Read Tzotzil Ester 6 Bible Online

Ester 6 - Tzotzil bible

Ester 6

¹Ti ta yac'ubalil taj une, mu x'och svayel ti ajvalile. Jech laj stac mantal ti ich'batuc talel svunal bu ts'ibabil ti c'usitic c'otem ta pasel ta sjunul ti muc' ta lume, ti avtabatuc ya'ie.

²Ti ta jpoc vune, ts'ibabil ya'yejal laj staic c'u s'elan laj svinajes ti Mardoqueo sc'oplal ti Bigtan xchi'uc ti Terese, yajchabivanej j'opisialetic ta sna ti ajvalile, ti snopojic xa spayojbeic sc'oplal ta xaq'uic ta milel ti ajvalil Asueroe.

³Va'i un, xi laj sjac' ti ajvalile: —¿C'usi matanal laj yich' ac'bel? ¿Mi laj yich' yich'el ta muc' ti Mardoqueo yu'un ti yabtel taj une? Xi laj stac' ti yajtuneltaque: —Ta j'ech'el ch'abal, mu'yuc c'usi ac'bat.

⁴Naca to jech ta xalic taje, och batel ti Amán ta yamaq'uil sna stuc ti ajvalile, ta sc'anel ti yac'uc ye sti' ti ajvalil ta xich' joc'anel ta te' ti Mardoqueo ti bu xa laj yac' ta pajele. —¿Buch'u ti xva'et ta xanav ta amaq'ue? —xi laj sjac' ti ajvalile.

⁵—Ti Amane —xiic ti yajtuneltaque. —¡Ech'uc talel avu'unic! —xi laj yal ti mantale.

⁶Ti Amane och batel, ti xi jac'bat yu'un ti ajvalile: —¿C'usi sc'an pasel ta stojol ti vinic ti xloc' ta yo'nton ti ajvalil ta xac' ta ich'el ta muq'ue? Xi lic yalbe sba sc'oplal stuc ti Amane: “¿Mi yu'un la oy buch'u yan ta xac' ta ich'el ta muc' ti ajvalile, vu'un ma' taj unbi?”

⁷Va'i un, xi laj staq'ue: —Ta sventa ti vinic taje,

⁸tsots sc'oplal, slapuc talel c'u'il jech c'u cha'al slapoj ti Jcuch abtele, xchi'uc jcot ca' scajleb stuc ti Jcuch abtele, ti slapojuc ech'el ronail jolal sventa ajvalilale.

⁹Ti c'u'ile, xchi'uc ti ca'e, ac'batuc sbain ta yich'el batel junuc ta scotol banquilal yajtunel ti ajvalile, ti sbainojuc c'otuc ta slapbel sc'u' ti loc' ayan ta yo'nton ti Jcuch abtel ti buch'u ta xac' ta ich'el ta muq'ue, ti snitojbeuc ech'el sca' ta x'ech' ta yamaq'uil ti jteclum ti xi ta x'avan ech'el ta jba'be yu'une: ‘Jech ta xc'ot ta stojol ti vinic ti buch'u ta x'aq'ue ta ich'el ta muc' yu'un ti ajvalile.’

¹⁰Va'i ti Amane, xi albat yu'un ti ajvalile: —Some ach'a un cha'e, jopo talel ti c'u'ile. Nito talel ti ca' jech c'u cha'al laj avale. Jechuc xapasbe ta stojol ti judio vinic Mardoqueo ti buch'u xchotet ta ti'na yu'un ti ajvalile. Mi ja'uc stselbuj avu'un jutebuc jech c'u cha'al laj avale.

¹¹Laj sjop talel ti c'u'ile. Laj snit talel ca' ti Amane. Laj yac'be slap sc'u' ti Mardoqueoe, ti jba'be snitojbe ech'el sca' ech' ta yamaq'uil ti jteclum ti xi ta x'avan ech'ele: “Jech ta xich' pasbel ti vinic ti xloc' x'ayan ta yo'nton ti ajvalil ta xac' ta ich'el ta muq'ue.”

¹²C'alal tsuts ti xanobal ta ca' une, ti Mardoqueoe sut batel ta chotlej ta sti'na sna ti ajvalile. Ti Amane svoloj xa ta maquel sat, bat ta anil ta sna.

¹³Ti c'u s'elan c'ot ta pasele, laj xchapbe ya'i ti yajnile, xchi'uc scotol ti c'u yepal lec xil sbaic xchi'uque, ti xi albat yu'une: —Ti mi judio vinic ti Mardoqueo ti buch'u laj xa yac' bic'tajuc ac'oplale, mu xa ono'ox stsal avu'un. C'ajomal no'ox net'bil ta xac'ot yu'un ta j'ech'el.

¹⁴Mu to ta xlaj yo'ntonic ta slo'iltael c'alal c'otic ti yajtunel stuc ti ajvalile, yo' jech ta xiq'uic batel ta anil ti Amán ta ve'el uch'ubajel ti chapanbil yu'un ti Estere.