Read Tzotzil Nehemías 9 Bible Online

Nehemías 9 - Tzotzil bible

Nehemías 9

¹Ta xchanibal xcha'vinic c'ac'al (24) ta yual ono'oxe, ti israeletique laj stsob sbaic yo' ta scomes yotic. Laj slapic lajemal c'u'il, xchi'uc laj svij lum ta sjolic.

²Laj xch'ac sbaic loq'uel ta stojol ti liquem talel sts'unubalic ta jyanlume. Lic va'iicuc, lic yalic ti oy smulique, xchi'uc oy smul ti stot sme' ta vo'nee.

³Ti jech va'alic ti bu oyique, jalij oxib ora sjalil ti laj yich' avtael ti ts'ibabil ta jpoc vun ti oy c'usi jbel tsots albil yu'un ti Ajvalil Dios yu'unique. Jalij oxib ora ta yalel ti oy smulique, xchi'uc ta sbic'tajes sbaic ta yich'el ta muc' ti Diose.

⁴Ts'acal to un, ti levitaetique, ti Josuee, ti Binuye, ti Cadmiele, ti Sebaniase, ti Bunie, ti Serebiase, ti Banie, xchi'uc ti Quenanie, muyic ech'el ti bu chotol ti scajanobil yavtaobil vune. Tsots xvochetic liquel ta stael ta c'oponel ti Ajvalil Dios yu'unique.

⁵Ta jech yepal un, xi laj yalic ti levitaetique, ti Josuee, ti Cadmiele, ti Binuye, ti Hasabniase, ti Serebiase, ti Hodiase, ti Sebaniase, xchi'uc ti Petaiase: “Licanic, va'lanic xa, sbateluc osil lequil c'optabiluc ta j'ech'el ti Ajvalil Dios avu'unique. ¡Lequil c'optabiluc ta sventa ti c'uxubinel yu'une, ti toybiluc xi'biluc ti stuc no'ox jelavem ti yutsilale, ti smuc'ul stsatsale!”

⁶Ti Esdrase xi laj yale: “Atuc no'ox ti Diosote, mu'yuc xa yan. Vo'ot laj ameltsan ti vinajele, xchi'uc ti c'usitic oy x'ech' to bu oy ti vinajele, xchi'uc scotol ti c'analetic yu'une. Laj ameltsan ti banomile, xchi'uc scotol ti c'usi oy yu'une, ti muc'tiquil nabetique, xchi'uc scotol ti c'usitic oy yu'une. Avac'ojbe xcuxlej scotol ti c'usitic oye. Jech o xal ti c'analetic ti oy ta vinajele, ta xich'ot ta muc'.

⁷“Ch'ul Ajvalil, ti Diosote laj at'uj ti Abrame, laj avic' loq'uel ta Ur ta steclumal ti caldeoetique. Lic avac'be sbiin Abraham.

⁸Laj avil ti ja' jun vinic spatoj yo'nton ta atojole, ti xi s'elan laj apas jun trate ta stojole: ti snitilultaque, ta xavac'be steclumalinic slumal ti cananeoetique, ti hititaetique, ti amorreoetique, ti ferezeoetique, ti jebuseoetique, xchi'uc ti gergeseoetique, ¡C'ot xa ta pasel avu'un ti jech laj aval une, ti xc'ot ono'ox ta pasel avu'un ti ac'ope!

⁹Laj avil c'u s'elan oyic ta vocol ta Egipto ti jtot jme'cutic laj ech'uc ta vo'nee. Laj ava'ibe ti xvochetic ta oq'uel c'alal oyic ta sti'il ti Tsajal Nabe.

¹⁰Muc'tic no'ox ti c'usi laj avac' ta ilel ti ch'ayal o'ntonal xc'ot yu'un ti c'usitic laj apas ta scontrainel ti faraone, ta stojol ti yajtuneltaque, ta stojol ti jnaclejetic yu'un ti steclumale. Laj avil ti jelavem xa'i sbaique, ti loq'uel ta xutilanic ti israeletique. Ja' jech puc ac'oplal avi tana ti jelavem xu' avu'une.

