Read Tzotzil 2 Crónicas 9 Bible Online

2 Crónicas 9 - Tzotzil bible

2 Crónicas 9

¹Ti me' ajvalil yu'un ti lum Sabae laj ya'ibe sc'oplal ti oy c'usi ech'em staoj ti Salomone. Bat ta Jerusalén un yo' jech ta sjac'be ti c'usi vocol ta a'yibel ti smelole. C'upil no'ox sba xtixet c'otel, xchi'uc scamellotac xcuchojan batel ti muil poxiletique, ti epal oroe, xchi'uc ti c'upil sba tonetique. C'alal c'ot ta stojol ti Salomone, lic sjaq'uilanbe scotol ti c'usi ono'ox snopoj ta sjaq'ue.

²Ti Salomone laj stac' scotol ti c'usi jac'bate. Mi ja'uc jbeluc ti mu'yuc xtac' yu'un sutel ti c'usi ta xjac'bate.

³C'alal laj yil ti me' ajvalil yu'un Saba ti ech'em sbijil ti Salomone, xchi'uc ti c'u s'elan smeltsanoj ti jbej nae,

⁴ti ve'liletic mu no'ox albajuc yepal oy ta xmexae, ti c'u s'elan oy bu yavilic ti yaj'opisialtaque, ti c'u s'elan sat yelovic xchi'uc sc'u'ic ti smosovtaque, ti c'u s'elan oy ti jbainej-bisetic xchi'uc ti sc'u'ique, xchi'uc ti c'u s'elan ta xmuyic batel ta ch'ulnae, toj ch'ayal c'ot yo'nton xchi'uc ti c'u s'elan laj yile.

⁵Xi laj yalbe ya'i ti ajvalile: “Ti c'u s'elan laj ca'i ta jteclumal ti c'usitic ta xapase, xchi'uc ti abijile, melel ono'ox ca'itic un.

⁶Le' une, ja' to laj jch'un lec ti laj quil ta jba ta jsat jtuc ti litale. Melel unbi, mi ja'uc sta o'lol yalojbeicun ca'i ti bu c'alal spajeb c'otem ti abijile, xjelav to yepal ta j'ech'el jech c'u cha'al ca'binoje.

⁷¡Xmuyubaj no'ox yo'ntonic ma' ti avajniltac le' une! ¡Mu no'ox albajuc xmuyubaj ta xa'iic ti avajtuneltac ti nabalic ta apat ta axocon ta ya'yiel c'u s'elan ta xloc' ta ave yu'un ti abijile!

⁸¡Lequil c'optabiluc ti Ajvalil Dios avu'un ti lec laj yilot ta sba ta sat ti laj yac' chotlan ta spasob mantal ti la'och ta ajvalil yu'une! ¡Ta sventa ti syail xc'uxul yo'nton ta stojol Israel ti Dios avu'une, ti sbatel osil mu xtub ti sc'oplal yu'une, jech o xal laj sva'anot ta ajvalil yu'unic yo' jech oy stuq'uil yutsil ta xachapanvan!”

⁹Ta jech yepal un, ti me' ajvalile laj yac'be jelavel ta yoc ta sc'ob ti ajvalile, cha'vinic xa no'ox kilo sc'an xc'ot ta chanmil (3,960) kilo ti oroe, xchi'uc mu albajuc yepal muil poxiletic, xchi'uc ti c'upil sba tonetique. Mu'yuc bu xc'ot o jech yepal muil poxiletic ta Israel jech c'u cha'al q'uelanbat ti ajvalil Salomón yu'un ti me' ajvalil ti liquem talel ta Sabae.

¹⁰Ja' jech ec ti viniquetic yajtuneltac ti Hirame, xchi'uc yajtuneltac ti Salomón ti laj yich'ic talel oro ti laj staic talel ta Ofire, laj yich'ic batel xtoc c'unil te'etic ti laj staique, xchi'uc ti c'upil sba tonetique.

¹¹Ti ajvalile, naca ta c'unil te'etic laj smeltsanbe xchac'te'altac ti xch'ulna Diose, xchi'uc xchac'te'altac ta sna ti bu chotol ta spas mantale, xchi'uc laj smeltsan o ta arpa, xchi'uc jtos o ta vobetic ta stunesel ti jtij-vobetique. Ta yosilal ti Judá une, mu'yuc bu xvinaj o ti va'i s'elan taje.

¹²Ta sventa ec ti ajvalil Salomone laj yac'be scotol ti c'usi laj sc'an ti me' ajvalil ti liquem talel ta Sabae, ti yac'oj xa ono'ox xtoc ti laj spacbe sutel xq'uexol c'u yepal yich'oj talel ti me' ajvalile. Ts'acal to un, sut batel ta slumal ti me' ajvalil ti chi'inbil batel yu'un ti svinictac ti c'otem ta yajtuneltaque.

¹³Ti oro ta xich'olan jujun jabil ti Salomone, jutuc xa mu ta xc'ot ta chib xcha'vinic ta mil (22,000) kilo.

