Read Tzotzil Éxodo 30 Bible Online

Éxodo 30 - Tzotzil bible

Éxodo 30

¹“Meltsano xtoc junuc altar ta acacia te' sventa xchic'obil pom.

²Sc'an ti co'ol sjamlej xchanjotale, cha'ch'ix xchi'uc o'lol jquejlej (.45cms.) ti snatile; cha'ch'ix xchi'uc o'lol jquejlej (.45cms.) ti sjamlej xtoque. Yan ti stayleje, ja' chanch'ix xchi'uc jquejlej (.90cms.). Ti xulubtac xtoque, sc'an jun no'ox tsacal lec liquel xchi'uc ti altare.

³Ti sbae, ti xchanjotal xocone, xchi'uc ti xulubtaque, bono lec ta bats'i oro. Nichimtaso ta oro ta joyob ti sti'iltaque.

⁴Noch'anbo xotbil oro ta yolon ti xnichimale, chib ta jujujot xocon yo' jech tey ta xich' xojbel jelavel ti sc'atlomte'al sventa xchechobile.

⁵Ta acacia te' xameltsanbe ti sc'atlomte'altaque. Bono lec ta oro xtoc.

⁶Ts'acal to un, ti altare, ba ac'o ta yeloval ti bu lich'il ti muc' ta poc' ta sts'el xcaxail ti tratee, ti bu ta jta jbatic ta c'oponele.

⁷Ti ta jujun sob ic'lumane, ti c'alal ja' o yorail ta xich' chapanel ti lamparaetique, jech ti Aarone tey ta xchic' ti muil pom ta sba ti altar taje.

⁸Ta xchic' xtoc ti ta mal c'ac'ale, ti c'alal ja' o yorail ti ta xich' tsanel ti lamparaetique. Taje, ja' jech ta xich' pasel o sbatel osil ta stojol ti Diose.

⁹Ti ta sba ti altar taje, mu me xachic' yan pom, mi ja'uc ti c'usi oy sc'oplal ta xich' chiq'uele, mi ja'uc ti matanal sat ts'unubaletique. Mi ja'uc xtoc xamalbe ti matanal vinoe.

¹⁰Ti altar taje, j'ech'el c'otem ta yu'un ti Diose. Ti Aarone, jten ta jujun jabil, ta xjaxbe ch'ich' ta xulub ti altare yo' jech mesbil tusbil ta xc'ot ta sventa xch'ich'el ti chon bolom ti laj yich' svocol ta sventa stael ti ch'aybil ta xc'ot ti mulile. Scotol jabil ta sc'an ta xich' pasel ma' ti va'i s'elan taj une.”

¹¹Ti Moisese xi albat yu'un Dios ti c'alal c'opoj talel ta stojole:

¹²“C'alal ta xabejanbe ta vun sbiic ti israeletique, ti jujunique, tsots sc'oplal, ac'o yaq' uic ta stojol Dios ta sventa xq'uexolic yo' ta xilic lec ti xch'iel sc'opojelique. Taje, ja' smelol yo' jech mu xvocolajic yu'un ti chamel lajel c'alal mi x'ech' xa ox ti tsacob-biile.

¹³Scotol ti buch'u bejel lec ta vun ti sbie, ta xaq'uic vo'ob gramo plata ti spatan ta stojol ti Diose, ti ja' o'lol no'ox jech c'u cha'al ti albil sc'oplal yu'unic ta ch'ulnae.

¹⁴Scotol ti buch'u x'ech'ic xa ta jtob jabile xchi'uc ti buch'u yich'ojic jtob jabil ti bejel ta vun ti sbiique, ta xaq'uic ti xq'uexolic ta stojol ti Diose.

¹⁵C'alal ta xaq'uic ta jujun tal ta stojol Dios ta sventa yo' ta xilic lec ti xch'iel sc'opojelique, mi ja'uc x'ech' ta vo'ob gramo plata ta xac' ti jc'uleje, mi ja'uc mu sta vo'ob gramo ta xac' ti me'une.

¹⁶Ja' yu'un un, ta xatsob ti plata ti ta xaq'uic ti israeletic ta sventa ti xch'iel sc'opojelique. Ja' yu'un un, ba ac'o yo' jech ta xich' pasel ti quich'obil ta muc' ti bu nupel ta be ti ta Axibalnae. Ti jech taje, mu xch'ayat ta o'ntonal ti israeletic yu'un ti Diose, ja' ti laj yaq'uic ta sventa ti xch'iel sc'opojelique.”

¹⁷Ti Moisese, xi albat ti c'alal c'oponat talel yu'un ti Diose:

¹⁸“Meltsano junuc muc' ta lech-lech c'anal taq'uin, xchi'uc jun xlechleb ti ja' ono'ox c'anal taq'uine, ti ja' ta xtun ta sventa yavil vo' atinejebale. Ac'o ta o'lol sti'il yu'un ti Axibalnae xchi'uc ti altare. Ja' jech xtoc, nojeso ta vo'.

