Read Tzotzil Éxodo 15 Bible Online

Éxodo 15 - Tzotzil bible

Éxodo 15

¹Va'i un, ti Moisese xchi'uc ti israeletique, xi lic q'uejinicuc ta sventa yich'el ta muc' ti Diose: “Ta xiq'uejin ta yich'el ta muc' ti Diose, yu'un ch'ayal c'ot o'ntonal yu'un ti c'u s'elan pojvan ti c'alal laj smut'i ta nab ti ca'etic xchi'uc ti yajvaltaque.

²Ti jq'uejimole, ja' sq'uejintael ti Diose, yu'un ja' yip co'nton, ja' jpojobbail. Ta xcalbe slequilal, yu'un ja' Dios cu'un; ja' Dios yu'un ti jtote, jech ta sc'an ta xcac' ta toyesel ti sc'oplale.

³Ti Diose, stuc no'ox xu' yu'un letovajel. Ja' Ajvalil, ja' jech ti sc'oplal albile.

⁴Ti Diose laj smut'i ta nab ti carretaetique xchi'uc ti soldadoetic yu'un ti faraone; ti bijil jpas-mantaletic yu'une jic'avic ta Tsajal Nab.

⁵Co'ol s'elan ton bajic yalel ta snatil ti nabe; ts'ajal comic ta snabil.

⁶Le' une, Cajval, ja' yip stsatsal ach'ul bats'i c'ob ti laj alilin ti jcontrainvaneje.

⁷Yu'un ta amuc'ul atsatsal, laj atsal ti buch'utic ta scontrainote; laj aloq'ues ti sc'ac'al avo'nton ta stojolique, ti c'aq'uic ta j'ech'el jech c'u cha'al ti jobele.

⁸Yu'un ta yic'al ave laj avuch'ta ti vo'e yo' jech laj spas sba ta cha'ch'ac; yu'un ti syuc'benaltaque lic joybijuc ta smac ti vo'e; yu'un j'ech'el lec tselel jelavel ta o'lol nab.

⁹Ti jcontrainvaneje xi laj snope: ‘Xbat jnuts ja' to ti c'uxi ta jlubtsan ya'iic ta bee. Ta jpuc ta ch'aquel ti c'usi ta jta ta pojele, ja' to ti c'uxi xlaet ta xca'ie. Ta jloq'ues ti espadae, ta coc ta jc'ob ta jtsutsesic ya'iic ta j'ech'el.’

¹⁰Ja' no'ox un, laj avuch'ta ti nabe, tey mucul com, co'ol s'elan plomo yalic batel c'alal to snabil ti vo'e.

¹¹Le' une, Cajval, mu junuc dios xco'olaj jech c'u cha'al ti vo'ote. Mu'yuc buch'u xco'olaj xch'ul talel jech c'u cha'al ti vo'ote. Xi'bal sba ti c'usitic ti jun yutsiquil ta xapase. Ac'oteb o ti ac'bil ta toyol ac'oplale.

¹²Yu'un laj abusanbe ta sba ti amuc'ul atsatsale, ti j'ech'el laj yac' o ti sjol sbaquilic ta lum ach'ele.

¹³Ta xc'uxul avo'nton, ta xatojobtas batel ti avalab anich'nab ti laj apoje, yu'un ta amuc'ul atsatsal, ta xavic' batel ta xch'ul xcuxobil avo'nton ti avaloje.

¹⁴Ti muc'tiquil lumetique ta xniquic ta xi'el ti c'alal ta xa'iique; ti filisteoetique xmich' xa yo'nton ta xa'iic yu'un ti yipale.

¹⁵Ti banquilal soldadoetic yu'un ti Edome mu xa xchi'ucuc xch'ulel ta xa'iic; ti banquilaletic yu'un ti moabitaetique ta xniquic ta xi'el; ti cananeoetique, scotolic, nom c'ot yu'unic ti jelavem xu' yu'unique.

