Read Tzotzil Éxodo 29 Bible Online

Éxodo 29 - Tzotzil bible

Éxodo 29

¹“Yo' jech ta xava'an ta yich'el yabtel ti cajpaletaque, xi s'elan ta xapas ta stojolic jech c'u cha'al li'e: ic'o talel jcotuc ch'iom tot vacax, xchi'uc cha'cot tot chij ti mu'yuc jutebuc xchopolile.

²Vots'o ta aceite ti lequil t'ujbil harinae yo' jech ta xameltsan panetic, xchi'uc muc'tiquil panetic ti ch'abal ac'bil ti spajubtasobile. Meltsano xtoc jayaquil pac'anbil harina ti ta'ajesbil ta aceitee.

³Va'i un, ac'o ta jun nene' moch yo' jech ta xich' ich'el batel ta Axibalna jmoj xchi'uc ti ch'iom tot vacaxe, xchi'uc ti cha'cot chije.

⁴Ts'acal to un, ti Aarone xchi'uc ti xnich'nabe, ic'o talel ta sti'il ochebal Axibalna ti bu nupel ta bee, ac'o atinicuc avu'un.

⁵Mi laj une, ich'o talel ti c'u'iletic sventa paleale, ac'bo slap sloin c'u' ti Aarone, xchi'uc ti jayal saquil c'u'ile, xchi'uc xmochibal ti jayal saquil c'u'ile, xchi'uc ti uile. Tsino lec ti xchuquilal ti jayal saquil c'u'ile.

⁶Ts'otbo ta sjol ti ts'ot jolile. Ta sba ti ts'ot jolile, noch'anbo ti pech-pech taq'uin ti bu ta xal ti c'otem ta palee.

⁷Tamo ti jtunel aceite sventa ich'ob abtelale, malbo ta sjol ti aceitee ti va'anbiluc c'otuc ta pale avu'un ti Aarone.

⁸Nopajicuc talel avu'un ti xnich'nabe. Lapbo ti sloin c'u'ic xtoque.

⁹Jech ti Aarone xchi'uc ti stuquique, tsinbo lec ti xchuquique. Ac'bo xtoc ti sts'ot sjolique. Ti jech taje, ta xavac'be yich' tsots yabtelic, yu'un ti abtelal ta paleale, j'ech'el mu xtub yu'unic sc'oplal.

¹⁰“Ts'acal to un, ic'o talel ta sti'il ochebal Axibalna ti ch'iom tot vacaxe yo' jech ti Aarone, xchi'uc ti xnich'nabe, ta scajan sc'obic ta sjol ti chon bolome.

¹¹Ti bu taje, ta sba sat ti Diose, ta xamil ti ch'iom tot vacax ta ochebal sti' ti Axibalna ti bu nupel ta bee.

¹²Ts'ajo sni' ac'ob ta ch'ich', jaxbo ta xulubtac ti altare. Ti c'u yepal ta xcom ti ch'ich'e, malo ta yoc ti altare.

¹³Ti xepu'altac ti sbiquile, ti secube, xchi'uc ti sq'uine, joso loq'uel, chic'o ta altar.

¹⁴Yan ti sbec'tale, ti snuculile, xchi'uc ti yic'obal xch'ut ti ch'iom tot vacaxe, chic'o ta loq'uebaltic ti bu lamalic ta nacleje, yu'un ja' laj yich' svocol ta scoj ti mulile.

¹⁵“Ic'o talel jcotuc ta xcha'cotal ti chije. Va'i un, ti Aarone xchi'uc ti xnich'nabe, ac'o scajan sc'obic ta sjol.

¹⁶Ts'acal to un, milo. Jech ti xch'ich'ele, vijbo ta joyob stsectac ti altare.

¹⁷Mi laj une, bic'tal bojilano. Jech ti sbiquile, ti yacane, sapo lec. Tsobo ta jmoj xchi'uc ti sjole.

¹⁸Ja' jech xtoc ti chije, ac'o ta sba ti altare yo' jech ta xich' chiq'uel ta stojol ti Diose, ti jun yutsil ti smuile.

