yac' sba iluc ta stojol ta ac'ubaltique: “Laj ca'i ti laj ataun ta c'oponel ti'inele. Yu'un ti ch'ulna li'e, laj jt'uj ti c'ot ta yac'obil ti milbil matanaletique.

¹³Ja' yu'un un cha'e, mi ta xcal va'iuc ti c'ac'ale, mi mu xac' ti vo'e, mi ta xcalbe mantal ti c'ulubetic yo' jech ta stsutses ti c'usitic ta xch'i ta osiletique, mi ta jtac talel tsatsal chamel ta stojol ti jteclumale,

¹⁴mi ta sbic'tajes sbaic ti jteclumale, mi ta xc'opoj xti'inic ta jventa ti jteclumale, mi ta xtalic ta jtojole, mi ta sutes sbaic ti bu chopol stamojic batele, jech ti vu'une, ta vinajel to, ta xca'ibe ti sc'opique. Ta jch'aybeic ti smul scolo'ique. Ta xcha'utsibaj ti yosilic cu'une.

¹⁵Avi tana une, li' ta xlic batel ta jts'etan jni' jchiquin ta ya'yibel ti sc'opic ti ta xistaic ta c'oponel ti'inele.

¹⁶Laj jt'uj, c'otem ta jventa ti ch'ulna li'e, ta sventa jna ti mu'yuc spajeb ta xquich' tael ta na'ele. Ta jchabi un, mi ja'uc ta jch'ay ta co'nton.

¹⁷Lec un cha'e, mi jech ta xapas ta jba ta jsat jech c'u cha'al laj spas ti David ti ja' atote, ti ta xavabtelan batel ta spasel scotol ti c'usi caloje, ti ta xc'ot ta ch'unel avu'un ti oy jbel c'usitic tsots albil sc'oplale, xchi'uc ti c'usitic nopbile,

¹⁸j'ech'el ta xc'ot ta pasel cu'un ti albil ac'oplal ta xachoti ta ajvalil jech c'u cha'al laj cac' que ta stojol ti David ti ja' atote, c'alal laj calbe ya'i ti mu xch'ay ta be ti oy jun snitilul ta x'och ta ajvalil yu'un ti Israele.

¹⁹Ja'uc le' une, mi vo'oxuc ta xlic ach'ac abaic ta jtojole, mi mu xc'ot ta pasel avu'unic ti jbel c'usi tsots albil sc'oplale, xchi'uc ti mantaletic ti laj cac'boxuque, ti ja' no'ox ta xlic abic'tajes abaic ta yich'el ta muc' ti yan diosetique,

²⁰ta jtenoxuc loq'uel ta banomil ti laj cac'boxuque. Ta jch'ac jba loq'uel ta stojol ti ch'ulna ti c'otem ta jventae, ti na'lebil c'otuc cu'un ta stojolic ti muc'tiquil lume.

²¹Lilijem ta xcom ma' ti spajebal xa no'ox c'upil sba ti ch'ulna li'e. Scotolic ti buch'utic ta x'ech'ic nopole, ch'ayal ta xc'ot yo'ntonic ti ta sjac'be sbaique, ‘¿C'u cha'al jech laj spas ti Dios ta stojol ti muc' ta jteclum le' une, xchi'uc ti ch'ulnae?’

²²Ta xtac'batic ti ja' ta scoj laj xch'ac sbaic ta stojol ti Ajvalil Dios yu'unic ti smolmuc'totic ta vo'nee, ti loq'uesatic talel ta Egiptoe. Bat yo'ntonic ta yich'el ta muc' ti yan diosetique. Jech o xal tacbatic talel ta stojolic ti muc' ta vocolajele.”