¹¹Ta sba ta satic, laj apas ta cha'ch'ac ti nabe, ti taquin ti banomil ech' xtuch'ique, ti laj amut'i comel ta snabil ti jnutsvanejetique, ti co'ol to s'elan ton yal batel c'alal to snabile.

¹²Ta jech yepal un, ta c'ac'altique, ta jun bal-bal voletel toc laj atojobtas ech'el. Ta jun bal-bal voletel leb c'oc' laj atojobtas ech'el ta ac'ubaltic yo' jech sac jaman ta stam ech'el ti sbeique.

¹³“Ta ts'acal to un, layal talel ta vits Sinaí, ta toyol to ta vinajel lac'opoj talel ta stojolic ti laj avac'be sna' ti c'usitic nopbil avu'un ti oy stuq'uile, ti chanubtasel ti ja' melele, xchi'uc ti oy c'usi jbel tsots albile, xchi'uc ti lequil mantaletique.

¹⁴Laj achanubtas c'u s'elan ich'bil ta muc' ta xac'ot ta sc'ac'alil ti cuxob o'ntonal ti t'ujbil avu'une. Laj avac'be ti mantaletique, ti chanubtaseletic ti ja' melele, ti c'usi jbel tsots albile, xchi'uc ti chanubtaseletic ti laj avac' comel ta sventa ti avajtunel Moisese.

¹⁵Laj avac'be ti ve'lil ti lic talel ta vinajele yo' jech ta snojes ti xch'utic yu'un ti vi'nale. Laj avac'be ti vo' ti loc' talel ta ch'ene yo' jech ta x'ech' ti taqui ti'il ta xa'iique. Ta jech yepal un, laj avalbe ya'i ti ta x'ochic ta yu'ninel ti jteclum ti avaloj ono'ox ta xu'ninique.

¹⁶“Ja'uc ti stuquic une, xchi'uc ti jtot jme'cutic ti laj ech'uc ta vo'nee, toj toyobbaic. Mi ja'uc xa'ibeic xchiquinal. Mu'yuc laj yaq'uic ta venta ti amantaltaque.

¹⁷Mi ja'uc sc'an xch'unic. Mi ja'uc laj svules ta sjolic ti c'usitic muc'tic laj apas ti laj avac' ta ilel ta stojolique. Mu xa'ibeic xchiquinal ti pimunebic ta j'ech'ele. C'ajomal no'ox laj sva'anic jun banquilal yu'unic yo' jech ta xcha'ic'atic sutel ta Egipto, yo' ta x'ochic ta mosovil. Ja'uc le' une, jch'ay mulil Dios, jun Diosot ti jun yutsil avo'ntone, ti oy sts'iquemal xcuchemal avu'une. Mu xana' xatenvan. Oy smuc'ul avo'nton. Oy syail xc'uxul avo'nton.

¹⁸Ti le' une, c'alal laj smeltsanic ti jcot sloc'obbail vacax ti unijesbil ta taq'uine, ti laj yalic ta stojol ti dios taje ti ja' la loq'uesatic talel ta Egipto yu'une, spajebal xa no'ox laj sta ti smulique.

¹⁹Ta sventa ti mu albajuc ti syail xc'uxul avo'ntone, mu'yuc xaten comel c'alal oyic ta sbajtical banomile. Mi ja'uc laj xch'ac sba ta stojolic ti bal-bal voletel toc ta c'ac'altic yo' jech ta xtojobtasatic batel ta be, mi ja'uc ti bal-bal voletel leb c'oc' ta ac'ubaltique, yo' ta xil batel sbeic ti bu ta stamic batele.

