Read Tzotzil Éxodo 32 Bible Online

Éxodo 32 - Tzotzil bible

Éxodo 32

¹C'alal laj yilic ti israeletic ti jalij tey ta vitse, ti mu xyal talel ti Moisese, laj stsob sbaic ta stojol ti Aarone, ti xi laj yalbeique: —Mu teyuc no'ox xach'ayet, meltsanbun diosetic cu'uncutic yo' jech ta xistojobtasuncutic batel. Yu'un mu jna'cutic c'usi laj spas ti Moisés ti ja' laj sloq'uesuncutic talel ta Egiptoe.

²Xi laj stac' ti Aarone: —Lec oy un cha'e, loq'uesic ti taq'uinal chiquinaletic ti naca ta oro ti joc'ajtic ta xchiquinic ti avantsilelique, xchi'uc ti aquerem atsebique. Va'i un, ich'beicun talel li'e.

³Ja' yu'un un, scotolic laj sloq'uesic ti taq'uinal chiquinal ti naca ta oro ti joc'ajtic ta xchiquinique. Laj yich'ic batel ta stojol ti Aarone.

⁴Va'i un, och ta yoc ta sc'ob, jech tey laj yac' ta ulesel ti oroe. Lic abtejuc ta yanel ta jun yanobil ja' to ti c'uxi joybij lec yu'un ta sloc'obbail jcot ch'in tot vacaxe. Jech o xal un, scotolic xi lic yalique: —Israel, ti li'e, ja' ti dios ti laj sloq'uesot talel ta Egiptoe.

⁵C'alal jech laj yil ti Aarón taje, tey laj smeltsan jun altar ta yeloval ti loc'tabil ch'in tot vacaxe. Va'i un, xi lic avanuque: —Oc'om ta jpastic q'uin sventa yich'el ta muc' ti Diose.

⁶Sob ta yoc'omal un, lic xchapan sbaic, lic yaq'uic chic'bil matanaletic, xchi'uc milbil matanaletic sventa ti lajesobil o'ntonale. Ts'acal to un, ti israeletique chotiic ta ve'el ta uch'ubajel. C'alal laj yo'ntonique, tey lic spasic ti c'usi xmuyubaj ta xa'iic xchi'uquique.

⁷Ja' yu'un un, ti Diose xi laj yalbe ti Moisese: —Batan, yalan batel, yu'un ti achi'iltac ti laj aloq'ues talel ta Egiptoe, laj xa soques sbaic.

⁸Ta ora no'ox laj xch'ac sbaic ta be ti bu laj calbeic ti ta stamic batele. Laj xa smeltsanic ta ulesbil oro jcot sloc'obbail ch'in tot vacax. Avi tana une, yacalic xa ta xich'ic ta muc', ta xac'beic matanaletic xtoc ti xi ta xalique: ‘Israel, ti li'e, ja' dios ti laj sloq'uesot talel ta Egiptoe.’

⁹Ma'uc no'ox taje, yu'un ti Diose xi to laj yalbe ti Moisese: —Laj xa jtuc'ulan lec ti jteclum li'e. Laj xa cojtiquin lec ti pucujibemic xa xchi'uc ti xpochanilique.

¹⁰Avi tana un, ts'ijlan xa no'ox me ta jtojol, yu'un mu me xa sts'icbaj ta xca'i yu'un ti sc'ac'al co'ntone. Ta jtsutsesic ya'iic ta j'ech'el. Ja'uc ti vo'ote, ta jliques jun muc' ta lum ta aventa.

¹¹Manchuc mi jech albat un, ti Moisese xi lic vulvunuc ta slamajesbel yo'nton ti Ajvalil ti ja' Dios yu'une: —Cajval, ¿c'u cha'al ta xlic sc'ac'al avo'nton yu'un ti anich'nabe, ti c'alal vo'ot atuc laj alaman c'otel amuc'ul atsatsal ti c'alal laj aloq'ues talel ta Egiptoe?

