Read Tzotzil Éxodo 26 Bible Online

Éxodo 26 - Tzotzil bible

Éxodo 26

¹“Ta xameltsan Axibalna. Ta xavac'be lajunlic (10) smac ta saquil poc' ti polajtic ts'otbenale, ti ic'-ic' losantic sba tsajal poq'ue, ti yax'elan yaxal poq'ue, xchi'uc ti tsajal poq'ue. Taje, ta xaluchbe chib sloc'obbail ti c'usi oy xiq'ue.

²Scotol ti muc' ta poc' taje, jun ti sbisol ta xich'e, lajcheb metro xchi'uc o'lol (12.50mts.) ti snatile, chib metro xtoc ti sjamleje.

³Nito ta ts'isel ti vo'lic smaque. Ja' jech ti yan vo'lic xtoque.

⁴Va'i un, ta xajomanbe sattac. Ta xabal ta ts'isel ta ic'-ic' losantic tsajal no ti sba sti'iltac ti yo'licale. Ja' no'ox jech xapas xtoc ti jchop vo'lique.

⁵Ti jvoc' ba'yel smaque xchi'uc ti jvoc' xchibal smaque, ta xapasbe lajuneb yoxvinic (50) ta jom sat ti snupojan sba ta xc'ote.

⁶Meltsano xtoc lajuneb yoxvinic (50) xotbil oro ti ja' sjoc'leb ti jvoc' smaque, xchi'uc ti yan jvoc' smac xtoque yo' jech lec xotol ta xcom ta sjunul ti Axibalnae.

⁷“Meltsano xtoc buluchlic (11) poc' ti meltsanbil ta stsotsil tentsune, ti ja' ta xc'ot ta spat smac ti Axibalnae.

⁸Scotol ti smactac taje, xi s'elan ti sbisol ta xich'e: ja' oxlajuneb metro xchi'uc o'lol (13.50mts.) ti snatile, ja' chib metro ti sjamleje.

⁹Va'i un, tsaco ta ts'isel yo' jech ta xc'ot ta jlic ti vo'lic poq'ue. Ja' vaclic xatsac ta ts'isel ti jvoq'ue. Ti ta svac-licale, joybino batel ta puxel ta ochebal yu'un ti Axibalnae.

¹⁰Mi laj taj une, meltsanbo lajuneb yoxvinic (50) ta jom sat ta sti'il ti jvoc' ti ba'yel nitbil ta ts'isele. Ja' jech lajuneb yoxvinic (50) ta jom sat ta xavac'be ti jvoc' nitbil ta ts'isel xtoque.

¹¹Meltsanbo lajuneb yoxvinic ta xotbil c'anal taq'uin. Yu'un ja' tey xaxojanan ti bu jomajtic sat ti poq'ue yo' jech ta xmeltsaj batel ta jun no'ox ti Axibalnae.

¹²Ti smactac ti Axibalna ti ja' jelavem ti snatile, tey ac'o joc'ajticuc comuc ti scomelal ta spat ti Axibalnae.

¹³Ja' yu'un ti Axibalnae, xi s'elan sjamlej sjeloj sba joc'ol yalel ti smaque: Ti jot xocone, ja' yich'oj cha'ch'ix xchi'uc o'lol jquejlej (.45cms.) ti sjamlej sjeloj sbae, ja' jech ti jot xtoque.

¹⁴“Ti Axibalnae, meltsanbo yaxib ta nuculil chij ti bonbil ta tsoje, xchi'uc lambo talel jc'oluc c'upil sba lequil nucul ta sba.

¹⁵“Meltsano jaypechuc acacia tenel-te' yo' jech ta xtun yu'un ti Axibalnae. Tuq'uic lec xaloq'ues.

¹⁶Chanib metro xchi'uc o'lol (4.50mts.) snatiquil ti jujupech tenel-te'e. Oxch'ix xchi'uc o'lol jquejlej (.75cms.) ti sjamleje.

¹⁷Ja' jech xtoc oyuc sjelbenal ta jujujot yo' jech lec sjeloj sba sti'il xchi'uc ti yane. Ja' jech xapas scotol ti tenel-te'etic sventa ti Axibalnae.

¹⁸Mi tsuts avu'un une, meltsano jtob (20) ta pech ti ta xtun xi ta stuq'uil yolon ti yac'ol xocon sloq'ueb c'ac'ale.

¹⁹Va'i un, ac'bo cha'vinic (40) scajtac ta yolon ti meltsanbil ta platae. Ti jujupeche, tsots sc'oplal ta xich' jujun scajtac ta jujujot xchiquin.

