Read Tzotzil Esdras 4 Bible Online

Esdras 4 - Tzotzil bible

Esdras 4

¹C'alal vinaj ti sutic talel ti bec'bil to ox loc' ta slumalique, xchi'uc liquem xa yu'unic xcha'meltsanel xch'ulna ti Ajvalil Dios yu'un ti Israele, ti yajcontratac ti Judae xchi'uc ti Benjamine,

²xi c'ot yalic une c'alal bat sc'oponic ti Zorobabele, ti Josuee, xchi'uc ti banquilaletic yu'un ti jujuchope: —Ac'o ave ati'ic ti xu' ta jtic' jbacutic ta scoltaeloxuc ta abtel. Yu'un ti vu'uncutic jech c'u cha'al ti vo'oxuque, nabaluncutic ta yich'el ta muc' ti Diose. Laj ono'ox cac'becutic milbil matanal c'alal yorail tiq'uil ta ajvalilal ti Esarhadone, ajvalil yu'un ti Asiriae, ti laj yic'uncutic talel li' to c'alale.

³Ja'uc ti Zorobabel une, ti Josuee, xchi'uc ti yan banquilaletic yu'un ti jujuchop israeletique, xi laj staq'uique: —Mu xu' ma' ti jmoj ta jchi'in jbatic ta xcha'meltsanel xch'ulna ti Dios cu'uncutique. Tsots sc'oplal ti jtuccutic ta jcha'meltsancutic sventa ta xtun yu'un ti Ajvalil Dios yu'un ti Israele. Jech albiluncutic mantal yu'un Ciro ajvalil yu'un ti Persiae.

⁴Va'i ti jnaclejetic taj une lic xchibajesbeic yo'ntonic svinquileltac ti Judae, ti mu xa xac'beic stsutses ti abtele.

⁵Ma'uc no'ox taje, laj svosesbeic yo'nton ta mich'ob c'abal jun chibuc yajtuneltac ti ajvalile. Lic soquesbeic sc'oplal ti abtel ti staoj yav yo'ntonic c'u sjalil tiq'uil ta ajvalil ta Persia ti Ciroe, ti c'alal och ta ajvalil yu'un Persia ti Daríoe.

⁶Ti jsa'-c'opetique lic sva'an sbaic ta stic'bel smul ti jnaclejetic yu'un Judá xchi'uc Jerusalén ta sliquebal yochel ta ajvalil ti Asueroe.

⁷Ta yorail ti tiq'uil ta ajvalilal yu'un Persia ti Artajerjese, jech ti Bislame, ti Mitridatese, ti Tabeele, xchi'uc ti yan xchi'iltaque, lic sts'ibabeic batel jlic vun ti Artajerjese. Ti vune, ts'ibabil ta arameo c'op ti sbejleb bejleb jelubtasbil ti c'usi ta xale.

⁸Ti banquilal jpas-mantal soldado Rehume, xchi'uc ti jts'ibajom Simsaie, laj sts'ibaic batel jlic vun ta stojol ti ajvalil Artajerjes ta sventa scontrainel ti yajval lum Jerusalene.

⁹Jmoj sjolic xchi'uc ti Rehume, ti jchapanvanejetic ti ja' xchi'il sbaic ta abtele, ti its'inal ajvaliletique. ti j'opisialetique, xchi'uc ti yajval lumetic ta Persiae, ti ta Ereque, ti ta Babiloniae, xchi'uc ti ta Susae,

¹⁰xchi'uc jlom yajval lumetic ti tsobbil talel yu'un ti Anaspar ti jelavem ich'bil ta muq'ue, ti laj yac' naquiicuc ta jteclumetic yu'un ti Samariae, xchi'uc ta osiltic ti oy ta smaleb c'ac'al yu'un ta jot uc'um Eufratese.

¹¹Xi ta xal sloc'ol vun ti laj staquic batele: “Ajvalil Artajerjes, chabanucot xayalbe ti avajtuneltac ti nacalic ta jot sti'il uc'um Eufratese.

¹²Ta xcac'cutic ana', Jcuch abtel, ti ta ave ati', Jcuch abtel, talic ta Jerusalén ti judíoetic ti vul ta jtojolcutique. Yacalic xa ta xcha'va'anic ti j'ac'-vocol toyobba jteclume. Lic xa sliquesel ta smeltsanel ti smocale. Lic xa ta yabtelanel ti sliqueb yoctaque.