¹⁹“Ts'acal to un, ic'o talel ti jcot chij xtoque. Jech ti Aarone xchi'uc ti xnich'nabe, ac'o scajan sc'obic ta sjol.

²⁰Milo ti chije. Ch'ambo jutebuc xch'ich'el, jaxo ta yolon svelvelul sbats'i chiquin ti Aarone xchi'uc ti xnich'nabe, xchi'uc ta sme' sbats'i c'ob, ta sme' sbats'i acan. Ts'acal to un, vijbo xch'ich'el ti chij ta joyob stsectac ti altare.

²¹Ti c'u yepal ta xcom ti ch'ich' ti tun ta altare, xchi'uc ti jtunel aceitee, tuneso jutebuc. Vijo ta sba ti Aarone, ta sba ti sc'u'taque, ta sba ti xnich'nabe, xchi'uc ta sba ti sc'u'ic xtoque. Ja' to jech ta xc'ot ta yajtunel Dios ti Aarone, ti xnich'nabe, xchi'uc ti sc'u'ique.

²²“Mi laj taj une, tsobo xepu'al ti chij ti oy ta snee, ti oy ta sbiquile, ti oy ta secube. Tsaco ti chib sq'uine xchi'uc ti xepu'ale. Tsaco xtoc ti jec' sbats'i o'e. Yu'un ja' jcot chij ti ta xtun ta sventa ta xich' va'anel ti paleetique.

²³Ti panetic ti mu'yuc ac'bil ti spajubtasobil ti oy ta moch ti oy ta stojol ti Diose, tamo jbejuc ti set-set pane, xchi'uc jbejuc ti vots'bil ta aceitee, xchi'uc jpechuc ti pac'anbil jayal ch'ilbil harinae.

²⁴Scotol taje, ac'bo ta sc'ob ti Aarone xchi'uc ti xnich'nabe. Liqueso ti c'u s'elan sc'an pasel ta stojol ti Diose.

²⁵Mi laj taj une, tsacbo sutel ti oy ta sc'obique, chic'o ta altar, ti ja' jun muil matanal ti lec ta xa'i ti Diose. Yu'un ja' jun matanal ti ta xich' chiq'uel ta sventa yich'el ta muc' ti Diose.

²⁶“Ti jpech sti' yo'nton ti chij ti ta xtun ta sventa ta xich' va'anel ta yabtel ti Aarone, tsaco, ye'ilano ta stojol ti Dios ti c'alal ta xavaq'ue. Ti jpech taje, ja' ta xc'ot ta avu'un.

²⁷“Ti spechel sti' yo'nton ti chije, xchi'uc ti sbec'tal yo'tac ti ta xtun ta sventa ti lajesobil o'ntonale, ti ta xich' ye'ilanel ta stojol ti Diose, ja' xa c'ot ta yu'un ti Aarone, xchi'uc ti xnich'nabe.

²⁸Ti matanaletic ti ta xich'ic talel ti israeletique, na'bil ta xcom o yu'unic ti c'ot ta jbel mantal ti ja' yu'unic ti paleetic ti xpechel sti' yo'ntone, ti sbec'tal yo'tac ti laj yich' aq'uel ta sventa ti lajesobil o'ntonale.

²⁹“Ti abtelal c'u'iletic yu'un ti Aarone, ja' ta xich'ic comel ti snitilultac ti c'alal ta xich'ic tsots yabtelic ta paleale.

³⁰Ti snitilultac ti Aarone, ti buch'u ta xich'be comel ti yabtel ti ta x'och batel ta Axibalnae, yo' jech ta xtun tey ta ch'ul cuarto ti bu nupel ta be xchi'uc ti Diose, tsots sc'oplal ti ta slap vucub c'ac'al ti c'u'il taje.

³¹“Ts'acal to un, ta xatsac talel ti chij ti oy sc'oplal ta xich' tunesel ta sventa ti nupob abtelale. Tey xbat alacan ti bu ja' yavil albile.

