Read Tzotzil Éxodo 17 Bible Online

Éxodo 17 - Tzotzil bible

Éxodo 17

¹Scotolic ti c'u yepal xvoletic ti israeletique, loq'uic batel ti oyic ta sbajtical banomil Sine. C'un c'un batic jech c'u cha'al yaloj ti Diose. Ts'acal to un, c'ot stsob sbaic ta Refidim. C'u stu un, mu'yuc vo' yo' ta xuch'ic ti lum israeletique.

²Ja' yu'un un, xi xvulajetic liquel ti laj stsaquic ta il ti Moisese: —¡Ac'buncutic vo' cuch'cutic! Xi laj stac' ti Moisese: —¿C'u cha'al ta xatsaquicun ta utel? ¿C'u cha'al ta xaq'uelbeic ava'iic yo'nton ti Diose?

³Yu'un ta xlajic xa ta uch' vo' ti jteclume, ja' yu'un un, xi laj yalic ta scontrainel ti Moisese: —¿C'u cha'al laj aloq'uesuncutic talel ta Egipto? ¿C'u cha'al tal amiluncutic ta taqui ti'il jmoj xchi'uc ti calab jnich'nabcutique, xchi'uc scotol ti jchon jbolomcutique?

⁴C'alal c'opoj ti'in ta stojol Dios ti Moisese, xi xvulvun liquele: —¿C'usi xu' ta jpas ta stojol ti lum israeletic li'e? ¡Yu'un ti li'e, chapal xa jc'oplal ti ta xismilicun ta tone!

⁵Xi tac'bat yu'un ti Diose: —Jelavan batel ta jba'be yu'un ti jteclume. Chi'ino batel jun chibuc moletic yu'un ti Israele. Tamo batel ti avaxton ti laj amaj o xchi'uc ti uc'ume, xan me ach'a un.

⁶Tey ta jcaj-malaot ta vits Horeb ta sba jun muc' ta ton. C'alal ta xamaj ti muc' ta tone, ta xloc' talel vo' yo' jech ta xuch'ic ti jteclume. Va'i un, ti Moisese jech laj spas ta sba ta sat ti moletic yu'un ti Israele.

⁷Ti bu taje, laj sbiin yu'un Meriba,[6] yu'un ti israeletique toj tsots vulvanic. Laj yac'be sbiin Masá xtoc,[7] yu'un xi laj yalic ti laj sq'uelbeic yo'nton ti Diose: “¿Mi li' oye, mi mu'yuc li' oy ti Dios ta jtojoltique?”

⁸Ti amalecitaetique laj stam batel sbeic ta Refidim yo' jech ta stsaquic ta leto ti israeletique.

⁹Va'i un, ti Moisese xi laj yalbe ti Josuee: —T'ujo c'uc yepal viniquetic. Loc'anic batel ta stsaquel ta leto ya'iic ti amalecitaetique. Yu'un sob oc'om, oyun ta jol vits xchi'uc svaxton ti Dios ti oy ta coc ta jc'obe.

¹⁰Ti Josuee jech laj spas jech c'u cha'al albat yu'un ti Moisese. Loc' batel ta stsaquel ta leto ti amalecitaetique. Ja' jech ec ti Moisese, ti Aarone, ti Hure, muyic batel ta stselej.

¹¹C'alal xlich'oj ta toyol sc'ob ti Moisese, jech ti israeletique mu'yuc xi'el yu'unic, spasojic canal ta tsalvanej ti c'alal xc'anobaj ti letovajele. Yan ti mi ta syales ti sc'obe, ja' ta xlic spasic canal ta tsalvanej ta leto ti amalecitaetique.

¹²Ta scoj ti jech taj une, yu'un lub xa ta j'ech'el sc'obtac ti Moisés ta xa'ie, jech o xal laj sa'ic talel jbej ton, tal sbejanbeic yo' jech ta xchotlebin yu'unic. Va'i un, ti Aarone xchi'uc ti Hure, jujun sc'ob laj yicbeic va'ajtic ta jujujot xocon. Ti jech laj spasic taje, ja' to jech cuch yu'un ti xlich'oj o sc'ob ti Moisese, ja' to c'alal xch'ay batel ti c'ac'ale.

¹³Va'i un, ti Josuee laj sq'ui ta milel ta espada ti epal soldado amalecitaetique.

¹⁴Ja' yu'un un, ti Diose xi laj yalbe ti Moisese: —Ti jech le'e, ts'ibao ta jpoc vun yo' jech na'bil ta xcom sc'oplal. Albo ya'i xtoc ti Josuee ti vu'un ta jch'ay ta o'ntonal sc'oplal ti amalecitaetique.

¹⁵Va'i un, ti Moisese laj smeltsan jun altar ti laj yac'be sbi “Ja' c'ot ta jbandera ti Diose.”

¹⁶Yu'un xi laj yale: “Ti sbandera Diose xlich'et no'ox ta toyol ti oy ta c'obale. Yu'un ti Diose ochem ta letovajel xchi'uc ti amalecitaetic ti jaylajun q'uexel ta x'ech'ic ti snitilultaque.”