¹⁹Jech ti Aarone xchi'uc ti xnich'nabe tey ta spulic loq'uel ti vo'e yo' jech ta spoc ti sc'obique, ti yacanique.

²⁰Yu'un pocbil lec yoc sc'obic ta x'ochic batel ta Axibalna ti bu nupel ta bee, xchi'uc ti c'alal ta xnopajic batel ta sts'el altar ti ta xtunic ta yaq'uel xchic'bel smoton ti Diose. Ja' jech mu xchamic.

²¹Va'i un, yo' jech mu xchamique, tsots sc'oplal ta spoc ti sc'obique, ti yacanique. Taje, ja' me ti oy c'usi tsots sc'oplal na'bil ta xcom o sbatel osil ta stojol ti Aarone, xchi'uc ti snitilultaque.”

²²Ti Moisese, xi albat ti c'alal c'opanat talel yu'un ti Diose:

²³“Xi s'elan xat'uj ti lequil muil momoletique: vaquib kilo ti lec t'ujbil mirrae, oxibuc kilo ti canelae, oxibuc kilo muil aj,

²⁴vaquibuc kilo ti jtos o ta canelae (ti jechuc yepal yalal sbisel jech c'u cha'al liquem ta xich' aq'uel ta ch'ulnae) xchi'uc o'lol xchanibaluc litro yaceiteal ti olivoe.

²⁵Ti ta jech yepal taje, ja' jech xachapan ta meltsanel ti jtunel aceitee, co'ol xapas jech c'u cha'al jun jmeltsanej muil pox ti oy yavil yu'un ti muil poxe. Taje, ja' me ti junel aceitee.

²⁶Tsots sc'oplal ta xaq'ueb muyel ta sba ti Axibalna ti bu nupel ta bee xchi'uc ta xcaxail ti tratee.

²⁷Ma'uc no'ox taje, ta xaq'ueb ta malel ta sba ti mexa xchi'uc scotol ti c'usitic tey oye, xchi'uc ta spajleb cantilaetique xchi'uc ti c'usitic tey oye, xchi'uc ta altar ti xchic'obil pome.

²⁸Ma'uc no'ox taje, ta xaq'ueb ta malel ta sba ti altar sventa xchic'obil ti matanale, xchi'uc scotol ti c'usitic tey oye, xchi'uc ta lech-lech c'anal taq'uin xchi'uc ti scajlebe.

²⁹Ja' jech ta xc'ot avu'un ta tunel yu'un ti Diose, ti j'ech'el c'ot ta tunele. Ti c'usiuc no'ox ta xc'ot ta sbae, ventainbil xa ta xc'ot ec.

³⁰“Ti aceite taje, malbo ta sba ti Aarone, xchi'uc ti xnich'nabe, yo' jech ta xcomic ta cajpaletac.

³¹Xi me xavalbe ya'iic ti israeletic jech c'u cha'al li'e: ‘Ja' no'ox xatunes ti jtunel aceite cu'un ti c'u sjalil ta x'ech' ti ch'iel c'opojele.

³²Mu xamalbe ta sba jeche' xocol vinic no'ox. Mi ja'uc xachapan ta smeltsanel yan aceite ti ta xaco'oltas jech c'u cha'al taje. Yu'un ja' c'otem ta j'ac'-ich'- abtelal ti aceite taje. Ja' yu'un un, c'otuc me ta o'ntonal ti cuxul c'oteme.

³³Yan ti mi oy buch'u ta xchapan yan aceite ti co'ol jech c'u cha'al taje, mi ta smalbe ta sba ti buch'uuc no'oxe, tenbil ta xloc' ta stojol ti xchi'iltaque.’ ”

³⁴Ti Diose xi laj yalbe ti Moisese: “Co'ol yepal ti xi s'elan xachapan ti jujutos ti c'usi muique: ti xuch'e, ti muil ich'ac momole, ti bats'i pome, xchi'uc ti muil jchop o ta yaxchel momole.

³⁵Ti jaytos taje, ja' jech xachapan ti jun pome yo' jech ta xc'ot ta bats'i jtunel pom. Xacap lec scotol jech c'u cha'al junuc jmeltsanej muil poxil ti c'alal ta smeltsan ti muil poxiletique.

³⁶Lec nin xajuch' jch'acuc. Va'i un, ba ac'o ta xcaxail trate tey ta Axibalna ti bu nupel ta bee. Ti lec xcaltique, ja' tey ti bu albil sc'oplal ti ta jnup jbatic ta bee. Ti pom taje, stuc no'ox ti ja'uc c'otuc ta jtunel pom avu'unique.

³⁷Mi ja'uc xa xachapan ta smeltsanel yan pom ti ja' no'ox ta xatunes atuc jech c'u cha'al ti pom ta xameltsan taje. C'otuc me avu'un ta jtunel pom ta stojol stuc ti Diose.

³⁸Yu'un mi oy buch'u ta smeltsan yan pom ti co'ol s'elan ti ja' no'ox c'upil ta xa'i ti smuile, ten xi loq'uel ta stojol ti xchi'iltaque.”