Read Tzotzil Nehemías 3 Bible Online

Nehemías 3 - Tzotzil bible

Nehemías 3

¹Va'i un, ti banquilal pale Eliasibe xchi'uc ti xchi'iltac ta paleale, lic xcha'meltsanic ti ti'na sbiinoj ochebal yu'un ti Chijetique. Lic yac'beic muc'tiquil anbil te' sventa sts'amte'al. Laj xchotanbe sti'nailtaque. Laj sva'anic ti moc ti xlic ta toyol luchlebal ti sbiinoj Vo'vinique, ti c'ot c'alal to toyol luchlebal yu'un ti Hananele.

²Smocal ti xjelav batele, laj sva'anic ti viniquetic ti liquemic talel ta Jericoe. Ti xjelav batele, laj smeltsan ti Zacur xnich'on ti Imrie.

³Snitilultac ti Sanaae laj xcha'meltsanic ti ti'na ti sbiinoj Choyetique. Laj yac'beic muc'tiquil anbil ts'amte'. Laj xchotanbeic sti'nailtac syavialtac, xchi'uc sc'atlomte'altac.

⁴Smocal ti xjelav batele, laj xcha'meltsan xchi'uc laj yac'be lec yip ti Meremot xnich'on ti Urías smom ti Cose. Ti xjelav batele, laj smeltsan ti Mesulam xnich'on ti Berequías smom ti Mesezabele. Ti jtuch' xjelav batele, laj stuq'uibtas ti Sadoc xnich'on ti Baanae.

⁵Ti c'usitic laj yich' jeltael xjelav batele, laj smeltsanic ti buch'utic liquemic talel ta Tecoae, ac'o mi mu'yuc xc'ot ta yo'ntonic ti banquilaletic yu'un ta stic' sbaic ta scoltael ti jtojobtasvanejetic yu'une.

⁶Ti Joiada xnich'on ti Paseahe, xchi'uc ti Mesulam xnich'on ti Besodiase, lic smeltsanic ti ti'naetic ti Jesana sbie. Laj yac'beic muc'tiquil anbiquil ts'am-te'etic. Laj xchotanbeic sti'nailtac, syavialtac xchi'uc sc'atlomte'altac.

⁷Ti jtuch' moc xjelav batele, laj smeltsanic ti Melatías ti liquem talel ta Gabaone, ti Jadón ti liquem talel ta Meronote, ti jnaclejetic liquem talel ti Gabaone, xchi'uc ti Mispae, ti bu pasbilic ta mantal yu'un ajvalil ti oyic ta smaleb c'ac'al yu'un uc'um Eufratese.

⁸Ti jtuch' moc xjelav batele, laj smeltsanic ti Uziel xnich'on ti Harhaías ti xtojob ta yabtelanel ti platae. Ti xjelav batele, laj smeltsan ti Hananías ti jmeltsanej muil poxile. Laj stuq'uibtasic ta smeltsanel xchibalic smocal ti Jerusalén ti c'ot yu'unic c'alal to ti bu ta xlic sjamalil ti moque.

⁹Ti jtuch' xjelav batele, laj smeltsan ti Refaías xnich'on ti Ure, ti alcalte ti buch'u yich'oj ta sventa o'lol jvoc' yosilal ti Jerusalene.

¹⁰Ti jtuch' xjelav batele, laj smeltsan ti Jedaías xnich'on ti Harumafe, ti oy ta yeloval sti' sna stuque. Ti xjelav batele, laj smeltsan ti Hatús xnich'on ti Hasabniase.

¹¹Ti Malquías xnich'on ti Harime, xchi'uc ti Hasub xnich'on ti Pahat-moabe, laj smeltsanic ti jtuch' xjelav batele, xchi'uc laj smeltsanic ti luchlebal sbiinoj Hornose.

¹²Ti xjelav batele, laj smeltsanic xchi'uc yantsiquil nich'nab ti alcalte Salum xnich'on ti Halohese. Ti Salum taje sbainoj o'lol jvoc' yosilal ti Jerusalene.

¹³Ti Hanún xchi'uc ti jnaclejetic ta Zanoae laj smeltsanic ti ti'na ti sbiinoj Stenleje. Lec laj sta yav yu'unic. Laj xchotanbeic sti'taque, ti syavialtaque, xchi'uc ti sc'atlomte'altaque. Laj stuq'uibtasic ta smeltsanel o'lol yo'obal ciento (450) ta metro ti moc ti c'ot c'alal to ti'na yu'un ti Ch'ayob C'a'epe.

¹⁴Ti Malquías xnich'on ti Recabe, ajvalil ta yosilal ti Bet-haquereme, laj stuq'uibtas ta smeltsanel ti ti'na ti Ch'ayob C'a'ep sbie. Laj sta lec yav yu'un. Laj xchotanbe sti'tac, syavialtac, xchi'uc sc'atlomte'altac.

¹⁵Ti Salum xnich'on ti Colhozee, ajvalil yu'un yosilal ti Mispae, xi s'elan laj stuq'uibtas ta smeltsanel ti ti'na sbi Sat Vo'e: Laj sta lec yav yu'un. Laj yac'be yaxib. Laj xchotanbe sti'tac xchi'uc syavialtac, sc'atlomte'altac. Laj stuq'uibtas ta smeltsanel moc yu'un ti sts'anleb vo' Siloe, ti oy ta yut Ts'unubal Nichimtic yu'un ti ajvalil ti c'ot c'alal to ta scojol-cojol tec'obal ti ta xyal batel ta Steclumal ti Davide.

