Read Tzotzil Éxodo 25 Bible Online

Éxodo 25 - Tzotzil bible

Éxodo 25

¹Ti Diose xi laj yal ti c'alal laj sc'opon talel ti Moisese:

²“Albo ya'iic ti israeletique ti ac'o stsobbeic ti c'usitic oy yu'unic yo' ta xiyac'beique. Tsobbeic ta scotol ti buch'u ta xloc' x'ayan ta slequilal yutsilal yo'nton ti c'usi ta xaq'uique.

³Xi s'elan ti c'usi tsots sc'oplal ta xatsobique: ja' ti oroe, ti platae, ti c'anal taq'uine,

⁴ti jilich' poc' ti ic'-ic' losan stsajale, ti yax'elantic stsajale, ti tsoj sliquile, ti saquil poc' ti c'upil sba xnichimaltaque, ti jalbil tsotsil tentsune,

⁵ti nuculil chij ti bonbil ta tsoje, ti nuculetic ti c'upil sba yutsile, ti acacia te'e,

⁶ti yaceiteal lamparae, ti muil poxiletic sventa scap ti jtunel aceitee, xchi'uc scap ti pom ti jun yutsil smuile,

⁷ti baxton ti tsoj-tsojtic xojobal ta q'uelele, ti yan c'upil sba baxtonetic ti ta xich' noch'anel ta loin c'u'ile xchi'uc yuil ti banquilal palee.

⁸Meltsanbeicun junuc Axibalna yo' jech ta xinaqui tey.

⁹Ja' no'ox un, ti bu ta xinaqui taj une, scotol ti c'usitic ta xtun xtoque, tsots sc'oplal co'oluc me xbat jech c'u cha'al ta xcac'bot avile.

¹⁰“Meltsano junuc caxa ta acacia te' ti ja' vo'ch'ix xchi'uc jquejlej (1.10mts.) ti snatile, ti ja' oxch'ix xchi'uc o'lol jquejlej (.75cms.) ti sjamleje, ti oxch'ix xchi'uc o'lol jquejlej (.75cms.) ti stayleje.

¹¹Bonbo ta bats'i oro ti yute, ti spate. Ja' jech xtoc, oro xavac'be xnichimaltac ta joyob.

¹²Ja' jech xtoc, meltsanbo chanibuc xotbil oro. Va'i un, noch'anbo ta xchanjotal ti bu tsacajtic ti yoque. Chib ta xich' ti jot xocone. Chib xtoc ti ta jot xocone.

¹³Meltsanbo ta acacia te' sc'atlomte'altac. Bono lec ta oro.

¹⁴Jech ti te'e, xojo jelavel ti ta xot-xot oro ti noch'anbil ta jujujot xocon stsacleb ti caxae yo' jech xu' ta xich' chechel batel.

¹⁵Tey me comuc o avu'un xchi'uc ste'eltac ti oy ta xot-xot staq'uinaltac ti caxae.

¹⁶Va'i un, tey xatic' ochel ta caxa ti bu ts'ibabil ti oy c'usi tsots sc'oplal albile, ti ta xacac'bote.

¹⁷“Meltsanbo smac sti' ta bats'i oro ti ja' vo'ch'ix xchi'uc jquejlej (1.10mts.) ti snatile, ti ja' oxch'ix xchi'uc o'lol jquejlej (.75cms.) ti sjamleje.

¹⁸Loc'tao chibuc sloc'obbail ti c'usi oy xic'tac ti ja' oroe, ti ja' anbil lec ta yanobile. Va'ano ta jujujot xocon sba smac ti caxae.

¹⁹Ti smaque xchi'uc ti c'usi oy xic' loc'tabile, tsots sc'oplal ti jun no'ox nitil ta xcom xchi'uque. Ti jujun loc'obbaile va'ajtic ta xcom ta jujujot xocon ta sba smac ti caxae.

²⁰Ti jujunique, yelovtaoj sbaic ti co'ol yac'oj yalel satic ta smac ti caxae, xlich'oj xiq'uic ta smaquel.

