Read Tzotzil Éxodo 3 Bible Online

Éxodo 3 - Tzotzil bible

Éxodo 3

¹Ti Moisese och ta sq'uelbel xchij ti Jetro ti smuni'e, ja' pale yu'un ti Madiane. Oy jun c'ac'al, bat xchi'uc xchij ta sbajtical banomil. C'ot c'alal to ti bu oy ch'ul vits yu'un ti Dios ti Horeb[3] sbie.

²Ti bu taje, laj yac' sba iluc jun yaj'ánjel ti Dios ta jpets ch'ix te' ti volol ta o'lol leb c'oc' yilele. Jech ti Moisese laj stuc'ulan lec. Laj yil ti natic no'ox sleb c'oc' ta xtil ta ch'ix te'e. Ja' no'ox un, mu'yuc ta xc'ac'.

³Ja' yu'un un, xi laj snope: “¿C'u cha'al le'e? Mu'yuc bu xquil o jech. Chba jq'uel c'u cha'al ti mu xc'ac' ti ch'ix te'e.”

⁴C'alal laj yil Dios ta xnopaj batel ti Moisés ta sq'uelele, xi biiltasat talel bu oy ti ch'ixe: —¡Moisés! ¡Moisés! —¿C'usi ta xaval? —xi laj stac' ti Moisese.

⁵Va'i un, ti Diose xi laj yale: —Mu xanopaj talel. Loc'o ti axonobe, yu'un ti bu oyote c'otem ta cuxul banomil.

⁶Xi to laj yal xtoque: —Diosun yu'un ti amolmuc'totaque. Diosun yu'un ti Abrahame, ti Isaaque, ti Jacobe. Ti Moisese laj smac sat, yu'un xi' ti ta sq'uelbe sba satic xchi'uc ti Diose.

⁷Jech ti Diose xi to laj yalolan batele: —Laj xa quil lec ti yan sba ta xich' svocol ti calab jnich'nab ta Egiptoe. Laj xa ca'i ti x'ijetic yu'un svocolic ta scoj ti tsots ilbaj x'utatic yu'un ti jq'uel-abteletique. Jna'oj lec ti oyic ta vocole.

⁸Jech o xal liyal talel yo' tal jpojic ti oyic ta yoc ta sc'ob ti egipcioetique. Ta jloq'ues batel li' ta jteclume. Ta xquic' batel ta lequil banomil ti bu lec jamale, ti bu co'ol s'elan vo' ta xbein ti chu' vacaxe, ti ajapome. Ti banomil taje, ja' ti osil bu nacalic ti cananeoetique, ti hititaetique, ti amorreoetique, ti ferezeoetique, ti heveoetique, ti jebuseoetique.

⁹A'yio ava'i lec, yu'un laj xa ca'i ti x'ijetic ta vocol ti israeletique. Yu'un laj xa quil ti ep ta x'ac'batic svocolic yu'un ti egipcioetique.

¹⁰Jech o xal, tamo batel abe, yu'un ta jtacot batel ta stojol ti faraone yo' jech ta xaloq'ues talel ta Egipto ti calab jnich'nab israeletique.

¹¹Va'i un, ti Moisese xi laj yalbe ti Diose: —¿Buch'uun ya'yel ti vu'un chba jva'an jba ta stojol ti faraone, ti ta jloq'ues talel ta Egipto ti israeletique?

¹²Ti Diose xi laj staq'ue: —Ta jchi'inot, yu'un xi s'elan svinajeb ti vu'un ta jtacot batele: Ja' yu'un un, acotolic ta xtal avich'icun ta muc' li' ta ch'ul vits c'alal mi laj xa aloq'ues talel ta Egipto ti calab jnich'nabe.

¹³Ja'uc le' une, ti Moisese xi laj staq'ue: —Ti c'usi toj vocol ta xca'i ti mi ta xibate, ja' ti mi xichi ta xcalbe ti israeletique: ‘Ti Dios yu'un ti amolmuc'totique, ja' laj stacun talel, jech ti stuquique, xu' xi ta xisjac'beicune: ‘¿C'usi sbi taj une?’ Va'i un, ¿c'usi xu' ta xcalbeic ec un?