¹⁶Ti Nehemías xnich'on ti Azbuque, ajvalil yu'un o'lol jvoc' yosilal ti Bet-sure, laj stuq'uibtas ta smeltsanel ti jtuch' moc xjelav batele, ti ech' batel ta yelov smucobbail ti Davide, ti ech' batel ti bu nopol sts'anleb vo' ti c'ot c'alal to bu snailic ti soldadoetique.

¹⁷Ti xjelav batele, xi s'elan laj stuq'uibtasic ta smeltsanel ti levitaetique: ti Rehum xnich'on ti Banie, ti xjelav batele, laj smeltsan ti Hasabías ajvalil yu'un o'lol jvoc' yosilal ti Keílae, ti laj sloc'ta ta abtel ti steclumale.

¹⁸Ti jtuch' xjelav batele, xi s'elan laj stuq'uibtas ta smeltsanel xchi'il ta abtel ti ajvalilale: ti Bavai xnich'on ti Henadade, ajvalil yu'un ti o'lol jvoc' yosilal ti Keilae.

¹⁹Ti Ezer xnich'on ti Josuee, ajvalil yu'un ti Mizpae, laj stuq'uibtas ta smeltsanel jtuch' moc ta stuq'uil ti bu ta xmuy batel sbelel sq'uejobil abtejebal ti oy ta chiquin nae.

²⁰Lic stam ech'el ec ta smeltsanel ti Baruc xnich'on ti Zabaie, ti c'ot yu'un ta xuc'ave xchi'uc ta sti' sna ti Eliasib ti banquilal palee.

²¹Ti Meremot xnich'on ti Urías smom ti Cose, laj stuq'uibtas ta smeltsanel jtuch' ti lic ech'el ta sts'el sti' sna ti Eliasibe, ti c'ot c'alal to xuc'av nae.

²²Ti jtuch' moc xjelav batele, laj stuq'uibtasic ta smeltsanel ti paleetic nacalic ta stenlej yu'un ti Jordane.

²³Ti moc xjelav batele, laj stuq'uibtasic ta smeltsanic ec ti Benjamine, xchi'uc ti Hasube, ti c'ot ta yelov ti snae. Ts'acal to un, lic stam ta smeltsanel ec ti Azarías xnich'on ti Maaseiase, smom ti Ananiase, ti c'ot ta sts'el sna yu'une.

²⁴Ti jtuch' xjelav batele, laj stuq'uibtasic ta smeltsanel ti Binuy xnich'on ti Henadade, ti lic batel ta sts'el sna ti Azariase, ti c'ot yu'un c'alal to stsetselul xchiquin moque.

²⁵Lic stam ech'el ta smeltsanel ec ti Palal xnich'on ti Uzaie, ti jelavel ta xuc'ave xchi'uc ti toyol luchlebal ti bu liquem batel sna ti ajvalil ti oy ta yamaq'uil ti bu svoleb ti soldadoetique. Ti jtuch' xjelav batele, lic stuq'uibtas ta smeltsanel ti Pedaías xnich'on ti Parose,

²⁶ti c'ot yu'un c'alal to ti'na yu'un Vo' ti sq'ueloj batel stuq'uil sloq'ueb c'ac'ale, jech c'u cha'al bu oy ti natil luchlebal ti x'ech' to staileje. (Yu'un ti buch'utic nacalic ta Ofele, jtuneletic yu'un ti ch'ulna ti cuch to yu'unic spojel sbaique.)

²⁷Ti jnaclejetic yu'un Tecoae lic stuq'uibtasic ta smeltsanel ti jtuch' xjelav batele, ti lic ech'el yu'unic ta yeloval toyol luchlebale, ti c'ot ta loq'uel ta moc yu'un ti Ofele.

²⁸Ti paleetique, ta jujun tal, lic stuq'uibtasic ta smeltsanel ti moc ti oy ta yeloval snaique, ti c'ot yu'unic c'alal ti bu ti'na yu'un sloq'ueb ti Ca'etique.

²⁹Ti xjelav batele, laj stuq'uibtasic ta smeltsanel ti Sadoc xnich'on ti Imere, ti moc ti oy ta yelov snaique. Ti jtuch' xjelav batele, laj stuq'uibtas ta smeltsanel ec ti Semaías xnich'on ti Secaniase, ti jchabiej ti'na ti oy ta yelov sloq'ueb c'ac'ale.

³⁰Nabal ech'el ec ti Hananías xnich'on ti Selemiase ta smeltsanel ti jtuch'e, xchi'uc ti Hanun svaquibal xnich'on ti Salafe. Lic stam ech'el ec ta smeltsanel ti Mesulam xnich'on ti Berequiase, ti oy ta yeloval snae.

³¹Ti Malquías ti naca ta plata sna' x'abteje, lic stuq'uibtas ta smeltsanel jtuch' moc ti c'ot yu'un ta yeloval sna ti jtuneletic yu'un ti ch'ulnae, ti bu ta svol sbaic ti jbolomajeletique, ta yelov ti'na q'uelbil leque, ti c'ot yu'un ta svolebic ti jq'uel-osiletic ti oy ta xuc'ave.

³²Ti j'abtelanej plata taq'uine, xchi'uc ti jbolomajeletique, laj stuq'uibtasic ta smeltsanel jtuch' ti lic batel ta svolebic ti jq'uel-osiletic ti oy ta xuc'av nae, ti c'ot snup sba yu'unic ta ochebal ti'na yu'un ti Chijetique.