Read Tzotzil Esdras 5 Bible Online

Esdras 5 - Tzotzil bible

Esdras 5

¹Ti j'alc'opetic Hageoe, xchi'uc ti Zacarías xnich'on ti Idoe, laj xchapbeic ya'i ti jnaclejetic ta Judae, xchi'uc ti ta Jerusalene ti c'u s'elan tacbatic talel mantal yu'un ti Ajvalil Dios yu'un ti Israele.

²Va'i un, ti Zorobabel xnich'on ti Salatiele, xchi'uc ti Josué xnich'on ti Josadaque, liquic ta abtel ta xcha'meltsanel ti xch'ulna Dios ta Jerusalene. Oy ta stojolic ti yaj'alc'optac Dios yo' ta xcoltavanique.

³Ja'uc le' une, ti Tatnai ajvalil yu'un yosilal ti uc'um Eufrates ti oy ta smaleb c'ac'ale, xchi'uc ti Setar-boznaie, xchi'uc ti xchi'ilic ta abtele, xi bat yalic ya'i ti j'abteletique: “¿Buch'u laj yac' ye sti' ya'yel le' une ti lic xa avu'unic ta xcha'meltsanel ti ch'ulnae, ti lamal xa avu'unic ti ste'eltaque?

⁴Xi laj sjaq'uic xtoque: ¿C'usi sbiic ti jpas-mantaletic ta stsutsesel ti abtel le'e?”

⁵Manchuc mi jech un, ta sventa ti chabibilic yu'un Dios ti jventainej abtel judioetique, mu'yuc xquechi comel abtel yu'unique, ja' ti mu to ya'yiojicuc c'usi ta xtac'batic yu'un ti Daríoe mi laj xchapbeic lec ya'i xchi'uque.

⁶Ti li'e, ja' sloc'ol ti vun laj smeltsan ti Tatnai ajvalil yu'un yosilal ti uc'um Eufrates ti oy ta yelov smaleb c'ac'ale, xchi'uc ti Setar-boznaie, xchi'uc ti xchi'iltac ta abtele, xchi'uc ti yaj'opisialtac ajvalil ti oyic ta yelov smaleb c'ac'al yu'un ti Eufratese, ti laj staquic batel ta stojol ti ajvalil Daríoe.

⁷Xi ta xal ma' ti vun taj une: “Chabanucot cu'uncutic ti jech lec co'ol mu'yuc c'usi jna'tique, Jcuch abtel.

⁸Ta jchapcutic ava'i ti c'u s'elan li'aycutic talel ta xanobal ta yosilal ti Judae. Ti ch'ulna yu'un ti muc'ul Diose, laj quilcutic ti jutuc xa sc'an stsutse, ti naca ta anbil muc'tiquil ton yich'oj va'anele. Avie, yacal xa ta xcha'lamtaic ta tenel-te' ti spac'baliltaque. Ochem yipal yu'unic ti abtele, ti jliquel no'ox ta stsuts batel yu'unique.

⁹“Laj jac'becutic ti jva'lej judioetique, buch'u laj yac' ye sti' ti jech lic xa yich' cha'va'anel ti ch'ulnae, xchi'uc ti laj xa xcha'lamtaic ta tenel-te'e.

¹⁰Laj jac'becutic xtoc c'usi sbiic ti buch'utic ta spasic mantale yo' jech ta jna'cutic ti xu' ta jchapcutic ava'ie, Jcuch abtel.

¹¹“Ti stuquic une, c'ajomal laj stac'buncutic ti ja' la ta xich'ic ta muc' ti Dios yu'un ti vinajel banomile, ti ja' la ta xcha'meltsanic ti ch'ulna ti lec meltsajem to ox com yu'un jun muc'ul ajvalil ti ech' ta Israel ta vo'nee.

¹²Laj yal ca'icutic xtoc, ti smolmuc'totic ta vo'nee, laj la soquesbeic yo'nton ti Dios yu'un ti vinajele, ti ja' la stuc laj yac'be ta yoc ta sc'ob ti ajvalil Nabucodonosor ti ja' jun caldeo ti oy ta Babiloniae, ti ja' laj slilin ti ch'ulna taje, ti bec'van batel c'alal to Babiloniae.

¹³Ta sjalil xa la un, ti c'alal sliqueb jabil yochel ta ajvalilal ti Ciro ta Babiloniae, laj la yal mantal ti yich'uc cha'meltsanel xch'ulna ti Diose.

¹⁴“Laj yalbuncutic xtoc, ti ajvalil Ciroe laj la sloq'ues talel ta ch'ulna yu'un Babilonia ti c'usitic jtuneletic ti meltsanbil ta oroe, ti ta platae, ti ja' laj stsob loq'uel ti Nabucodonosor ti oy to ox ta xch'ulna Dios ta Jerusalene, ti bat la stic' ta ch'ulna ti oy ta Babiloniae. Taje, ac'bat la ta sc'ob ti Sesbasar ti va'anbil ta its'inal ajvalile.

¹⁵Ti Sesbasare, albat mantal yu'un ti Ciroe, ti ac'o stsob scotol ti c'usitic jtunel meltsanbile, ti ac'o la yich' cha'sutesel ta ch'ulna ta Jerusalene, ti ac'o la yich' cha'va'anel xch'ulna ti Dios ti bu ono'ox ti yavile.

¹⁶Taj une, ja' o lic c'alal c'ot ti Sesbasare, lic la ta sva'anel xch'ulna Dios ta Jerusalén. Lic o la talel ti abtel yu'unique, ti mu'yuc tsutsem yu'unic une.

¹⁷“Ti xac'uc ajol cu'uncutique, Jcuch abtel, xloc' venta ti yich'uc chajel lec quic ta t'unel ta sq'uejleb vunetic yu'un ti ajvaliletic ta Babiloniae. Ta xvinaj mi yac'oj mantal ti ajvalil Ciro ti lic xcha'meltsanel ti xch'ulna Dios ta Jerusalene. Ti va'i s'elan taj une, Jcuch abtel, xavac' jna'cutic ca'tic ta ts'acal.”