Read Tzotzil Ester 2 Bible Online

Ester 2 - Tzotzil bible

Ester 2

¹Ech' c'uc sjaliluc un, lamajem xa yo'nton ti ajvalil Asueroe, vul ta sjol c'u s'elan pasbat yu'un ti Vastie, xchi'uc ti mantal sventa ti laj yich' contrainele.

²Va'i un, xi albat yu'un ti yajtuneltac ti oyic ta tunel yu'une: —Tsots sc'oplal, sa'batuc talel tojol tsebal antsetic ti c'upil sbaique.

³Sva'ananuc jtunel viniquetic ta scotol bu c'alal smacoj ta sventainel ti ajvalile, ti sbainojuc ta yiq'uel talel scotol ti tsebal antsetic ta sna ti ajvalil ta muc' ta lum Susae, ti bainbil c'oticuc yu'un ti Hegai jun vinic ti co'ol yo'nton xchi'uc ti ajvalile, ti sbainoj ta xchabiel ti antsetique. Sbainojuc c'otuc ti Hegai ta yalel mantal ti yich'ic jaxbel muil poxil sventa sc'upiltasel ti xch'alet no'ox ta q'uelele.

⁴Ti bu x'ech' to c'upil laj yil tseb ti ajvalile, yich'uc va'anel ta me' ajvalil yo' jech ta xc'ot ta xq'uexol ti Vastie. Ti va'i s'elan taje, lec laj ya'i ti ajvalile. Jech laj yich' pasel un.

⁵Ta muc' ta lum ti Susae, nacal jun judío vinic sbiinoj Mardoqueo, xnich'on ti Jaire, snitilul ti Simei xchi'uc ti Cise, ta sventa jvoc' snitilultac ti Benjamine.

⁶Ti Mardoqueo taje, jun ta scotol ti yepal bec'bil loq'uic ta Jerusalén yu'un ti Nabucodonosor ajvalil yu'un ti Babiloniae, ti jmoj loq'uic batel xchi'uc ti Jeconías ajvalil yu'un ti Judae.

⁷Ti Mardoqueoe oy jun snamtal ixlel ti ch'abal xa ti stot sme'e, ti laj sbis jech c'u cha'al ta stseb stuc c'alal chamem xa ti stot sme'e. Ti tseb taje sbiinoj Hadasa, Ester ti yan sbie. C'upil sba ta j'ech'el ta q'uelbel ti sat yelove.

⁸C'alal vinaj batel mantal ti laj yal ti ajvalile, yepal tojol tsebetic laj yich'ic tsobel batel ta sna ajvalil ti oy ta muc' ta lum Susae, ti bainbil c'otic yu'un Hegai ti sbainoj ta xchabiel ti antsetique. Ta scotol ti tsebetique, capal bat ec ti Estere.

⁹Ti Hegaie lec laj yil ti tsebe, ti xnijet xchimilet laj yac' sba ta stojole. Ti Hegai une laj yac' ta poxtael ta muil poxil ta sventa xch'alet no'ox yutsil ta q'uelele. Lic yac'be ti lequil ve'liletique. Laj yac'be yajtuneltac vucub mosovil antsetic ti jelavem xtojobic ta scotolic ti oy ta sna ti ajvalile, ti jmoj batic yu'un ta spajeb xa no'ox yutsil na ti c'otem ta sna ti antsetique.

¹⁰Ti Estere mu'yuc laj yal bu liquem talel ti sts'unubale, mi ja'uc sc'oplal ti yuts' yalaltaque. Yu'un albatem yu'un ti Mardoqueoe ti mu'yucuc c'uxi xale.

¹¹Ti Mardoqueoe scotol c'ac'al ta x'ech'ilan ta yeloval yamaq'uil na yu'un ti antsetique yo' jech ta sna' mi lec oy ti Estere, xchi'uc c'u s'elan ta xtuc'ulanat.

¹²Scotol ti tsebetique, lajcheb (12) u sjalil, ta xich'ic poxtael ta sventa ti xch'alet no'ox yutsil ta q'uelele. Ti sliqueb svaquibal (6) yuale, ta xich' jaxbel naca yaceiteal muil nichim ta sjunul ti sbec'talique. Ti vaquib (6) u ta to x'ech' batele, ta xich' ac'bel muil poxiletic xchi'uc jaxbil poxiletic sventa ta stunesic ti tsebetique. Mi tsuts xpoxtael ti c'u sjalil une, ti tsebe, ta jujun tal, xcholet ta x'ech' yac' sbaic ta ilel ta stojol ti ajvalil Asueroe.

