Read Tzotzil Éxodo 11 Bible Online

Éxodo 11 - Tzotzil bible

Éxodo 11

¹Ti Diose xi laj yalbe ya'i ti Moisese: —Ta to xcac' taluc yan tsots yilbajinel ti faraone xchi'uc ti egipcioetique. Mi laj taj une, ti faraone ma'uc no'ox ta xac' loc'anic batele, yu'un ja' stuc ta stsatsal jipoxuc loq'uel.

²Avi tana une, albo ya'i ti israel viniquetique xchi'uc ti antsetique, ti ac'o sc'anbeic ti c'usi x'ayan yu'unic ti slac'naic ti c'usitic meltsanbil ta oroe, ti ta platae.

³Ti Diose laj yac' c'uxubajuc yo'ntonic ti egipcioetic ta stojol ti israeletique. Ma'uc no'ox taje, yu'un ti yaj'abteltac ti faraone laj yilic ti cajal yabtel yich'oj ti Moisese, ja' jech ta snopic sjunlej ti Egiptoe.

⁴Ti Moisese xi laj yalbe ya'i ti faraone: —Ti Diose xi laj yale: “Ta o'lol ac'ubal, ta xi'ech' ta sjunlej Egipto.

⁵Ti jujuchop jnaclej egipcioetique, ta xcham scotol ti sbanquilal nich'onique. Ta xcham ec ti sbanquilal nich'on ti faraón ti buch'u oy sc'oplal ta xchoti ta ajvalilale. Ma'uc no'ox taje, ta xcham xtoc ti sbanquilal ol ti me' mosovil ants ti ta x'abtej ta molinoe. Ja' jech xtoc ta xcham scotol ti sba yalabtac ti chon bolometique.

⁶Ta sjunlej Egipto, ta xlic avanicuc ta oq'uel, yu'un mu xnel mu x'ech' ta xa'iic ti svocolique. Mu ja'uc oy bu c'otem ta pasel ta vo'ne. Mi ja'uc ta to xc'ot ta pasel.”

⁷Yo' jech ta xana'ic ti mu xco'olaj ta spas ti Dios ta stojol ti egipcioetique xchi'uc ta stojol ti israeletique, ja' yu'un un, ti bu oyique, mi ja'uc ti xme'lal oq'uic xa liquel ti ts'i'etic c'alal ta xlic yilic junuc jxanbile, mi ja' jun chon bolom yu'unic ti israeletique.

⁸Ja' yu'un un, scotol ti avaj'abteltac li'e ta xtal sq'uelicun. Xquejeletic ti xi ta xisc'anbeicune: “Ti vo'ote xchi'uc ti c'u yepal ta sts'acliot ti achi'iltaque, batanic.” Ti jech mu to ta xc'ot ta pasel ti va'i s'elan taje, mu xibat. Va'i un, soquem xa sjol loc' batel ti Moisés ta stojol ti faraone.

⁹Ts'acal to un, ti Diose xi laj yalbe ya'i ti Moisese: —Ti faraone mu xayac'oxuc ta venta. Ja' yu'un un, ta x'epaj ti c'usitic ch'ayal ta xc'ot o'ntonal ta xcac' iluc ti li' ta Egiptoe.

¹⁰Jech ti Moisese xchi'uc ti Aarone lic yaq'uic iluc ti c'usi ch'ayal ta xc'ot o'ntonal yu'un ta sba ta sat ti faraone. Ti jech pucujibtasbat xa yo'nton faraón yu'un ti Diose, mu'yuc laj yac' loc'uc batel ti israeletic ta Egiptoe.