Read Tzotzil Éxodo 16 Bible Online

Éxodo 16 - Tzotzil bible

Éxodo 16

¹Scotol ti c'u yepal xvoletic ti israeletique, loq'uic batel ti ta Elime. Batic ta sbajtical banomil Sin ti oy ta o'lol yu'unic ti Elime xchi'uc ti Sinaie. Ja' xa ta yo'lajunebal (15) sc'ac'alil ti xchibal (2) yual ti loq'uic talel ta Egiptoe.

²Ti bu ti sbajtical banomil taje, scotolic liquic ta vulajetel ta scontrainel ti Moisese xchi'uc ti Aarone,

³ti xi ta xalbeique: —¡Ja' lec ma' ti chamcuncutic yu'un ti Dios ta Egiptoe! Yu'un ti teye, jbej no'ox bin jbeq'uetcutic xichotetcutic, xchi'uc ta jti'cutic ti bu xa c'alal xal ti co'ntoncutique. Ja' no'ox un, ti vo'oxuque laj avic'uncutic talel ta sbajtical banomil yo' jech tal amiluncutic ta vi'nal jcotolcutic.

⁴Va'i un, ti Diose xi laj yalbe ya'i ti Moisese: —Ta xcac' taluc ve'lil ta vinajel. Ja' yu'un un, ti jnaclejetique, tsots sc'oplal jujun c'ac'al, ta xloq'uic batel ta stsobel ti c'u yepal ta stunesic ta sventa ti jujun c'ac'ale. Ta jc'an ta jq'uel ca'i buch'utic ta xch'unic ti c'u s'elan ta xich'ic albele, buch'utic mu'yuc.

⁵Yan, c'alal ta sta ti svaquibal (6) c'ac'ale, ti c'u ono'ox yepal ta xchapanic ti ta xich'ic batel ta nae, le' une, sc'an ac'o xchapanic ta sventa chib c'ac'al ti c'u yepal ta stsobic ono'ox ti jujun c'ac'ale.

⁶Jech ti Moisese xchi'uc ti Aarone xi laj yalbeic ya'i ti israeletique: —Ti mal c'ac'al tana li'e, ta xana'ic ti ja' stuc Dios laj sloq'uesoxuc talel ta Egiptoe.

⁷Yu'un ti sob oc'ome, ta xavilic slequilal yutsilal ti Diose. Yu'un laj xa ya'i ti xabic'tal c'opojic ta scontrainele. Mu smeloluc, ¿buch'u laj sva'anuncutic un cha'e ti xabic'tal c'opojic xa ta jtojolcutique?

⁸Ti Moisese xi to laj sts'ac batel ti slo'ile: —Yu'un ti Diose ta xac' talel beq'uet ati'ic ta smalil c'ac'al. Ti ta sobe, ta xayac'boxuc ep ti c'usi xu' ta xameltsan ti avotique. Yu'un laj xa ya'i ta xchiquin ti xabic'tal c'opojic ta scontrainele. Mu smeloluc, ¿buch'u laj sva'anuncutic un cha'e? Yu'un ti jech xabic'tal c'opojic xa ta scontraineluncutique, ma'uc ta xacontrainuncutic, yu'un ja' ta xacontrainic ti Diose.

⁹Laj taj une, ti Moisese xi laj yalbe ya'i ti Aarone: —Albo ya'i scotol ti israeletique ti ac'o nopajicuc talel ta stojol ti Diose. Yu'un laj xa ya'i ti xbic'tal c'opojic xa ta stojole.

¹⁰C'alal yacal ta xc'opoj ti Aarón ta stojol ti israeletique, scotolic laj sq'uelic batel ta stuq'uil sbajtical banomil. Ja' o vinaj talel ta toc yutsilal slequilal ti Diose.

¹¹Va'i un, ti Diose xi laj yalbe ya'i ti c'alal laj sc'opon talel ti Moisese:

¹²—Laj xa ca'i ti xbic'tal c'opojic xa ti israeletique. Ja' yu'un un, chi'ino ta lo'il ti xi xavalbe ya'ie: “Ta mal c'ac'al tanae, ta xave'ic ta beq'uet. Yan ti ta sobe, ta xave'ic ti jchop o ta vaje, ja' to ti c'uxi ta xnojic lec yu'une. Ja' to jech ta xana'ic ti vu'un Ajvalilune, ti ja' Diosun avu'unique.”

¹³Ti ta smalil no'ox c'ac'al taj une, laj talicuc epal ubetic. Noj vul ti bu oyique. Ti ta sacubel osile, sts'ujulin no'ox banomil ta joyob ti bu oyique.

¹⁴Ts'acal to un, c'alal laj ti jech slislun ta xyal talel ti job ac'ubale, ti sbajtical banomile, jun yutsil sac mesanil com jech c'u cha'al ta xac' ti taive.

¹⁵Ti jech mu bac'ni xilic o ti israeletique, mu sna'ic c'usi ta xtun o. Ja' yu'un un, xi lic sjac'olanbe sbaique: “¿C'usi ti q'ue s'elan le'e?” Xi albatic yu'un ti Moisese: —Le'e, ja' c'ot ta xq'uexol avotic ti ta xac' atun alajesic ti Diose.

¹⁶Ti ta sventa le'e, xi me smantalil yaloj ti Diose: Tsobic ti c'u yepal ta xtun ti xloc' o lec ta ve'el avu'unic ti jujunoxuc ti jayiboxuc jujuchop ta avaxibalnaique. Tsobic jutuc mu cha'vochuc, mi x'ech' jutuc ti jujune.

¹⁷Ja' jech laj spasic ti israeletique. Oy jlom x'ech' jutuc laj stsobic. Oy jlom mu sta laj stsobic.