²⁰Ma'uc no'ox taje, laj avac'be ti alequil bijil yo' jech ta xtojobtasatic, ti mi ja'uc mu x'och ta ye ta sti'ic ti maná ti laj atac talele. Laj avac'be yuch' ti vo'e yo' jech ta x'ech' yu'unic ti taqui ti'il yu'unique.

²¹Cha'vinic (40) jabil sjalil laj avac'be ta ye ta sti' sve'elic ti oyic ta sbajtical banomile, ti xi s'elan lec c'ot ta stojolic avu'une: Mi ja'uc oy bu laj yilic laj ti sc'u'ique, ti situb ti yacanic ta xanubale.

²²“Laj avac'be ta yoc ta sc'obic ti bu sbainojic ta sventainel muc'tiquil lum ti ajvaliletique, ti sbejleb-bejleb laj ach'acbe ti bu xc'ot ti yosilique. Laj yu'ninic ti jteclum Hesbone, sbanomil ti ajvalil Sehone, xchi'uc ti Basán sbanomil ti ajvalil Oge.

²³C'ot ta pasel ta stojolic avu'un ti co'ol s'elan c'anal ta vinajel yepal laj avac'be ti yalab xnich'nabique. Avic'oj batel ta yu'ninel ti muc' ta jteclum ti avalojbe ono'ox ta xavac'be ta xrextoic ti stot sme'ic ti laj ech'uc ta vo'nee.

²⁴Ochic batel un, cuch yu'unic ta yu'ninel yosilal ti Canaane. Ta sba ta satic, laj avac' ta lo'il maxil ti jnaclejetic yu'un ti banomil taje. Ti ajvaliletic yu'unique, laj avac'be ta yoc ta sc'obic ta spasbel ti c'usi xa sc'an yo'ntonic ti yajval banomiletique.

²⁵Laj yu'ninic xtoc jteclumetic ti lec bajal ta moque, ti ve'ebal banomile, xchi'uc naetic ti nojic lec sbeel ta c'usiuc no'oxe, ti joq'uetique, ti yavil ts'unubal uvae, ti yavil ts'unubal olivo te'e, xchi'uc ti yan lo'bolal te'etique, ti ve'ic uch'ubajic ti bu xa c'alal xal ti yo'ntonique, ti jubic ta j'ech'el ta sc'upinel ti spajeb yutsilal slequilal avo'ntone.

²⁶“Ja'uc le' une, toyobba batic. Lic scontrainicot. Laj sbajic ti oy c'usi jbel tsots albil avu'une. Laj smilic ti avaj'alc'optac xtoque, ti c'alal jamal albatic ti oy c'usi chopol ta spasique, xchi'uc ti albatic ti suticuc talel ta atojole. Soc ajol yu'unic ta j'ech'el.

²⁷Jech o xal laj avac' ta c'abal yu'un ti scontrae yo' jech ta x'ilbat svocolic yu'un. Ts'acal to un, c'alal oyic xa ta vocole, laj sc'anic ti coltael ta atojole. Ti jech mu albajuc syail xc'uxul avo'ntone, ta vinajel to, laj ava'ibe ti sc'opique. Laj atacbe talel viniquetic yo' jech ta xpojatic ta yoc ta sc'ob ti scontraique.

²⁸“Manchuc mi jech un, c'alal ch'abal xa scontrainelic laj ya'iique, lic xcha'pasic ti c'usi chopol ta aba ta asate. Jech o xal laj avac' ochuc ta c'abal yu'un ti yajcontraic une, ti tsalbil c'otique. Ts'acal to un, lic xcha'c'anic ti coltael ta atojole. Ti jech yepal oy no'ox ti syail xc'uxul avo'ntone, ta vinajel to, laj ava'ibe ti sc'opique, ti mu no'ox jaycojuc laj atic' aba ta spojelique.