¹³Ta xcac'cutic ana' xtoc, Jcuch abtel, mi q'uelbil no'ox ta xich' cha'meltsanel ti jteclume, ta sva'anel muyel ti smocale, ti jnaclejetic une, mu stojic liquel ti c'usitic sc'an tojele, ti patanetique, ti c'usitic yan tsots sc'oplal ta xich' tojele. Ta xlaj sc'oplal ma' ti oy no'ox staq'uin ti ajvalil une.

¹⁴Ti avajtuneluncutic une, Jcuch abtel, ma'uc oy ta jolcutic ta jsoquescutic avo'nton yu'un taje, Jcuch abtel. Jech o xal un, Jcuch abtel, laj jtaccutic talel ta yaq'uel ana',

¹⁵yo' jech ac'o licuc yich' chajel ta q'uelel avu'un ta sq'uejobil vunetic ti c'u s'elan albil comel yu'unic ti amolmuc'totac laj ech'icuc ta vo'nee, Jcuch Abtel. Va'i unbi, Jcuch Abtel, ta xlic ana' un, ti ja' jun toyobba jteclume, xchi'uc toj xi'bal sba ti ajvaliletic yu'un ti jujun lum ti c'u yepal smacoje. ta xana' xtoc un, ti tsob xa no'ox yajval yu'unic ti c'ot ta lilijel ti jteclum ta vo'nee.

¹⁶Ti jech le' une, ta xcac'cutic ana', Jcuch abtel, mi ta xlic xcha'meltsanic ti jteclume, mi q'uelbil no'ox ta stsutsesique, mi ta xc'ot ta tsutsel ti smocale, ch'ay to sc'oplal unbi, Jcuch abtel, ta sventainel ti jnaclejetic ti oyic ta yosilal uc'um Eufrates ta yelov smaleb c'ac'ale.”

¹⁷Va'i ti ajvalil Artajerjes une xi xcholet laj stac sutel ti stac'obil yu'une: “Banquilal soldado Rehum, jts'ibajom Simsai, xchi'uc achi'iltac ta abtel ti oyic ta Samariae, ti oyic ta yeloval smaleb c'ac'al yu'un ti uc'um Eufratese, xi ich'ic chabanuque:

¹⁸Ta sventa ti vun ti laj ataquic talel ti jelubtasbil ta jc'op laj yich' avtael ta jtojole,

¹⁹laj cal mantal ti yich'uc t'unel lec ti sc'oplale. Vinaj ti jech ono'ox laj yich' tabel sc'oplal ti jteclume, ti laj svol sbaic ta scontrainel ti ajvaliletique, ti xvoletic no'ox ta sa'el c'op ta contrainvaneje.

²⁰C'ot ta pasel ta Jerusalén ti laj ech'uc ajvaliletic ti mu tsalbajuc ta c'ope, ti cuch yu'unic ta yu'ninel yosilalic ti jnaclejetic ti oy ta yosilal uc'um Eufrates ta yelov smaleb c'ac'ale. Laj sc'anbeic ti c'usi sc'an tojele, ti patanetique, ti c'usitic tsots sc'oplal sc'an tojele.

²¹Le' une, albo ya'i mantal ti avinictaque ti spajesicuc ti abtele. Ja' to mi laj cac' que ta ts'acal to ti vu'une, pajuc yabtelanel ta xcha'meltsanel ti jteclume.

²²Mu asaticuc no'ox aq'uelojic taje yo' jech mu x'epaj sc'oplal ta soquesel ti bu c'alal jmacoj ta sventainele.”

²³C'alal laj yich' avtael vun ti stacoj batel ti ajvalil Artajerjes ta stojol ti Rehume, ti jts'ibajom Simsaie, xchi'uc ti xchi'ilic ta abtele, scotolic ta ora no'ox batic ta Jerusalén ta stsatsal pajesel ti judioetique, yo' jech ta xquechi ti abtel liquem yu'unique.

²⁴Ti jech taj une, quechel o c'ot ta xcha'meltsanel xch'ulna Dios ta Jerusalén c'alal to xchibal xa jabil yochel ta ajvalilal ti Darío ta Persiae.