²⁰“Ja' jech xtoc ti ta jot xocon ti Axibalnae, ti xcaltique, ja' ti oy ta stuq'uil yolon ti yolon xocon sloq'ueb c'ac'ale, ta xameltsan jtob (20) ta pech stenel-te'al xtoc.

²¹Ta xameltsanbe cha'vinic scajtac ti meltsanbil ta platae yo' jech oy chib scajtac ta yolon ti jujupeche.

²²Ti ta spat ti Axibalnae, ti xcaltique, ja' ti xi ta yelov smaleb c'ac'ale, meltsanbo vacpechuc stenel-te'al.

²³Va'i xtoc un, ta xameltsan yan cha'pech tenel-te' ti mayc'unbil jujujot xocon ti ta xtun ta jujujot xchiquintaque.

²⁴Ti tenel-te'etic taje, sc'an sa'bel lec snup yo' jech co'ol lec ti'il ta xc'ot ti ta xlic ta yoc ta xc'ot c'alal to sjole. Va'i un, ja' jech ta sc'an pasel xtoc ti cha'pech tenel-te' ti ta jujujot xchiquine.

²⁵Ti ta scotole, ja' vaxacpech (8) tenel-te' xchi'uc vaclajuneb (16) scajlebtac ti meltsanbil ta platae. Ti xcaltique, chib scajleb yich'oj ta yolon ta jujupech.

²⁶“Meltsano ta acacia te' vo'teluc yo' ta xtun ta sc'atlomte'al ti tenel-te'etic ta sventa jot xocon ti Axibalnae.

²⁷Meltsano vo'tel ta sventa sc'atlomte'al ti tenel-te'etic ti ta xtun ta jot xocone, vo'tel no'ox xtoc ti ta xtun ta sventa sc'atlomte'al ti tenel-te'etic ti oy ta jot ti spate, ti xi ta yelov smaleb c'ac'ale.

²⁸Ti sc'atlomte'al ti ta xich' ta o'lole, c'otem c'alal ta jujujot ti c'atal jelavel ta o'lol ti tenel-te'etique.

²⁹Mi laj taj une, bono ta oro ti tenel-te'etique. Ja' jech xtoc ta oro xameltsanbe ti xot-xot staq'uinaltaque. C'alal mi bonbil xa ox ta oro sjunule, tey ta xich' c'atanbel jelavel ti sc'atlomte'altaque.

³⁰Ja' yu'un un, jech xameltsan ti Axibalna co'ol jech c'u cha'al la'ac'bat avil ti sloc'obbail ta vitse.

³¹“Meltsano jlicuc muc' ta poc' ti ic'-ic' losantic sba stsajale, ti yax'elan xyaxale, ti tsajal poq'ue, xchi'uc ti polajtic sts'otbenal saquil poq'ue. Tey xaluch ta loc'tael chib sloc'obbail ti c'usi oy xiq'ue.

³²Ts'acal to un, ac'bo xotbil oro. Joc'ano ta chanib oyetic ti ja' meltsanbil ta acacia te' ti bonbil ta oroe, xchi'uc xavac'be stsacleb yoc ti ja' meltsanbil ta platae.

³³Va'i un, tey xajoc'an ti muc' ta poc' ti ja' stsacoj ti xotbil oroe. Ti tey ta spat ti bu lich'il ti muc' ta poq'ue, tey xavac' xcaxail ti tratee. Ja' yu'un un, ti muc' ta poc' taje, ja' ta xtun avu'unic sventa smac yo' ch'acal ta xcom ti ch'ul cuartoe xchi'uc ti Bats'i Cuxul Ch'ul Cuartoe.

³⁴Ts'acal to un, tey xavac' ti smac sti' ti xcaxail ti trate ti tey oy ta Bats'i Cuxul Ch'ul Cuartoe.

³⁵Jech ti mexae, tey ta xavac' ta spat ti muc' ta poc' ti lich'il ta stuq'uil yolon ti yolon xocon sloq'ueb c'ac'al yu'un ti Axibalnae. Yan ti spajleb cantilaetique, ac'o ta yeloval mexa ta stuq'uil yolon ti yac'ol xocon sloq'ueb c'ac'ale.

³⁶“Ti ta ochebal sti' ti Axibalnae, ta xavac'be ti muc' ta poc' ti ic'-ic' losantic sba stsajale, ti yax'elan xyaxale, ti tsajal poq'ue, ti saquil poc' ti polajtic sts'otbenale, ti luchbiquil lec xnichimale.

³⁷Ja' jech xtoc ta sventa ti muc' ta poq'ue, meltsanbo ta acacia te' vo'ob yoyal ti ta xabon ta oroe, xchi'uc meltsanbo ta oro xot-xot staq'uinaltac. Uleso c'anal taq'uin sventa ta xtun ta spajleb ti vo'ob oyetique.