Read Tzotzil Éxodo 1 Bible Online

Éxodo 1 - Tzotzil bible

Éxodo 1

¹Avi li'e, sbiic ti israeletic xchi'ucanoj c'otel ti Jacob ta Egipto ti xi s'elan ta jujuchope:

²ja'ic ti Rubene, ti Simeone, ti Levie, ti Judae,

³ti Isacare, ti Zabulone, ti Benjamine,

⁴ti Dane, ti Neftalie, ti Gade, xchi'uc ti Asere.

⁵Ta scotol snitilultac ti Jacobe, oy lajuneb xchanvinic (70) ta vo'. Yan ti Josee oy xa ono'ox ta Egipto.

⁶Ti Josee xchi'uc ti xchi'iltac ta voq'uel ti ja' sliqueb totil me'iletic taje, laj chamicuc scotolic.

⁷Ja' no'ox un, ti israeletique ep ti yalab xnich'nabique. Ja' yu'un un, epajic ta jmec. Tsalvanic comel ta j'ech'el, yu'un naca israeletic xc'uletic ti ta lume.

⁸Ta ts'acal to un, och jun ach' ajvalil ta Egipto, mu'yuc laj yojtiquin ti Josee. Ja' yu'un un, xi laj yalbe ti svinquilel sbaique:

⁹“Q'uel avilic, ti israeletique epajemic ta jmec. Toj tsots xu' yu'unic, ja' mu sta ti vo'otique.

¹⁰La' jsa'betic smelolal c'usi ta xcutic yo' jech mu teyuc no'ox yantic ta x'epajic ta jmec. Yu'un mi xlic letoe, xu' chba sco'oltas sjolic xchi'uc ti cajcontratique. Ta stsalotic ta leto. Ja' jech xtoc ta xictaic comel ti jlumaltique.”

¹¹Jech o xal ti egipcioetique lic sva'anic jq'uelvanejetic yo' ta stsitsic ta tsots abtel ti israeletique. Ac'bat sbainic ta smeltsanel ti jteclumetic yu'un ti Pitone xchi'uc ti Ramsese. Ti faraón ajvalil yu'un ti Egiptoe, ja' ta stunes ta sq'uejobil ti c'usiuc no'ox ve'lilal sat ts'unubaletic ti xloc' x'ayane.

¹²C'alal jech ta xich'ic tsots ilbajinele, yantic no'ox x'epajic ta jmec ec. Jech o xal ti egipcioetique ep xi'el ta xa'iic.

¹³Jech o xal un, ti egipcioetique spajeb xa no'ox laj yilbeic svocol ta mosovinel ti israeletique.

¹⁴Mu'yuc ta alel mi xcham o xchi'uquic ti jech tsitsbilic ta tsots abtel ta sjuybel yach'elal ti xamite, xchi'uc ta sbainel scotol ti yan abteletic ta osile. Ac'o mi jech ta spasic scotol ti va'i s'elan taje, staoj o yav oy sc'oplalic ja' to c'uxi xc'otic ta tsutsel ti israeletique.

¹⁵Ja' jech xtoc ti ajvalil yu'un Egiptoe xi laj yalbe ya'i ti Sifrae xchi'uc ti Fuae, ja' ti jvet'ometic yu'unic ti hebreo antsetique:

¹⁶—C'alal ta xacolesic ta alajel ti hebreo antsetique, q'uelic lec c'usi ololal ti chlaj voc'uque. Ti mi ja' tsebe, ac'o ch'iuc. Yan ti mi ja' querem laj avilique, milic no'ox xch'a.

¹⁷Ac'o mi jech albilic un, yu'un ti jvet'ometique xi'taojic ti Diose. Mu'yuc laj spasic jech c'u cha'al albilic mantal yu'un ti ajvalil ta jteclum Egiptoe. Yu'un ch'an no'ox xutic ti queremetique.

¹⁸Ja' yu'un un, ti c'alal taatic ta iq'uel yu'un ti ajvalile, xi albatique: —¿C'u cha'al ch'an no'ox xavutic ti queremetic chlaj voq'uicuque?

¹⁹Xi laj staq'uique: —Yu'un ti hebreo antsetique mu xco'olaj xchi'uc jech c'u cha'al ti egipcio antsetique. Yu'un ti stuquique tsotsic ta alajel. C'alal mu to ta xic'otcutic ta sq'uelele, colic xa ox ta alajel.

²⁰Ti jech s'elan taje, ja' jech epajic. Laj stsac lec yipic ti jteclum Israele. Yu'un yantic x'epajic ta j'ech'el.

²¹Ti jech laj xi'taic Dios ti jvet'ometique, bolesbatic yalab xnich'nabic yu'un ti Diose.

²²Yan ti faraone xi laj yalbe ya'i mantal ti steclumale: “Jipic batel ta uc'um ti jvoq'uel hebreo queremetique. Yan ti mi ja' tsebetique, ch'an utic.”