¹⁶Tey xa c'alaluc un, Cajval, ac'o xi'icuc, u'ninaticuc yu'un ti xi'el ta j'ech'ele. Ta sventa ti smuc'ul stsatsal ti avoc ac'obe, altsanbilicuc ti jeche' lamalic jech c'u cha'al ti tonetique, ja' to ti mi jelavic batel ti avalab anich'nab ti ja' jun jteclum ti laj abis ta avu'une.

¹⁷Mu'yuc xa c'usi un, Cajval, ic'uncutic xch'a batel ta naclej ta ach'ul vits, ti bu t'ujbil avu'un sventa naclebale, ta ach'ulna ti bu ta avoc ta ac'ob laj ava'ane.

¹⁸Yu'un ti Diose ja' ta spas mantal sbatel osil.”

¹⁹C'alal ochic batel ta nab scarretatac xchi'uc cajlejetic ta ca' yu'un ti faraone, jech ti Diose laj yac' mut'ijuc yalel ta nab. Yan ti israeletique co'ol s'elan taquin banomil ech' xtuch'ic ti nabe.

²⁰Ti me' j'alc'op María ti ja' xchi'il ta voq'uel ti Aarone, tey lic ta xchijolanel chij-chij taq'uin. Va'i un, lic xchanic scotol ti antsetique, jmoj x'ac'otajic xa liquel ti c'alal xchijchun no'ox yu'unic ti chij-chij taq'uine,

²¹ti c'alal ja' o xi ta xnitatic ta q'uejimole: “Q'uejinanic yu'un ti Diose, yu'un ch'ayal c'ot o'ntonal ti c'u s'elan pojvan ti c'alal laj smut'i ta nab ti ca'etique xchi'uc ti yajvale.”

²²Ti Moisese laj yal ti ac'o loq'uicuc batel ti israeletic ti jech oyic ta sti'il Tsajal Nabe. Jech o xal un, xanavic batel oxib c'ac'al ta sbajtical banomil yu'un Shur. Ja' no'ox un, mu'yuc laj staic batel vo' ti ta bee.

²³C'alal c'otic ta Marae, mu stac' xuch'ic ti vo' ti laj staic teye, yu'un toj ch'a. Jech o xal ti bu taje, laj yac'beic sbi Mará.[5]

²⁴Ti c'u yepal svoloj sbaic batele lic chopol c'opojicuc ta stojol ti Moisese, ti xi lic sjac'beique: “¿C'usi ta xcuch'tic?”

²⁵Va'i un, ti Moisese laj sc'anbe ti ac'o coltaatuc yu'un ti Diose. Jech ti Diose laj yac' iluc jpets te'. Ti jpets uni te'e, laj sjip ochel ta vo' ti Moisese, lecub ti vo' xtoque. Ti bu taje, lic q'uelbaticuc yo'ntonic yu'un ti Diose, ti ac'batic jun mantal ti lecuc ac'o spas sbaique.

²⁶Xi albatique: “Mi ta xats'etan lec achiquinic ta ya'yiel ti c'usi ta xcal ti vu'un Ajvalil Diosun avu'unique, mi ja' ta xapasic ti c'usi lec ta xquile, mi ta xc'ot ta ch'unel avu'unic ti jmantaltaque, mi ta xc'ot ta pasel avu'unic ti oy c'usi tsots sc'oplal albil cu'une, mu'yuc ta jtac talel jtosuc ta atojolic ti c'usi chopol jech c'u cha'al laj jpas ta stojol ti egipcioetique. Yu'un vu'un jpoxtavanejun, jcoltavanejun, ti Ajvalil Diosun avu'unique.”

²⁷Ts'acal to un, c'otic ta yosilal Elim. Ti bu taje, oy lajcha'ch'oj (12) sat vo'etic, xchi'uc lajuneb xchanvinic (70) ta pets muc'tiquil xan. Lic sva'an yaxibalnaic ta sts'el ti sat vo' taje.