Read Tzotzil Éxodo 18 Bible Online

Éxodo 18 - Tzotzil bible

Éxodo 18

¹Ti Jetro ti ja' pale yu'un ti Madiane, smuni' xtoc ti Moisese, laj ya'i scotol ti c'usi laj spas ti Dios ta stojol ti Moisese, xchi'uc ta stojol ti israeletique. Laj ya'i xtoc ti ja' loq'uesatic talel ta Egipto yu'un ti Diose.

²C'alal laj xch'ac sbaic xchi'uc yajnil ti Moisese, ja' ti Seforae, jech ti Jetroe laj yic' ochel ta sna ti ja' yantsil nich'one.

³Ja' jech xtoc laj yic' ochel ta sna ti chib yole. Ti june, ja' Gersón sbi, ja' ti xi ono'ox laj yal ti Moisese: “Ti ta banomil li'e, jyanlumun.”

⁴Ti jun xtoque, laj yac'be sbi Eliezer,[8] ja' ti xi ono'ox laj yale: “Ti Dios yu'un ti jtote tal ta jtojol, tal scoltaun. Yu'un laj spojun ta yoc ta sc'ob ti faraón ti sc'an ox ta smilun ya'i ta espadae.”

⁵C'alal oy xa ox ta sbajtical banomil ti Moisés ta nopol vits yu'un ti Diose, bat ec ti Jetroe, xchi'ucbe batel ti yajnile, xchi'uc xnich'nab ti Moisese.

⁶Xi laj yalbe ti Moisese: —Vu'unun ti Jetro ti amuni'une, tal jq'uelotcutic xchi'uc ti avajnile, xchi'uc ti chib anich'nabe.

⁷Jech ti Moisese loc' batel, bat snup ta be ti smuni'e. Laj snijan sba ta stojol, laj snup. C'alal laj slo'ilique, laj yic' ochel ta yut yaxibalna.

⁸Ti bu taje, ti Moisese lic xchapbe ya'i smuni' scotol ti c'u s'elan laj spas ti Dios ta stojol ti faraone, ta stojol ti egipcioetic ti laj sva'an sba ta spojel ti Israele. Laj xchapbe ya'i xtoc scotol ti vocoletic ti laj staic ta bee, xchi'uc ti c'u s'elan ep ta tos coltavan ti Diose.

⁹Jech ti Jetroe xmuyubaj xa ti laj ya'i ti ep laj yac' ta ilel xc'uxul yo'nton ti Dios ta stojol ti israeletic ti laj spoj loq'uel ta yoc ta sc'ob ti egipcioetique.

¹⁰Xi laj yale: —Toj jun yutsil ti Dios ti laj spojoxuc ti vo'oxuc israeloxuc ta yoc ta sc'ob ti faraone, ta yoc ta sc'ob ti egipcioetique. Ti Diose laj spojoxuc ta yoc ta sc'ob ti jcontrainvaneje,

¹¹ti mu albajuc chopol ti c'usi laj spasboxuque. Avi ta un, ta jna' lec ti jelavem smuc'ul stsatsal ti Diose, ti ja' mu sta scotol ti yan diosetique.

¹²Ti Jetroe laj stsac talel jcot chon bolom, ti ac'o yich' chiq'uel jmoj xchi'uc ti yan matanaletic ta sventa yich'el ta muc' ti Diose. Ts'acal to un, ti Aarone xchi'uc scotol ti moletic yu'un ti israeletique, jmoj batic ta ve'el xchi'uc smu'ni' ti Moisés ta sba ta sat ti Diose.

¹³Ta yan c'ac'al un, ti Moisese choti ta xchapanel c'opetic yu'un ti israeletique. Jech ti israeletique sjunul c'ac'al tey va'ajtic ta sts'el ti Moisese.

¹⁴C'alal ilat ti Moisés ti jech ta spas ta stojolique, xi albat yu'un ti smuni'e: —¿C'usi ta xapas ta stojol ti jnaclejetic xcal le' une? ¿C'u cha'al ti atuc no'ox chotolot yu'unique, yu'un scotol ti yane jeche' va'ajtic sjunul c'ac'al avu'un?

