Read Tzotzil Éxodo 31 Bible Online

Éxodo 31 - Tzotzil bible

Éxodo 31

¹Ti Diose xi laj yalbe ti Moisés ti c'alal laj sc'opon talele:

²“A'yio ava'i, ti ta scotol snitilul ti Judae, laj xa jt'uj ti Bezaleel ti ja' xnich'on ti Urie, smom xtoc ti Hure.

³Ma'uc no'ox taje, yu'un ti vu'un Diosune, ta j'ech'el laj cac' ochuc ti jcuxlejal ta stojole yo' jech oy ti sbijile, ti snopbenal yu'une, ti ta yojtiquinele, xchi'uc ti sc'abalil ta sloc'taele.

⁴Ma'uc no'ox taje, xu' yu'un sloc'tael ta luchel, ta yabtelanel ti oroe, ti platae, ti c'anal taq'uin xtoque.

⁵Ma'uc no'ox taje, xu' yu'un ta stuq'uibtasel ti c'usi sc'an toe, ta xnoch'ananel ti c'upil sba baxtonetique, ta stuq'uibtasel ti c'usi meltsanbil ta te'e, ti c'usiuc no'ox abtelal ti luchbil ta xich'e.

⁶Ja' laj cac'be ta scoltaobba ti Oholiabe, xnich'on ti Ahisamaque, ti ja' snitilul ti Dane. Ta scotol ti buch'u oy sbijilique, oy bu laj cac'be ep sbijil yo' jech ta smeltsan scotol jech c'u cha'al ti xi caloj mantale:

⁷ti Axibalna ti bu nupel ta bee, ti xcaxail tratee, ti smac ti nujul ta sba ti caxae, scotol ti c'usitic ta xtun tey ta Axibalna xtoque.

⁸Ma'uc no'ox taje, ta smeltsan xtoc ti mexae xchi'uc xchaplej ti c'usitic ta xtun teye, ti bats'i oro spajleb cantilae xchi'uc xchaplej ti c'usitic ta xtun teye, ti altar xchic'obil pome.

⁹Ma'uc no'ox taje, ta smeltsan xtoc ti xchic'obil matanal altare xchi'uc xchaplej ti c'usitic ta xtun teye, ti muc' ta lech-lech c'anal taq'uin xchi'uc ti xlechlebe.

¹⁰Ma'uc no'ox taje, ta smeltsan xtoc ti jalbil c'u'ile, ti lec xcaltique, ja' ti tunelal c'u'il yu'un ti pale Aarone, xchi'uc ti c'u'il sventa ti xnich'nab ti c'alal ta xtunic ta paleale.

¹¹Ma'uc no'ox taje, ta smeltsan xtoc ti aceite sventa ti nupob abtelale, ti muil pom ti ta xtun ta ch'ulnae. Ja' yu'un un, ti stuquique tsots sc'oplal, ac'o xchapanic lec scotol jech c'u cha'al laj calbot ti mantale.”

¹²Ti Moisese, xi albat ti c'alal c'oponat talel yu'un ti Diose:

¹³“Va'ano aba, c'opojan atuc ta stojol ti israeletique, ti xi xchapet xavalbe ya'iique: ‘Tsots sc'oplal, ich'ic ta muc' ti sc'ac'alil cuxob o'ntonal cu'une. Yu'un ti jech taje, ja' svinajeb ta atojolic cu'un ta sventa sbatel osil yo' jech ta xana'ic ti vu'un Ajvalilun ti laj jt'ujoxuque.

¹⁴Ti sc'ac'alil cuxob o'ntonale, ja' ch'ul c'ac'al avu'unic. Jech o xal tsots sc'oplal ta xavich'ic ta muc'. Ti buch'u mu xich' ta muc' ti jech c'ac'al taje, ti ja' no'ox ta x'abteje, chapal sc'oplal ta xich' milel.

¹⁵Vaquib c'ac'al xu' xa'abtejic. Yan ti ta yucubal c'ac'ale, ja' xa cuxob o'ntonal ti t'ujbil yu'un ti Diose. Ti buch'u ta x'abtej ta sc'ac'alil ti cuxob o'ntonale, chapal sc'oplal ta xich' milel.’

¹⁶Ja' yu'un un, ti israeletique, ac'o xchanic spasel yich'el ta muc' sc'ac'alil ti cuxob o'ntonale. C'otuc ta jun trate ta sventa sbatel osil.

¹⁷Ja' svinajeb ti com o ta stojolic ti israeletic cu'une.” Yu'un ti Diose, ta vaquib c'ac'al, laj smeltsan ti vinajele xchi'uc ti banomile. Ta yucubal c'ac'al une, tsuts yabtel, laj xcux yo'nton.

¹⁸C'alal laj yo'nton ti Dios ta sc'oponel ti Moisés ta vits Sinaie, laj yac'be talel ti pech-pech tonetic ti bu ts'ibabil talel ti oy c'usi tsots albil sc'oplale, ti ts'ibabil ta sc'ob stuc ti Diose.