²¹Mi chapaj avu'un ta smeltsanel une, va'i un, nujanbo smac sti' ti caxae. Ti ta yut ti caxae, tic'o ochel tey ti bu ts'ibabil ti oy c'usi tsots sc'oplal albile, ti ta xcac'bote.

²²Va'i un, ta toyol ti oy ta stuq'uil sba xcaxail ti trate ti bu va'ajtic ti chib ti c'usi oy xiq'uique, tey ta jvinajes jba ta atojol, ti ta xcac'bot ana' scotol ti jmantal ti ta xavalbe ya'i ti israeletique.

²³“Meltsano junuc mexa ta acacia te' ti ja' chanch'ix xchi'uc jch'utub (.90cms.) ti snatile, cha'ch'ix xchi'uc o'lol jquejlej (.45cms.) ti sjamleje, oxch'ix xchi'uc o'lol jquejlej (.75cms.) ti stayleje.

²⁴Va'i un, bono sjunlej ta bats'i oro. Oro xavac'be xnichimal ta joyob.

²⁵Jquejlej xameltsanbe ti stseque. Nichimtaso ta oro sjoylej ti stseque.

²⁶Meltsanbo chanib xotbil oro ti ta xanoch'anbe ta jujujot xchanjotal xocon ti bu tsacajtic ti yoque.

²⁷Va'i un, tsacal lec ta xcom xchi'uc ti stsectaque yo' jech xu' ta xojbeic sc'atlomte'al sventa xchechobil ti mexae.

²⁸Ta acacia te' ta xameltsanbe ti sc'atlomte'ale yo' jech xu' ta xich' chechel batel ti mexae. Ja' jech xtoc, bono ta oro.

²⁹Ta bats'i oro ta xameltsan ti sets'etique, ti slupobiltaque, ti jarruetique, ti bisetic sventa ti c'usi sts'anlajet ta xich' aq'uel ta matanale.

³⁰Ti pan ti c'u yepal ta xc'ot ta cu'une, ta xmexail xavet'esbun talel ta jtojol.

³¹“Ta xameltsan xtoc jun pajleb cantilaetic ti ja' bats'i oro ti anbil ta yanobile. Ac'bo xchotleb, yacan, bisetic ti set-set stseque, ti oy xnichimal ti jun no'ox nitile.

³²Ti ta jujujot xocone, ta xavac'be loq'uel sc'obtac ti ta xc'ot ta vaquib ti ta xcha'jotale, oxib ta jot, oxib ta jot.

³³Ti ta jujun ti vaquib sc'ob ti loq'uem ta yacan ti spajobil cantilae, ta sc'an ti oyuc oxib bis ti co'ol s'elan xnich almendro ti tsacal xchi'uc yanal ti xnichimal stsec ta xich'e.

³⁴Ti ta yacane, oyuc chanib sloc'obbail bis ti co'ol s'elan nich almendroe, ti tsacal xchi'uc yanal ti xnichimal stsec ta xich'e.

³⁵Ti ta jujun ti snupul-nup ti oxib sc'ob ti bu tsacal liquel ti spajleb cantilaetique, ta xich' xnichimal ta yolon.

³⁶Ti ta stsectaque, ti ta sc'obtaque, ta sc'an ti nitil ta xcom ti bu tsacal liquel ti pajleb cantilaetique, ti ja' bats'i oroe, ti ja' anbil lec ta yanobile.

³⁷Meltsano xtoc yan vucub lamparaetic ti joc'ajtic ta xac' batel xojobal ta yelove.

³⁸Ja' jech xtoc ti slots'obiltaque, ti xlechlebtaque, meltsanbiluc ta bats'i oro.

³⁹Oxlajuneb xcha'vinic (33) kilo bats'i oro ta xatunes yo' ta xameltsan ti spajleb cantilaetique xchi'uc ti c'u yepal ta xtun ta scotole.

⁴⁰A'yio ava'i, jech me xapas scotol jech c'u cha'al la'ac'bat avil sloc'obbail ti ta vitse.