¹⁴Ti patanetic ta stojic ti jbolomajeletique, ti jpaxyal jbeinajele, mu'yuc xa tsacbil ta atel une. Ma'uc no'ox taje, ta x'ich'bat talel oro xchi'uc plata ti Salomón yu'un scotol ti ajvaliletic ti oyic ta Arabiae, xchi'uc ti its'inal ajvaliletic yu'un ti jteclume.

¹⁵Ti ajvalil Salomone laj yac' ta meltsanel xtoc lajunvinic (200) ta pech muc'tic macobbail ti vots'bil ta oroe, ti yich'oj vaquib kilo oro yalal ti jujune.

¹⁶Laj yac' ta meltsanel xtoc vo'lajunvinic (300) biq'uit macobbail ti x'ech' jutuc ta oxib kilo yalal ti jujun ti pucbil oroe, ti bat yac' ta jbej na ti sbiinoj “Muc' ta te'etic yu'un Líbanoe”.

¹⁷Ta c'upil sba saquil ton xtoc, laj yac' ta meltsanel muc' ta chotlebal, ti laj yal mantal ti ac'o sbonic ta bats'i oroe.

¹⁸Ti muc' ta chotlebale, ta svac-cajal to tec'obal oy, xchi'uc oy stec'ob acanil ti meltsanbil ta oroe. Yich'oj scaj c'obal ta jujujot xocon ti chotlebale, ti cotajtic cha'cot sloc'obbail león ta sts'ele.

¹⁹Cotajtic xtoc lajcha'cot (12) loc'tabil león ta jujujot xocon ti vac-coj tec'obale. ¡Mu'yuc jech junuc pasob mantal ti xco'olaj meltsanbile!

²⁰Ma'uc no'ox taje, scotol sbistac ti ajvalile, naca ta oro meltsanbil. Jech meltsanbil xtoc ti lech-lech taq'uinetic ti oy ta sna stuc ti sbiinoj “Muc' ta te'etic yu'un Líbanoe”. Mu'yuc c'usi jtosuc meltsanbil ta plata, yu'un peq'uel stojol ti c'alal yorail tiq'uil ta ajvalil ti Salomone.

²¹Ti barcoetic yu'un ti ajvalil ti ta xbatic ta Tarsis xchi'uc yajtuneltac ti Hirame, jten ta xc'ot ta jujun to ox-ox jabil. Yich'ojic talel ti oroe, ti platae, ti c'upil sba saquil tone, ti maxetique, xchi'uc ti c'upil sba tsequetel tuluc' mutetique.

²²Ti ajvalil Salomone, stuc no'ox ti cajal c'ot sc'oplale. Ech'em ti sc'ulejale. Jelavem ti sbijile. Mu sta ti yan ajvaliletic ti oyic ta sbejel banomile.

²³Scotol ti ajvaliletic ti oy ta sjoylej banomile, juteb ta yo'ntonic sc'an ta sq'uelic ya'i, ta xchiquinta ya'i c'u s'elan sbijil ac'bil ti Salomón yu'un ti Diose.

²⁴Scotolic, xi s'elan jujun jabil ta xich'beic ech'el ti smotone: ti c'usitic meltsanbil ta platae, ti ta oroe, ti mochibal c'u'ile, ti pojobbail abtejebale, ti juch'bil muil poxile, ti ca'etique, xchi'uc ti mulaetique.

²⁵Ti Salomone oy yu'un chanmil (4,000) nail ca'etic ta stunes ta sventa ti sca'taque, xchi'uc ti scarretataque. Oy yu'un lajcha'mil (12,000) jcajlejetic ta ca' ti yac'ojbe sbain ta xchabiel snailtac carreta yu'un ti ac'ob-letoe, xchi'uc jchabivanej yu'un stuc ti bu ta spas mantal ta Jerusalene.

²⁶Ti Salomone, c'otem ta banquilal ajvalil yu'unic scotol ti ajvaliletic ta xlic ta yosilal uc'um Eufratese, ti xjelav to ech'el ta slumal ti filisteoetique, ti ta xc'ot c'alal sti'il yosil ti Egiptoe.

²⁷Ti ta Jerusalene, c'ot ta pasel yu'un ti ajvalile ti co'ol s'elan ton busuluc no'ox ti platae, ti co'ol s'elan te'tical icux ti ch'ut te' ta stenlejale.

²⁸Ti ca'etic ta stunes ti Salomone, c'alal to Muzri ta xiq'uic talel, xchi'uc ta xic' talel xtoc ti ta yan muc'tiquil lumetique.

²⁹Ti sliqueb ya'yejal sc'oplale, xchi'uc ti slajeb ya'yejal sc'oplal ti Salomone, ts'ibabil com ta slo'il ya'yej ti j'alc'op Natane, ti c'usi laj scaj'al ti Ahías ti liquem talel ta Siloe, xchi'uc ti c'usitic ac'bat yil ti j'alc'op Iddo sc'oplal ti Jeroboam xnich'on ti Nabate.

³⁰Ti Salomone, cha'vinic (40) jabil tun ta ajvalilal ta stojol scotol slumal ti Israel ta Jerusalene.

³¹C'alal chame, bat smuquic ta smuquinal stot ti sbiinoj Steclumal Davide. Va'i un, och ta xq'uexol ta ajvalilal ti Roboam ti ja' xnich'one.