Read Tzotzil Esdras 10 Bible Online

Esdras 10 - Tzotzil bible

Esdras 10

¹C'alal yacal ta c'opojel ti'inel ti Esdras ta xcholel jelavel ti c'ope, x'oc' x'avan xa ti quejel ta xch'ulna ti Diose, laj svol sbaic talel epal israel viniquetic, antsetic, xchi'uc ololetic ti x'oc' x'avanic xa joyol ta stojole.

²Va'i un, ti Secanías xnich'on ti Jehiele, snitilul ti Elame, lic c'opojuc ti xi laj yalbe ti Esdrase: “Ti vu'uncutique mu'yuc jtuq'uil jmelolcutic ta sba ta sat ti Dios cu'untique, ja' ti laj quic'cutic ti jyanlum antsetic ti yan c'u s'elan cuxulic ta xch'unel ta slumalique. Manchuc mi jech un, oy to c'usi stac' spas ti Israele.

³Ta xcal que jti'cutic ti xu' ta jlequil-taccutic loq'uel xchi'uc yalabic ti jyanlum antsetic ti quic'ojcutique. C'otuc ta pasel ti c'usi oy jbel tsots albil jech c'u cha'al ta xaval ta stojol ti buch'utic sna' xich' ta muc' smantaltac ti Dios ti ja' ta xisbijubtasotique.

⁴Va'ano aba, yu'un oy ta aventa ta spasel taje. Jech ti vu'uncutique ta jtic' quecutic ta acoltael. Tsotsan, liqueso ach'a ta spasel taje.”

⁵Va'i un ti Esdrase lic sva'an sba ta yalbel ya'i ti banquilaletic yu'un ti paleetique, ti levitaetique, xchi'uc scotol ti israeletique, mi xac' yeic yu'un taje. Jech ti stuquique laj yac' ti ye sti'ique.

⁶Laj taj une, ti Esdrase loc' batel ta xch'ulna ti Diose. Bat ta jc'ol na ti bu oy Johanán xnich'on ti Eliasibe. Mu'yuc c'usi laj sve' laj yuch' ech' yu'un ti ac'ubale, ja' ti mu x'ech' xjelav ta xa'i ti at-o'nton ta scoj ti yanijemic ti buch'utic sutic talel ti bec'bil to ox loc' ta slumalique.

⁷Ts'acal to un, laj yich'ic albel scotolic ti oyic ta Judae, xchi'uc ti oyic ta Jerusalene yo' jech xba stsob sba scotolic ta Jerusalén ti c'u yepal sutic talel ti bec'bil to ox loq'uique.

⁸Ti c'u s'elan c'ot ta nopel yu'unic ti banquilaletique, xchi'uc ti jbijubtasvanejetique, ti mu'yuc buch'u ta xc'ot ta yoxibal c'ac'al ti c'u yepal bec'bil to ox loq'uique, ta xich' jelbel yajval ti sbanomile. Ta xich' loq'uesel batel ta stojol ti xchi'iltac ti jmoj sutic talel ti bec'bil to ox loq'uique.

⁹Ja' yu'un un, scotol ti viniquetic yu'un ti Judae, xchi'uc ti Benjamine, laj stsob sbaic ta Jerusalén ta jtob (20) c'ac'al yu'un ti sbalunebal (9) ue, ti xcaltique, ja' ti bu ta xc'ot ta tsutsel ti oxib c'ac'al albile. Scotolic taje, chotiic ta yamaq'uil xch'ulna ti Diose. Xniclajetic ta xi'el ta scoj ti va'i s'elan taje, xchi'uc ti ja' o xchajet ti vo'e.

¹⁰Va'i un, ti pale Esdrase laj sva'an sba ti xi laj yale: —Ti vo'oxuque ataoj xa amulic ta scoj ti laj aviq'uic ti jyanlum antsetique. Epaj xa avu'unic ti mulil li' ta Israele.

¹¹Ja' yu'un un, ta sba ta satuc ti Ajvalil Dios yu'un ti atot ame'ic ta vo'nee, na'o abaic lec ti oy amulique. C'otuc ta pasel avu'unic ti c'usi oy ta yo'nton ti Diose. Mu xaco'oltas avo'ntonic xchi'uc ti jnaclejetic ti yan c'u s'elan cuxulique, xchi'uc ti jyanlum antsetic ti oy ta atojolique.

¹²Va'i un, ti jteclume xi tsots lic tac'avicuque: “Lec oy un cha'e, ta jpascutic scotol ti c'u s'elan ta xavalbuncutique.

¹³Ja' no'ox un, toj epuncutic. Mu x'ech' ti vo'e. Ja' jech xtoc mu xu' ti li' oyuncutic o ta osiltique. Yu'un ti va'i s'elan ti c'op taje, ma'uc no'ox jun chib c'ac'al ta chapanel. Toj epuncutic ti jsa'oj ti jmulcutique.

¹⁴Ja' lec ti ja' no'ox comicuc ti banquilaletic ta jventacutique. Scotol ti buch'utic jmoj nacaluncutic xchi'uc ta jujun jteclumalcutic ti yic'ojic ti jyanlum antsetique, ac'o talicuc ti c'usi ora sc'ac'alil ta xc'ot ta chapanel avu'unique. Jech xtoc chi'inbil ta xtalic yu'un ti j'abteletique, xchi'uc ti jchapanvanejetic yu'un ti jteclume, ja' to ti c'uxi xlaet yo'nton ta xa'i ti Dios ti ta sloq'ues batel ta jtojolcutic ti tsots ilinem yu'un ti va'i s'elan c'ot ta pasele.”