¹²¿C'u cha'al un, mi yu'un tey xa no'ox aq'ueloj aba ti xi ta xalic ti egicioetique: “Ti Diose, ma'uc ta slequilal yo'nton laj sloq'ues batel, ja' no'ox ba yac' chamuc ta vitstic yo' jech ta xch'ay ti sts'unubalic li' ta banomile”? Ja' lec lamajuc xa ti sc'ac'al avo'ntone. Ch'ayo xa ta ajol ta avo'nton ti anopoj ti j'ech'el ta xatubbe sc'oplal ti ateclumale.

¹³Vuleso ta avo'nton c'u s'elan albil avu'un ta sventa ti Abrahame, ti Isaaque, ti Israele, ti ja'ic avajtuneltaque. Yu'un ja'ic laj ya'iic ti vo'ot atuc loq'uem ta ave ta ati' ti jbel sc'oplal mu xch'ay ta be ti laj aval ti xi ta xapas ta stojolique: “Ti anitilulique, ta jpas ta stojolic ti ta x'epajic ta j'ech'el jech c'u cha'al ti c'analetic ti oy ta vinajele. Ja' jech xtoc scotol ti banomil li'e, loc' ta que ta jti' ta xcac'boxuc ti ta xc'ot o ta arextoic cu'un ta sbatel osile.”

¹⁴Jech ti Diose laj xch'ay ta yo'nton ti jech snopoj xa ox ti ta xch'aybe sts'unubal ti yalab xnich'nabe.

¹⁵Ja' yu'un un, ti Moisese yal talel ta vits, spechoj talel ti cha'pech ton yu'un ti oy c'usi tsots sc'oplal albile, ti nojic ta ts'ib ta xcha'jotaltaque.

¹⁶Ti cha'pech ton taje, ja' laj smeltsan stuc ti Diose. Ja' laj sts'iba stuc ti Dios ti c'u s'elan ts'ibabil ta jujupeche.

¹⁷C'alal laj ya'i ti Josué ti x'avlajetic xa ti jteclume, xi laj yalbe ti Moisese: —Co'ol s'elan j'ac'-leto x'avlajetic ta xca'i ti bu vololic ta nacleje.

¹⁸Ti Moisese xi laj staq'ue: —Ma'uc sq'uejimolal muyubajel ti ta svinajes ti pasbil xa canale. Mi ja'uc sq'uejimolal ti ta svinajes ti oy at-o'ntonal yu'un ti tsalel ta c'ope. Yu'un yan q'uejimoletic ti c'usi ta xca'ie.

¹⁹Va'i un, c'alal nopaj batel ti Moisés ti bu lamalic ta nacleje, jech ti cha'pech tone, laj sjip ta lum ta sc'ac'al yo'nton, stuc slilijemal busul com yu'un ta yoc vits ta scoj ti laj yil sloc'obbail ti ch'in tot vacaxe, xchi'uc ti xnic no'ox ti ac'ote.

²⁰Ts'acal to un, och sc'oplal yu'un sloc'obbail ti ch'in tot vacaxe, yu'un laj sjip ochel ta c'oc'. Laj taj une, lec xa nin laj xjuch', ti laj svij ochel ta vo' ti sninale. Jech ti israeletique laj yuch'ic yu'un ti vo' taje.

²¹Xi laj yalbe xtoc ti Aarone: —¿C'usi laj yutot ti laj ata tsalel yu'un ti jteclum li'e, ti c'ot xa ta pasel avu'un ti tsots mulile?

²²Ti Aarone xi laj staq'ue: —Yojtot, mu xaviltaun, yu'un xana' lec ti jteclum li'e, ja' me'inem xa'iic ta spasel ti c'usi chopole.

²³Yu'un ti stuquique xi laj yalbeicune: “Meltsanbun junuc dioscutic yo' jech ta xistojobtasuncutic batel. Yu'un mu jna'tic c'usi laj spas ti Moisés taje, ti c'alal ja' laj sloq'uesuncutic talel ta Egiptoe.”

