Read Tzotzil Nehemías 8 Bible Online

Nehemías 8 - Tzotzil bible

Nehemías 8

¹Va'i un, xvoletic no'ox batel ba stsob sbaic scotol ti jteclum ta jamal amac' ti oy ta yeloval ti'na yu'un ti Vo'e, ti laj yalbeic ya'i ti jchanubtasvanej Esdras ti yich'uc talel ti jpoc svunal ti oy c'usi jbel tsots albil ti ac'bilic comel Israel yu'un Dios ta sventa ti Moisese.

²Ta sliquebal c'ac'al yu'un ti yucubal ue, ta sba ta satic c'alal oyic ta tsobajel ti ants viniquetique, xchi'uc ti buch'utic xa'ibeic lec sni' xchiquinale, yich'oj c'otel ti pale Esdrase ti jpoc svunal ti oy c'usi jbel tsots albile.

³Ta sob no'ox lic, c'ot c'alal to o'lol c'ac'al va'al ta yavtael ta stojol scotolic ti oyic ta jamal amac' ta yeloval ti'na yu'un ti Vo'e. Scotol ti jteclume, ts'etel sni' xchiquin ta ya'yiel c'u s'elan ta xich' avtael ti oy c'usi jbel tsots albil ta jpoc vune.

⁴Lic va'iuc ti Jchanubtasvanej Esdras ta jun scajleb yavtaobil vun ti meltsanbil ta te' ti ja' stunel oe. Ta sbats'i xocon va'alic ti Matatiase, ti Semae, ti Aniase, ti Uriase, ti Hilciase, xchi'uc ti Maaseiase. Ta sts'et xocon va'alic ec ti Pedaiase, ti Misale, ti Malquiase, ti Hasume, ti Hasbadanae, ti Zacariase, xchi'uc ti Mesulame.

⁵Va'i ti Esdras une laj sjam ti jpoc vun ta sba ta sat scotol ti jteclume. Oy ta toyol yu'unic scotolic. C'alal laj sjam ti vun une, laj sva'an sba scotol ti jteclume.

⁶Va'i ti Esdras une, lequil c'opoj ta stojol ti Ajvalil Dios ti scotol xu' yu'une, ti sye'oj sc'obic ta toyol ti xi laj staq'uic scotol ti jteclume: “Jechuc, jechuc un.” Ta jech yepal un, snupilanic xa banomil lic spatan sbaic ta lumtic ta stoyel xi'el ti Diose.

⁷Ti levitaetic Josuee, ti Banie, ti Serebías, ti Jamine, ti Acube, ti Sabetaie, ti Hodías, ti Maaseiase, ti Kelitae, ti Azariase, ti Jozabade, ti Hanane, xchi'uc ti Pelaiase, ti c'usi ta xal ta jbel c'usi tsots albile, ta xchapbeic ya'iic smelol scotol ti jteclume. Va'alic un ti jnaclejetic ti bu oyique,

⁸lic yavtaic ti jpoc svunal ti oy c'usi jbel tsots albil yu'un ti Diose. Ta sjelubtasic ta yan c'opetic yo' jech ta xa'iic lec ti c'u s'elan ta xale.

⁹Ti x'oq'uic scotol ti jteclum c'alal laj ya'iic ti ta stsuts xa ech'el ta yavtael ti oy c'usi jbel tsots albile, ti ajvalil Nehemías eque, jech c'u cha'al ti pale Esdras jchanubtasvaneje, xchi'uc ti levitaetic ti ta xalbeic smelol ta stojol jteclum ti c'usi ta xal ti oy c'usi jbel tsots albile, laj yalbeic ya'iic scotolic ti mu xat yo'ntonique, ti mu x'oq'uique, ti jun c'ac'al taje, c'otem ta sventa stoyel xi'el ti Ajvalil Diose.

¹⁰Ma'uc no'ox taje, xi albatic yu'un ti Esdrase: “Batanic ta stunesel, ta slajesel ti c'usi jelavem yutsil ta j'ech'ele, ta yuch'el ti chi'il vinoe. Iq'uic batel ti buch'utic mu'yuc c'usi xchapanojic jutebuque. Ti c'ac'al avi tana li'e, c'otem ta sventa stoyel xi'el ti Diose. Mu xavat avo'ntonic. Ti muyubajel ta stojol ti Diose, ja' yipal cu'untic.”

¹¹Ja' jech ec ti levitaetique laj spajtsanic ti jteclum ti laj yalbeic ya'iic ti mu x'oq'uique. C'otem ta sventa stoyel xi'el ti Dios ti c'ac'al avi tana li'e.

¹²Va'i un, scotol ti jteclume bat ve'icuc uch'bajicuc ta spucbel sbaic ti sve'elique, ta spasel jun muc' ta q'uin ti laj ya'ibeic smelol ti c'u s'elan laj yich'ic chanubtasele.

¹³Ta yan xa c'ac'al un, ti banquilaletic yu'un ti jujuchope, ti paleetique, xchi'uc ti levitaetique, laj stsob sbaic xchi'uc ti jchanubtasvanej Esdrase, yo' jech ta xa'iic lec bu c'alal xjoybij talel smelol ti oy c'usi jbel tsots albile.

¹⁴Ts'ibabil laj staic un, ti yaloj comel Dios ta sventa ti Moisés ti tsots sc'oplal ta xalbeic ya'i ti israeletique, ti ta xcux yo'nton ta yolon lambil yanalte' axibal na ti c'u sjalil ta spasic q'uin ta yucubal ue.

¹⁵Va'i un, ta sjunul ti jteclumetique, xchi'uc ti Jerusalene, puc mantal ti loq'uicuc batel ta ts'i'laltic ti jnaclejetic ta sa'el talel sc'obtac ti olivoe, ti arrayane, ti xane, mi c'usiuc no'ox yan limlim c'ob te'e, yo' jech ta slamic ta yaxibalnaic co'ol jech c'u cha'al ta xal ti oy c'usi jbel tsots albile.

¹⁶Ti jnaclejetic une loq'uic batel ti sutic talel xchi'uc yanalte' yo' ta smeltsanic ti lambil yanalte' axibal na ta xcha'cojal snaique, mi ta yamaq'uique, jech c'u cha'al yamaq'uil xch'ulna ti Diose, ta jamal amac' ti oy ta yeloval ti'na yu'un ti vo'e, xchi'uc ta amac' ti oy ta ti'na yu'un ti Efraine.

¹⁷Scotol ti jnaclejetic ti cha'sutic talel ti bec'bil to ox loq'uique, laj smeltsanic lambil yanalte' yaxibalnaic, ti comic ta yolone. Ti c'u sjalil ech' ti Josué xnich'on ti Nune, mu'yuc xich' pasel ti jech yorail taje. Spajebal xa no'ox ti xmuyubajique.

¹⁸Vucub (7) c'ac'al sjalil laj spasic q'uin ti c'u s'elan ch'unbil yu'unique, ti lic ta sba c'ac'ale, ti c'ot ta tsutsel ta slajeb xemunae. Ti Esdras une, jujun c'ac'al ta xavta ti svunal ti oy c'usi jbel tsots albil yu'un ti Diose. Ti ta xvaxaquibal (8) c'ac'al une, laj spasic jun muc'ul ch'ul tsoblej, co'ol s'elan jech c'u cha'al liquem ono'ox yu'unique.