³²Jech ti sbec'tal ti chije xchi'uc ti pan ti oy ta nene' moche, jech ti Aarón xchi'uc ti snitilultaque ta xbat stun slajes sti'ic ta ochebal sti' ti Axibalna ti bu nupel ta bee.

³³Yu'un ta stun slajesic, ja' ti laj yich' aq'uel ta sventa xch'ayobil ti smul scolo'ic ti yo' laj staic ti va'anbil ti c'otic ta yabtelique, ti laj yich' cajal yabtelic ti jech c'otic ta paleale. Taj une, mu xu' ta sti'ic ti buch'uuc no'oxe, yu'un oy stutac ti ch'acbil c'ote.

³⁴Mi oy to com scomelal ti pane, ti beq'uete, ti tun ta sventa ti nupob abtelale, mi tey to ta sta ta yoc'omale, chic'o. Yu'un mu'yuc buch'u xu' ta slajes ti c'usi ch'acbil c'ote.

³⁵“Scotol taje, jech me xapas ta stojol ti Aarone xchi'uc ti xnich'nabe, co'ol s'elan jech c'u cha'al laj cac' avile. Abtelano vucub c'ac'al ta yac'bel yich' ti yabtele.

³⁶Jujucot ch'iom tot vacax, ta xavac' jujun c'ac'al yo' ta xich' milel ta sventa ti xch'ayobil mulile. Meso tuso lec ti altare. Tey xacajan ti milbil matanal sventa ti mulile. Malbo aceite ta sba yo' jech ta xc'ot ta tunel.

³⁷Vucub c'ac'al sjalil ta xavac' milbil matanal ta altar sventa ti mulile. Ja' jech ta xc'ot ta tunel yu'un ti Diose, ti xi s'elan ch'acbil c'ote: c'usiuc no'ox ti ta xc'ot tey ta altare, ventainbil xa ta xc'ot ec.

³⁸“Jujun c'ac'al, mu stselbuj, ta xavac' ta sba altar cha'cot ch'iom tot chij ti yich'oj jun jabile.

³⁹Ti jcote, ta xavac' ta sob ic'luman. Ti jcote, ta xavac' ta smalil c'ac'al.

⁴⁰Ti jcot ch'iom chij ti ba'yel ta xavaq'ue, ac'bo nopol chibuc kilo ti bu lequil harinae, capbil ta jun litro yaceiteal olivo, xchi'uc ta xamal jun litro vino ti ta xc'ot ta matanale.

⁴¹Ja' no'ox jech ta xapas xtoc xchi'uc ti jcot chij ti ta xavac' ta smalil c'ac'ale, xchi'uc ti harinae, xchi'uc ti vino ti ja' matanale, ti ja' jun matanal ti jun yutsil smuil ta xa'i ti Diose.

⁴²Ti matanaletic ti ta xich' chiq'uel sventa quich'obil ta muq'ue, ja' ta sliquesic ti totil me'iletique, yo' jech xchanoj ta xcom ti yalab xnich'nabic ti ta xaq'uic ta jtojole, ti ta ochebal sti' ti Axibalna ti bu ta jnupot ta be ta sc'oponelote.

⁴³Va'i un, tey ta jnupic ta be ti israeletique. Ti bu taje, ch'acbil ta xc'ot cu'un, yu'un tey ta jva'an jba.

⁴⁴Ch'acbil ta xc'ot cu'un ti Axibalnae xchi'uc ti altare. Ja' jech ch'acbilic ta xc'otic ec ti Aarone xchi'uc ti xnich'nabtaque, yu'un ja' paleetic cu'un.

⁴⁵Ta jchi'in ta naclej ti israeletique, Vu'un Diosun yu'unic.

⁴⁶Ja' jech ta sna'ic ti Vu'un Ajvalil Diosun yu'unique, ja' ti Buch'u loq'uesvan talel ta Egipto yo' jech ta jchi'in ta nacleje, Vu'un ti Ajvalil Diosun yu'unique.