¹³Ti c'usi xal yo'ntonic ta slap ya'i loq'uel ti tsebetic ta na ti bu oyic yo' ta xbatic ta sna ti ajvalile, ta x'ac'batic batel.

¹⁴Ac'ubaltic xa un, ta xbatic ta sna ti ajvalile. Sob ta yoc'omal un, ta sutic talel bu oy snail ti antsetic ti sbainoj ta xchabiel ti Saasgaz jun vinic ti co'ol yo'ntonic xchi'uc ti ajvalil ti sbainoj ta xchabiel sts'acal ajniltac ti ajvalile. Mu'yuc xa ta x'ech' yan velta ta stojol ti ajvalil mi mu'yuc xc'ot ta yo'ntone, ja' xa no'ox ta xich' cha'iq'uel yu'un ti bu junucal ic'ot ta yo'nton ti ajvalile.

¹⁵Ti Ester une, yantsil nich'on ti Abihaile, sjun-nich'on ti Mardoqueoe, c'alal sta yorail laj yich' iq'uel batel ta stojol ti ajvalile, c'ajomal no'ox laj yich' batel c'u s'elan albil yu'un ti Hegai jun vinic ti co'ol yo'ntonic xchi'uc ti ajvalile, ti sbainoj ta xchabiel ti tsebetique. Staoj xa ti Ester une, ti lec x'ile yu'un scotol ti buch'u tuc'ulanvanique.

¹⁶Ti Estere, iq'ue batel ta sna ti ajvalile yo' jech ta sva'an sba ta stojol ti ajvalil Asueroe, ta slajunebal (10) u ti sbiinoj Tébet xtoque, ta yucubal (7) xa jabil stic'lej ta ajvalilal.

¹⁷Ti Asuero une, ic'bil c'ot yo'nton yu'un ti mu bac'niuc x'ic'bun yo'nton yu'un yan ants jech c'u cha'al ti Estere. Yu'ninojbe c'ot yo'nton Asuero ti Ester eque. Laj scajtsanbe ti sc'oplale, ja' mu sta ti yan tsebetic ti ech' ta stojole. Laj yac'be slap ti sronail sjole. C'ot ta me' ajvalil ta sventa xq'uexol ti Vastie.

¹⁸Ta jech yepal un, lic yac' jun muc' ta ve'el uch'ubajel ti ajvalil sventa ta scajtsanbe sc'oplal ti Estere. Laj staan talel ta iq'uel scotol ti its'inal ajvaliletique, xchi'uc ti xchi'iltac ta abtele. Lic syales ti patanetic ta stojic ti bic'tal jteclumetique. Epal matanaletic laj xch'ac ti loc' ayan ta yutsil yo'nton ti ajvalil ta yaq'uele.

¹⁹C'alal sc'ac'alil ta stsobbe sutel ti tsebal antsetic ta snail ti antsetique, chotol ta ochebal ti'na yu'un ajvalil ti Mardoqueoe.

²⁰Jech c'u cha'al albil yu'un Mardoqueo ti Estere, mu'yuc laj yal bu ti slumale, mi ja'uc sc'oplal ti yuts' yalale. C'ajomal c'otem ta yo'nton jech c'u cha'al albil yu'un ti Mardoqueo c'alal ventainbil to oxe.

²¹Ti chotol ta ochebal ti'na yu'un ajvalil ti Mardoqueo une, laj ya'i c'u s'elan ta xlo'ilaj ti Bigtan xchi'uc ti Terese, chib j'opisial yajchabivanej ti ajvalil ti sbainojic ta sq'uelel ti ochebal ti'nae. Taje, snopojic xa ta scapemal sjolic ta smilic ya'i ti ajvalil Asueroe.

²²C'alal laj ya'i ti Mardoqueo ta spay sc'opique, bat xchapbe ya'i ti me' ajvalil Estere, ti bat xchapbe ya'i ajvalil ti c'u s'elan laj ya'i ti Mardoqueoe.

²³Lic yich' t'unel ti c'op taje. Vinaj ti melel ono'oxe. Loc' mantal ti yich'uc joc'anel ta te' ti chib j'opisialetique. Ta sba ta sat ti ajvalile, laj yich' bejanel ta jpoc vun ti bu ta xich' ts'ibael slo'il ya'yejal ti jteclume.