¹⁸C'alal laj stsobic jech c'u cha'al albilic ti sbisole, ti buch'u ep laj stsobe, mi ja'uc com scomelal yu'un. Ti buch'u juteb laj stsobe, lec loc' o yu'un. Yu'un laj stsobic jujun ti c'u yepal ta sve'ique.

¹⁹Ts'acal to un, xi albatic yu'un ti Moisese: —Mu me buch'u sq'uej comel ti ta xtun yu'un ta yoc'omale.

²⁰Ac'o mi jech laj yich'ic albel un, oy jlom mu'yuc laj yich'beic ta muc' sc'op ti Moisese. Laj sq'uejic ti jlome yo' jech ta xtun yu'unic ta yoc'omal. Ja' no'ox un, och xuvital, tuib xtoc. Jech o xal ti Moisese soc sjol ta stojolic.

²¹Ta jujun tal chba stsobic ta jujun sob ic'luman ti c'u yepal ta xtun yu'unic ti ta sve'ique. Yu'un ta x'unij yu'un ti c'ac'ale.

²²C'alal ta sta ti svaquibal c'ac'ale, ta stsobic talel sve'elic ti nopol chanbochuc ti jujun vinic xcaltique. Jech o xal ti banquilaletic yu'unic ti jujuchope bat xchapbeic ya'i ti Moisese.

²³Va'i un, xi albatic yu'un ti Moisese: —Ti va'i s'elan taje, ja' no'ox jech yaloj mantal ti Diose. Yu'un ti oc'ome, ja' cuxob o'ntonal, jun cuxob o'ntonal ti ja' t'ujbil yu'un ti Diose. Meltsanic ti ave'elic ti c'u s'elan sc'an meltsanel ti jun c'ac'al li'e. Lacanic ti c'usi sc'an lacanele, ti c'usi sc'an pasel ta xavilique. Ti c'u yepal ta xcom scomelale, q'uejic sventa yoc'omal.

²⁴Jech laj spasic jech c'u cha'al albatic mantal yu'un ti Moisese. Ja' yu'un un, laj sq'uejic ti scomelale yo' jech ta stunesic ta yoc'omal. Mu'yuc tuib, mi ja'uc och xuvital.

²⁵Ja' yu'un un, xi albatic yu'un ti Moisese: —Ve'anic tana ti scomelal ti c'usi laj aq'uejique. Yu'un ja' sc'ac'alil cuxob o'ntonal ti t'ujbil yu'un ti Diose. Yu'un ti c'ac'al li'e, mu'yuc c'usi ta xataic ta stsobel ti ta osiltique.

²⁶Vaquib (6) c'ac'al sjalil xu' xatsobic ti c'usi ta xtun avu'unique. Ja'uc ti ta yucubal (7) c'ac'ale, ja' sc'ac'alil cuxob o'ntonal. Jech o xal un, mu'yuc c'usi x'ayan.

²⁷Ja' no'ox un, ti ta yucubal (7) c'ac'ale, oy jlom yu'unic loq'uic batel ta stsobel ti c'usi ta xtun yu'unique. Ja' no'ox un, mu'yuc c'usi laj staic jutebuc.

²⁸Va'i un, ti Diose xi laj yalbe ya'i ti Moisese: —¿C'usi to ora ta xabic'tajes abaic ti mu xavaq'uic ta venta ti jmantaltaque xchi'uc ti chanubtaseletic cu'une?

²⁹Aq'uic ta venta ti vu'un Ajvalilun ti cac'oj jun c'ac'al ti cuxobil o'ntonale. Jech o xal ti c'alal ta sta ti svaquibal (6) c'ac'ale, ta xcac'boxuc ave'elic sventa chib c'ac'al. Ja' yu'un un, ti yucubal (7) c'ac'ale, mi ja'uc xaloq'uic ta anaic, tey comanic.

³⁰Va'i un, ti jnaclejetique laj xcux yo'ntonic ta yucubal (7) c'ac'al.

³¹Ti israeletique, maná, laj yac'beic sbi ti c'usi ta xc'ot stsobic talele. Yu'un sac ta q'uelel, xc'atajtic ta nich culantu yilel. Co'ol s'elan jayal pac'anbil bacubtasbil harina ti chi'chi'tic ta ajapome.

³²Ts'acal to un, xi laj yal ti Moisese: —Ti va'i s'elan taje, xi s'elan ma' ti laj yal mantal ti Diose: “Nojesic ta maná jun sbisol ti x'och yu'un cha'boche. Q'uejic yo' jech ta xilic ti anitilulic ti c'u s'elan laj cac'boxuc ave'elic ta sbajtical banomil ti c'alal laj jloq'uesoxuc talel ta Egiptoe.”

³³Yan ti Aarone xi albat eque: —Chapano junuc moch. Tic'o ochel cha'bochuc maná. Ts'acal to un, ac'o ta stojol ti Diose. Ac'o yich' q'uejel yo' ta sq'uelic ti anitilultaque.

³⁴Jech laj yich' pasel ti va'i s'elan laj yich' albel mantal yu'un Dios ti Moisese. Jech ti Aarone bat yac' ti moch ta xcaxail tratee yo' jech ta xich' q'uejel tey.

³⁵Ti israeletique, cha'vinic (40) jabil sjalil, laj sve'ic ti manae, ja' to ti c'alal c'otic ta banomil ti bu oy ti jnaclejetique. Ti lec xcaltique, tey to staoj yav ta sve'ic ja' to ti c'uxi c'otic ta sti'il yosilal ti Canaane.

³⁶(Ti sbisol ta jun gomere, ta xloc' jch'ac ta lajunch'ac ti jun efae.)