¹⁴Ti Diose xi laj staq'ue: —VU'UN TI BUCH'U ONO'OXE.[4], Ja' jech xtoc xi xavalbe ya'iic ti israeletique: VU'UNUN ti xie, ja' laj stacun talel ta atojolic.

¹⁵Ma'uc no'ox taje, yu'un ti Diose xi laj yalbe ti Moisese: —Xi xavalbe ya'iic ti israeletique: “Ti Ajvalil Dios yu'un ti amolmuc'totique, ja' ti Dios yu'un ti Abrahame, ti Isaaque, ti Jacobe, ja' laj stacun talel ta atojolic.” Ja' jech ojtiquinbilun ta xic'ot sbatel osil. Ja' jech albil o ti jc'oplale.

¹⁶Batan, ba tsobo ti banquilaletic yu'un ti israeletique. Xi xavalbe ya'iique: “Ti Ajvalil Dios yu'unic ti amolmuc'totique, Dios yu'un ti Abrahame, ti Isaaque, ti Jacobe, laj yac' sba iluc ta jtojol ti laj yalbun laj xa sts'etan sni' xchiquin ta atojolique. Laj xa yil ti c'u s'elan ta xapasbatic yu'un ti egipcioetique.

¹⁷Ja' jech xtoc laj yalbun ti ta xasloq'uesoxuc batele. Ta xaspojoxuc loq'uel ti jech mu x'ech' avocolic li' ta Egiptoe. Ta xayic'oxuc batel ta jteclum ti bu nacalic ti cananeoetique, ti hititaetique, ti amorreoetique, ti ferezeoetique, ti heveoetique, ti jebuseoetique, ta banomil ti bu co'ol s'elan vo' ta xbein ti chu' vacaxe, ti ajapome.”

¹⁸Ti moletique ta xich'ic ta muc' ti ac'ope. Ja' yu'un un, ti vo'ote xchi'uc ti stuquique xi xavalbeic ya'i ti ajvalil yu'un Egipto c'alal chbat aq'uelique: “Ti Ajvalil Dios yu'unic ti hebreoetique, tal sa'uncutic. Ja' yu'un un, ac'o ave ati' ti ta xibatcutic ta sbajtical banomil ti oy oxibuc c'ac'al ti sbelele yo' chbat cac'becutic smoton ti Ajvalil ti ja' Dios cu'uncutique.”

¹⁹Ac'o mi jech ta xavalbeic ya'i ti ajvalil yu'un ti Egiptoe, ja' no'ox un, jna' lec ti mu xac' loc'anic batel ti mi mu'yuc c'usi tsots ta xc'ot ta stojole.

²⁰Ac'o mi jech un, ja' no'ox un, ta xcac'be yil ti jmuc'ul jtsatsale. Ta xcac'be yil ti ch'ayal ta xc'ot yo'ntonic ti jujuti' xa mu ta xchamic o ti egipcioetic ti c'usi ta jpas ta slumalique. Mi laj taj une, ja' to jech xu' ta xac' loc'anic batel ti faraone.

²¹Ja' jech xtoc ta jpas ta stojolic ti ta x'ayan slequil yo'ntonic ti egipcioetic ta stojol ti israeletique yo' jech mu jeche'uc no'ox ameyoj avoc ac'obic ti c'alal ta xaloq'uic batele.

²²Ti jujun antsetique, ac'o sc'anbeic ti c'usi x'ayan yu'unic ti slac'naique, ti buch'uuc no'ox antsil nacal ta snaique. Ac'o yac'boxuc ti c'usi stac' tunesele jech c'u cha'al ti pasbil ta plata taq'uine, ti pasbil ta oroe, xchi'uc ti ac'o yac'boxuc ti c'u'iletique, yo' jech oy c'usi ta slapic ti avalab anich'nabique. Ja' jech ta xapojbeic batel scotol ti c'usi oy yu'unic ti egipcioetique.