²⁴Xichi laj jtac'beique: “Ti buch'u oy oro yu'une, ac'o xch'ac loq'uel.” Laj yac'beicun ti oroe. Laj jtic' ochel ta c'oc'. Ja' tey lic joybijuc talel sloc'obbail ti ch'in tot vacaxe.

²⁵Ti Moisese laj yil ti mu staq'uic pajesel ti israeletique, yu'un lec xa no'ox ta xa'iic ta xlabanatic yu'un ti yajcontraique. Yu'un ti Aarone mu'yuc xcuch yu'un ta spajesel.

²⁶Ja' yu'un un, ti Moisese xi laj yal ti c'alal va'al ta ochebal ti bu lamalic ta nacleje: —Ti buch'utic staoj to yav yac'oj sjol yo'ntonic ta stojol Diose, jtsob jbatic ta jmoj. Va'i un, ja' laj stsob sbaic talel scotol ti levitaetic ta stojole.

²⁷Ja' yu'un un, xi albatic yu'un ti Moisese: —Xi laj yal ti Ajvalil ti ja' Dios yu'unic ti Israele: “Ti jujunoxuque, chapano ac'obic xchi'uc ti avespadaique. Sutanic batel ti bu slamanoj sbaique. Ti jujunoxuque, mu'yuc ta alel mi ja' ti avinquilelique, mi ja' ti buch'u lec xavil abaic xchi'uque, mi ja' ti alac'naique, xquechet x'ech' amilic ta jujun ti ta ti'nae.”

²⁸Ti levitaetique jech laj spasic jech c'u cha'al albatic yu'un ti Moisese. Yu'un ti jech c'ac'al taje, laj chamicuc nopol oxmiluc (3,000) ti viniquetique.

²⁹Va'i un, xi albatic yu'un ti Moisese: —Avi tana li' une, ta sba ta sat ti Diose, ta xavich'ic tsots avabtelic. Yu'un ti jlom avu'unique mu teyuc no'ox aq'uelojic, ac'o mi xnich'on stuc laj ono'ox yich' avu'unic. Ti jlom xtoque, ac'o mi bats'i svinquilel sbaic, laj ono'ox yich' avu'unic. Ja' yu'un un, avi tana une, ta xac'boxuc slequilal yutsilal ti Diose.

³⁰Ta yoc'omal un, ti Moisese xi laj yalbe ti jteclume: —Ti vo'oxuque laj ataic tsots amulic. Jech ti vu'une ta ximuy batel ti bu oy ti Diose. Jq'ueltic quic mi ta to jta ti ta xch'ayboxuc amul acolo'ique.

³¹Jech ti Moisese sut batel ti bu oy ti Diose, ti xi laj yalbe ya'ie: —Ta melel, ti israeletique tsots laj sta smulic ti c'alal laj sva'anic jun dios ti meltsanbil ta oroe.

³²Avocoluc, ch'aybo ti smul scolo'ique. Yan ti mi mu xach'aybee, tubo ti jbi ti laj ats'iba ta jpoc vune.

³³Ti Dios une xi laj staq'ue: —Ja' no'ox ta jtubbe sbi ta jpoc vun ti buch'u ta sa' smul ta scontrainelune.

³⁴Ja' yu'un un, batan, ic'o batel ti jteclum ti bu calojbote. Yu'un ti caj'ánjele, ja' j'ic'vanej ta xbat avu'un. C'alal ta sta sc'ac'alil ti castigoe, ta xcac'be stoj ti smulique.

³⁵Ja' yu'un un, ti Diose laj stacbe talel chamel lajel ta stojol ti jteclum ta scoj ti laj squejan sbaic ta yich'el ta muc' ti sloc'obbail ch'in tot vacax ti meltsanbatic yu'un ti Aarone.