¹⁵Xi laj stac' ti Moisese: —Ti israeletique ta xtalic ta jtojol, yu'un ta sc'anic chapanel ti c'usi lec ta xil ti Diose.

¹⁶C'alal oy c'op yu'unique, ta xtalic ta jtojol yo' jech ta xcac'be sna'ic buch'utic oy lec smelol ti sc'opique. Va'i unbi, ta xcac'be sna'ic ti c'usi ta xal ti oy c'usitic tsots sc'oplal albile, xchi'uc ti chanubtaseletic yu'un ti Diose.

¹⁷Va'i un, xi bijubtasat yu'un ti Jetro ti ja' smuni'e: —Mu lecuc ti jech ta xapas le'e.

¹⁸Ta xalub. Ja' jech xtoc ta xlubic ec ti buch'utic va'ajtic ta atojole. Mu xcuch avu'un ti epal abtele. Mi ja'uc xcuch avu'un ta yabtelanel ti atuc no'oxe.

¹⁹A'yibun ava'i ti xi ta xajbijubtasote. Dios ta xa scoltaot. Ti vo'ote, coman no'ox ta j'et'esej-c'op yu'un ti Dios ta stojol ti israeletique. Ac'bo sbain scotol ti c'opetic yu'unique.

²⁰Jech ti stuquique, ac'bo lec sna'ic c'usi ta xal ti oy c'usitic tsots sc'oplal albile, xchi'uc ti chanubtaseletique. Ac'bo sna'ic c'u s'elan ta stamic batel, xchi'uc c'u s'elan xu' ta spasic.

²¹Va'i un, ti vo'ote, ja' avabtel ta scotol ti ta xat'uj viniquetic ti oy sbijilique, ti sna' xi'taic ti Diose, ti jamal ye sti'ique. T'ujo viniquetic ti ma'uc batem ta yo'nton ta spasel ti c'usi lec ta xa'iique. Ti jujunic ti ta xat'uje, ac'bo yabtelic ta sbainel jmiluc (1,000) ta vo' xchi'ilic ti jujune, vo'vinic (100) ta vo' ti yane, lajuneb yoxvinicuc (50) ta vo' ti yane, lajunvo'uc (10) ti yane.

²²Sbainoj ta xc'ot ta xchapanel ti jteclume. Ja'uc ti c'usi tsotsic ti mu xchapaj yu'unique, ta xac' ta avoc ta ac'ob ta xchapanel. Yan ti bic'tal c'opetique, ac'o xchapan ti stuquique. Ja' to jech ta xyoch ti avabtel ti ep abainoje. Yu'un ja' no'ox jech xu' ta scoltaoxuc ta sbainel.

²³Ti mi jech ta xapas taje, ti mi jech ta xayalbot ti Diose, xu' avu'un. Jech ti israeletique jun yo'nton ta sut batel ta snaic.

²⁴Ti Moisese laj xch'un ti va'i s'elan albat yu'un ti smuni'e. Lic spas scotol ti c'u s'elan albate.

²⁵Va'i un, lic st'uj viniquetic ti oy sbijilic ta sbainel ti Israele. Laj yac'anbe yich' yabtelic yo' ta sbainic jvoc'uc ta jmil (1,000) ta vo', jvoc'uc ta vo'vinic (100) ta vo', jvoc'uc ta lajuneb yo'vinic (50) ta vo', jvoc'uc ta lajunvo' (10).

²⁶Va'i un, ti stuquique ja' lic xchapanic ti c'uc no'ox ora ta sc'anic chapanel ti israeletique. Yan ti c'op ti bu tsots ta chapanele, ja' ta xac'beic xchapan ti Moisese. Ti bu mu tsotsuc ta chapanele, ja' ta xchapan stuquic.

²⁷Ts'acal to un, ti Moisese laj xch'ac sbaic xchi'uc ti smuni'e. Jech ti smuni'e sut batel ta slumal.