¹⁵Scotol ti c'u yepal sutic talel ti bec'bil to ox loq'uique, c'ot ta yo'ntonic ti jech sc'an xich' pasele. Ti Jonatán xnich'on ti Asaele, xchi'uc ti Jahazías xnich'on ti Ticvae, mu lecuc laj ya'iic. Laj scooltas sjolic xchi'uc ti Mesulame, ti Sabetai ti ja'ic levitaetique. Va'i un ti pale Esdrase lic st'uj ta yac'bel yabtel jun chib viniquetic ti c'otemic ta banquilaletic yu'un jujuchop ti snitilultac ta stuque. Ti ta sliqueb c'ac'al yu'un ti slajunebal (10) ue, scotol ti buch'utic va'anbilique, lic svol sbaic ta chapanobbail c'usi ta utel ti jujutos a'yej taje.

¹⁷Ta sba c'ac'al yu'un ti sliqueb ue, tsuts yu'unic ta xchapanel sc'oplal scotol ti viniquetic buch'utic yic'ojic ti jyanlum antsetique.

¹⁸Ti paleetic ti laj staic ta t'unel ti yic'oj ti jyanlum antsetique, xi yepalique: Ta sventa snitilultac ti Josué xnich'on ti Josadaque, xchi'uc ti yuts' yalaltaque, xi s'elan oye: ti Maaseíase, ti Eliezere, ti Jaribe, ti Gedalíase.

¹⁹Taje, laj yalic ta jamal ti ta slequil-taquic batel ti yajnilique. Laj yaq'uic jcot chij ta sventa matanal ta scoj ti smulique.

²⁰Ta sventa snitilultac ti Imere, xi s'elan oye: ti Hananie, xchi'uc ti Zebadíase.

²¹Ta sventa snitilultac ti Harime, xi s'elan oye: ti Maaseíase, ti Elíase, ti Semaíase, ti Jehiele, xchi'uc ti Uzíase.

²²Ta sventa snitilultac ti Pasure, xi s'elan oye: ti Elioenaie, ti Maaseíase, ti Ismaele, ti Natanaele, ti Jozabade, xchi'uc ti Elasae.

²³Ta sventa snitilultac ti levitaetique, xi s'elan oye: ti Jozabade, ti Simeie, ti Kelaíase (ti xcaltique, ja' ti Kelitae), ti Pataíase, ti Judae, xchi'uc ti Eliezere.

²⁴Ta sventa snitilultac ti jq'uejimoletique, xi s'elan oye: ti Eliasibe. Ta sventa snitilultac ti jchabiej-ti'naetique, xi s'elan oye: ti Salume, ti Teleme, xchi'uc ti Urie.

²⁵Ti yan israeletic ti jech s'elan spasojic eque, xi s'elane: Ja'ic snitilultac ti Paros ti xi s'elan oye: ti Ramíase, ti Jezíase, ti Malquíase, ti Mijamine, ti Eleazare, ti Malquíase, xchi'uc ti Benaíase.

²⁶Ta sventa snitilultac ti Elame, xi s'elan oye: ti Mataníase, ti Zacaríase, ti Jehiele, ti Abdie. ti Jeremote, xchi'uc ti Elíase.

²⁷Ta sventa snitilultac ti Zatue, xi s'elan oye: ti Elioenaie, ti Eliasibe, ti Mataníase, ti Jeremote, ti Zabade, xchi'uc ti Azizae.

²⁸Ta sventa snitilultac ti Bebaie, xi s'elan oye: ti Johanane, ti Hananíase, ti Zabaie, xchi'uc ti Atlaie.

²⁹Ta sventa snitilultac ti Banie, xi s'elan oye: ti Mesulame, ti Maluque, ti Adaíase, ti Jasube, ti Seale, xchi'uc ti Ramote.

³⁰Ta sventa snitilultac ti Pahat-moabe, xi s'elan oye: ti Adnae, ti Quelale, ti Benaíae, ti Maaseíase, ti Mataníase, ti Bezaleele, ti Binuye, xchi'uc ti Manasese.

³¹Ta sventa snitilultac ti Harime, xi s'elan oye: ti Eliezere, ti Isíase, ti Malquíase, ti Semaíase, ti Simeone, ti Benjamine, ti Maluque, xchi'uc ti Semaríase.

³³Ta sventa snitilultac ti Hasume, xi s'elan oye: ti Matenaie. ti Matatae, ti Zabade. ti Elifélete, ti Jeremaie. ti Manasese, xchi'uc ti Simeie.

³⁴Ta sventa snitilultac ti Banie, xi s'elan oye: ti Madaie, ti Amrame, ti Uele, ti Benaíase, ti Bedíase, ti Queluhue, ti Vaníase, ti Meremote, ti Eliasibe, ti Mataníase, ti Matenaie, xchi'uc ti Jaasaie.

³⁸Ta sventa snitilultac ti Binuye, xi s'elan oye: ti Simeie, ti Selemíase, ti Natane, ti Adaíase, ti Macnadbaie, ti Sasaie, ti Saraie, ti Azarele, ti Selemíase, ti Semaríase, ti Salume, ti Amaríase, xchi'uc ti Josee.

⁴³Ta sventa snitilultac ti Neboe, xi s'elan oye: ti Jeiele, ti Matatíase, ti Zabade, ti Zebinae, ti Jadaue, ti Joele, xchi'uc ti Benaíase.

⁴⁴Scotolic taje, ja'ic ti laj yiq'uic ti jyanlum antsetique, ti c'ot ta pasel laj slequil-taquic loq'uel xchi'uc ti yalabique.