Read Tzotzil Ester 8 Bible Online

Ester 8 - Tzotzil bible

Ester 8

¹Ti ta sc'ac'alil no'ox taje, ti ajvalil Asueroe laj sq'uelanbe me' ajvalil Ester sna ti Amane, yajcontra ti judioetique. Tal ta stojol ajvalil ti Mardoqueoe, ta sventa ti laj yal ti Estere, ti snamtal banquil xil sbaic xchi'uc ti Mardoqueoe.

²Va'i ti ajvalile laj sloq'ues ti yixtolal c'obal ti laj xcha'ich' sutel ti laj yac'be to ox ti Amane. Laj yac'be yich' ti Mardoqueoe. Ta sventa ti Estere, laj sva'an ta sq'uelel scotol ti c'usitic x'ayan to ox yu'un ti Amane.

³Ta jech yepal un, ti Estere bat xcha'c'opon ti ajvalile. Chenel vo' xa sat c'ot snijan sba ta yoc ti ajvalile. Xvocolet xa laj sc'anbe ti yich'uc tuch'bel yip ti c'u s'elan xchapanoj comel ti Amane, ti j'ac'vanej ta vocol mantal ti chapanbil sc'oplalic ti judioetique.

⁴Ti ajvalile laj sye' batel ta stojol Ester ti vaxtonil meltsanbil ta oroe. Ti antse lic sva'an sba ti vechel xa ta stojol

⁵ti xi laj yale: —Ti mi lec ta xa'i ti Jcuch abtele, ti mi ta xch'un ti oy smelol ti c'usi ta jc'anbee, ti oy jtu ta xil ti Jcuch abtele, ti mi ta xa'i ta yo'nton ti c'ux ta xiya'iune, yich'uc ts'ibael junuc mantal ti ta xtuch'be yip ti vunetic ti laj stac batel ti Amane, ti bu ta xalbe sc'oplal ta xich' tsutsesel ti judíoetic ti buyuc no'ox nacajtic ta banomil ti bu c'alal smacoj ti ajvalile.

⁶¿Mi xal xa ono'ox la xana' ta sts'ic cu'un ti vocol ta xc'ot ta stojol ti jteclumale, ti j'ech'el ta xich'ic tsutsesel ti cuts' calaltaque?

⁷Ti ajvalil Asueroe xi laj stac'be ti me' ajvalil Estere, xchi'uc ti Mardoqueo ti judio vinique: —Sna ti Amane, laj xa cac'be ti Estere. Laj yich' joc'anel ta te' ti stuque ta scoj ti ta ox xilbe svocol ta yaq'uel sjol sbaquilic ti judioetique.

⁸Avi tana une, ta xcac' que jti' ti yich'uc ts'ibael ta jventa ti c'usi lec ta xava'i ta sventa spojelic ti judioetique. ¡Ac'beic yich' seyoal ta jseyo jtuc ti vunetic taje! (Ta jlic vun ti yac'oj spirma ta sbi stuc ti ajvalile, xchi'uc ti ac'bil seyoal ta sventa seyo stuc ti ajvalile, mu stac' tuch'bel yip.)

⁹Ti jts'ibajometic yu'un ti ajvalile, laj yich'ic tael ta iq'uel ta anil. Taj une, ja' o ta oxib xcha'vinic (23) sc'ac'alil yu'un ti yoxibal u ti sbiinoj Sivane, laj yich' ts'ibael scotol ti c'u s'elan loc' ta ye ta sti' ti Mardoqueoe. Laj yich'ic ts'ibael batel ta sventa ti judioetique, ta sventa ti ajvaliletic jujuvoc' stalelic oyic ta bic'tal jteclumetique, xchi'uc ti yan j'abteletic sbainojic ta sventainel ti vucub xcha'vinic (127) ta chop bic'tal lumetic ti lic ech'el ta India banomile, ti c'ot c'alal to Etiopiae. Ts'ibabil ta sc'op stuquic ti c'u s'elan sna' xc'opojic ti jujuchope. Laj yich' ts'ibael xtoc ta sc'op stuquic ti judíoetic ti c'u s'elan sna' xc'opojique.

¹⁰Ti ta vunetique, yac'anoj ech'el spirma ti ajvalil Asueroe. Ti jech laj yich' ac'anbel ti seyoal ta sventa seyo stuc ti ajvalile, laj yich' taquel batel ta sventa jpuc-vunetic ti xviletic no'ox batel ta ca'etic yu'un ti ajvalile.

¹¹Ta sventa ti vunetic taje, albatic ya'iic yu'un ajvalil ti judíoetic ti buyuc no'ox nacalic ta scotol ti jteclumetique, ti svoluc sbaic ta spaquel ti sc'oplalique, ta smileluc, ta stsutseseluc, ta stubbeluc sc'oplalic, ta yu'ninbeluc ti c'usitic oy yu'unic ti jnaclejetic ti chapalic xchi'uc yabtejebic ta stsacvanic ta leto ti mu'yuc syail xc'uxul yo'ntonic ta smilel ti antsetique, ti ololetique.

¹²Albatic xtoc ti junuc no'ox c'ac'ale, c'otuc ta pasel scotol ti bu c'alal smacoj ti ajvalil Asueroe, ta sc'ac'alil ti chapanbil sc'oplal ta oxlajuneb (13) c'ac'al ti xlajchebal (12) u ti sbiinoj Adare.

¹³Sloc'ol ti jlic vune, c'otuc ta oy c'usi tsots albil ti pucuc ech'el ta stojol scotol jnaclejetic ti buyuc no'ox nacalic ta jteclume, ti ta bic'tal lume, ti xchapalicuc ti judíoetic jech c'ac'al ta spacbeic sutel ti scontraique.

¹⁴Ta sventa smantal ti ajvalile, ta anil loq'uic batel ti jpuc-vunetic ti cajalic batel ta ca'etic yu'un ti ajvalile. Laj yich' puquel ec ti mantal ta muc' ta lum Susae.

¹⁵Ti Mardoqueoe slapoj loc' ech'el lo'in c'u'il sventa ajvalilal ti yax'elan xyaxal xchi'uc saquile, xchi'uc jun muc' ta ronail jolal ti meltsanbil ta oroe, xchi'uc jlic xela mochib c'u' ti yax'elan stsajale. Xmuyubajic lic avanicuc scotol ti jnaclejetic ta muc' ta lum Susae.

¹⁶Ta sventa ti judioetique, scotolic toj sac jamtajel to c'ot ti banomil laj ya'iique, ti xmuyubajic no'oxe, ti xlaet no'ox ta xa'iique, ti ich'bilic ta muc' laj ya'iique.

¹⁷Ta scotol ti buyuc ti jteclumetique, ti bic'tal lume, c'ot slo'il ya'yejal mantal yu'un ti ajvalile. Mu'yuc xa c'usi x'ech' o ta xa'iic ta muyubajel ti judioetique, xlaet no'ox ta xa'iic. Lic spasic q'uin sventa ve'el uch'ubajel. Ma'uc no'ox taje, yepal jnaclejetic ta jteclum lic snaban sbaic ta stojol ti judíoetic ti mu x'ech' xi'elal ta xa'iic yu'un ti judioetic ti cuch xa yu'unique.