²⁹Laj abijubtas ti xcha'tamicuc ta spasel ti oy c'usitic jbel tsots albil avu'une. Xtoyet no'ox xa'i sbaic ti yalojic une ti mu tsotsuc sc'oplal ta xa'iic ti amantaltaque. Naca sju'el no'ox ta teq'uel ti c'usitic nopbil avu'une, ti ta x'ac'bat xcuxlejal ti buch'utic ta xc'ot ta pasel yu'unique. Toyobba batic ta j'ech'el. Mi ja'uc xa'ibeic xchiquinal ti laj yaq'uic ta ventae.

³⁰Jal jabil laj ats'icbeic, ti laj acaj-bijubtas ta sventa ti abijile, xchi'uc ta sventa ti avaj'alc'optaque. Mi ja'uc laj yaq'uic ta venta. Jech o xal laj avac' ta c'abal ti tsalbil c'otic yu'un ti muc' ta lume.

³¹Manchuc mi jech un, ta sventa ti yepal no'ox ti syail xc'uxul avo'ntone, mu'yuc xatsutses ta j'ech'el scotolic. Mi ja'uc laj aten comel, yu'un Diosot ti oy sts'iquemal xcuchemal avu'une.

³²“Jech un, Ch'ul Dios cu'uncutic, ti jelavem amuc'ul atsatsale, ti xi'bal abae, ti staoj yav mu xch'ay ta be avu'un ti atratee, ti syail xc'uxul avo'ntone, ma'ucuc ti oy juteb ta ajol ti c'usitic chopol laj spasic ti ajvaliletic cu'uncutique, ti banquilaletique, ti paleetique, ti caj'alc'opcutique, ti jtot jme'cutic laj ech'uc ta ba'yele, xchi'uc scotol ti jteclum ti lic talel ti c'alal laj ech'uc ti ajvaliletic yu'un ti Asiriae, ti jech to xyaquet avi tanae.

³³Ti le' une, mi juteb ja' amul scotol ti c'usi laj c'otuc ta jtojolcutique. Ti c'usi laj apase, ta stuq'uil avo'nton. Ti vu'uncutique, chopol ti c'usi laj xa jpascutique.

³⁴Mi ja'uc ti ajvaliletic cu'uncutique, ti banquilaletique, ti paleetique, ti jtot jme'cutic laj ech'icuc ta vo'nee, c'ot ta pasel yu'unic ti oy c'usi jbel tsots albile, ti amantaltaque. Mi ja'uc laj yaq'uic ta venta ti sbijubtaselic laj acaj'albee.

³⁵Le' ec une, ti tiq'uilic ta ajvalile, ti yepal no'ox avac'ojbe ti c'usitic x'ayan yu'unic ta jamal ve'ebal banomile, c'ajomal no'ox lic syanijes sbaic xchi'uc. Mi ja'uc laj snijan sbaic ta yich'elot ta muc', ta yictael sbaic ti c'uisitic chopol ta spasique.

³⁶“Q'uel avil c'u j'elancutic tana un. Oyuncutic ta mosovil ta banomil ti bu laj avac'be ti jtot jme'cutic ta vo'nee yo' jech ta smalq'uin sbaic xchi'uquic ti c'usitic lec ta xloq'ue.

³⁷Ti c'usitic lec ta xloq'ue, c'otem ta yu'unic ti ajvaliletic ta scoj jmul jcolo'cutic ti sva'anoj sba ta jtojolcutic avu'une. Ti vu'uncutic xchi'uc ti jchon jbolomcutique, ta spasic ti c'usi xa sc'an ti yo'ntonique. Jech o xal mu x'ech' xjelav ti jvocolcutique.”

³⁸Ti jech taj une, jbel co'ntoncutic ta xcac' que jti'cutic ti ts'ibabil comuc ta vune, ti yaq'uicuc seyoic spirmaic ti banquilaletic cu'uncutique, ti levitaetique, xchi'uc ti paleetic ti ta jpoc vune.