Read Tzotzil Éxodo 39 Bible Online

Éxodo 39 - Tzotzil bible

Éxodo 39

¹Ti jalbil c'u'il sventa ta xtun ta Axibalnae, meltsano ta ic'-ic' losantic tsajal poc', ta yax'elan yaxal poc', xchi'uc ta tsajal poc'. Ja' jech ta xich' meltsanel xtoc ti tunelal c'u'il ta sventa ti Aarone jech c'u cha'al albat mantal ti Moisés yu'un ti Diose.

²Yo' ta xich' meltsanel xtoc ti jayal saquil c'u'ile, ta stunesic ti oroe, ti ic'-ic' losantic sba tsajal poq'ue, ti yax'elan yaxal poq'ue, ti tsajal poq'ue, ti sat saquil poc' ti polajtic sts'otbenale.

³Ta sjayubtasic ta tenel xtoc ti pech-pech oroe. Jich'il ta silic ti ta scapic ta luchel xchi'uc ti ic'-ic' losantic sba tsajal poq'ue, ti yax'elan yaxal poq'ue, ti tsajal poq'ue, xchi'uc ti saquil poq'ue.

⁴Ta xac'beic chib stim snequeb ti jayal saquil c'u'il ti snupoj sba c'ot ta jujujote.

⁵Ti chuquil ti ja' stsinobil ti jayal saquil c'u'ile, xi s'elan ta xich' meltsanele: ta xich' oro, ic'-ic' losantic poc', yax'elan yaxal poc', tsajal poc', saquil poc' ti polajtic sts'otbenale. Yu'un ja' jech ta xich' meltsanel jech c'u cha'al albil mantal yu'un Dios ti Moisese.

⁶Ti baxtonetic ti ic'-ic'tic stsajal xojobale, ta xich' noch'anel ti bu x'ech' xluchbenal ti oroe. Ta xich' tsacanbel sbi xnich'nab ti Israele, co'ol s'elan seyo pac'al ta xcom.

⁷Ts'acal to un, ti Bezaleele ta xnoch'anan ta stimtac ti saquil c'u'ile yo' jech vulesbil ta o'ntonal xnich'nabtac ti Israele. Yu'un jech ta xich' pasel jech c'u cha'al albat mantal yu'un Dios ti Moisese.

⁸Ti uile, xi s'elan luchbil ta xich' meltsanel ec jech c'u cha'al ti jayal saquil c'u'ile: yu'un ta xich' ti oroe, ti ic'-ic' losantic sba tsajal poq'ue, ti yax'elan yaxal poq'ue, ti tsajal poq'ue, xchi'uc ti saquil poc' ti polajtic sts'otbenale.

⁹Ti uile lec pim, yu'un co'ol sjamlej xchanjotal. Yu'un ta xich' cha'ch'ix xchi'uc o'lol jquejlej ti jujujote.

¹⁰Yu'un xi s'elan nojesbil ta chanchol c'upil sba tonetic ti yelove: ti jchol ta sliquebe, ta xich' jbej rubí ton, jbej crisolito, xchi'uc jbej esmeralda.

¹¹Ti xcha'cholale, ta xich' jbej granate ton, jbej zafiro, xchi'uc jbej jade.

¹²Ti yoxcholale, ta xich' jbej jacinto ton, jbej ágata, xchi'uc jbej amatista.

¹³Ti xchancholale, ta xich' jbej topacio ton, jbej cornalina, xchi'uc jbej jaspe. Ti tonetic taje, lec nabal ta stsacleb ti ja' oroe.

¹⁴Oy lajcha'bej, yu'un lajcheb sbiic xnich'nab ti Israele. Ti jujubeje, pac'ajtic jech c'u cha'al seyo, yu'un jujun yu'unic ti lajcha'chop nitilule.

¹⁵Ta sventa ti uile, ta smeltsan jlic carina ti ja' bats'i oro ti ts'otbil ti sate.

¹⁶Ta smeltsan chib stsacleb ti ja' oroe xchi'uc chib xot-xot oro. Ta xnoch'anbe ti xot-xot oro ta jujujot xchiquin ti uile.

¹⁷Jech ti carina oroetique, ta xoj jelavel ta xot-xot taq'uin.

¹⁸Ti xchibal sbatac ti carinae, ta stsacan ta jujujot stsacleb, ti ta stsacan lec ta stimtac ti jayal saquil c'u'il ti oy ta yelove.

¹⁹Ta smeltsan xtoc chib xot-xot oro ti ta snoch'an ta yolon xchiquin sti'il ti uile, ti nabal ta xc'ot xchi'uc ti jayal saquil c'u'ile.

²⁰Ta to smeltsan chib xot-xot oro xtoc. Ta xnoch'anic ta yolon stimtac ti saquil c'u'il ti bu ech'em ti sts'isbenale, ta yac'ol juteb ti bu ta x'ech' xchucbenal ti jayal saquil c'u'ile.

²¹Ts'acal to un, ta slot ta jmoj ti xot-xot oro yu'un ti uile xchi'uc ti xot-xot oro yu'un ti jayal saquil c'u'ile, ti ta slotic xchi'uc ti ic'-ic'-losantic sba tsajal no ti ta xac'beic yaq'uiline, yo' jech ti uile joc'ol ta xc'ot ta yac'ol chuquil yu'un ti jayal saquil c'u'ile, yo' jech jmoj tsacal. Jech ta spas jech c'u cha'al albat mantal ti Moisés yu'un ti Diose.

²²Xmochibal ti jayal saquil c'u'ile, sliquil ta xich' meltsanel ta ic'-ic' losan sba tsajal poc'.

²³Ti sjombenal snuc' ta o'lole, ta xich' balbil sti' co'ol s'elan jech c'u cha'al ti loin c'u'il nucul yo' mu xjate.

²⁴Sjoylej sti'iltac ti mochibal c'u'ile, ta snichimtaic ta luchel ta ic'-ic' losantic sba tsajal poc', ta yax'elan yaxal poc', ta tsajal poc', xchi'uc ta saquil poc' ti polajtic stsotbenale.

²⁵Ta smeltsanbeic ta oro ti xch'in campanailtaque. Capbil ta xcholic batel ta sjoylej sti'il, jun campana, jbej granada.

²⁶Yu'un xi s'elan ti mochibal c'u'il sventa ti jtunele: Capbil ta xich' cholel batel, jun campana, jbej granada, yu'un jelolanbil ta smeltsanic batel jech c'u cha'al albat mantal ti Moisés yu'un ti Diose.

²⁷Ti saquil loin c'u'il ti ta slap ti Aarone xchi'uc ti xnich'nabe, ta jlic no'ox jalbil.

²⁸Ja' jech ta xich' meltsanel xtoc ti ts'ot jolale, ti xnichimaltaque, ti saquil com-com vexil ti polajtic sts'otbenale.

²⁹Ti chuquil xtoque, ta xich' meltsanel ta ts'otbil sat saquil poc', ta ic'-ic' losantic sba tsajal poc', ta yax'elan yaxal poc', ta tsajal poc ti ta xich' nichimtasel ta luchel jech c'u cha'al albat mantal ti Moisés yu'un ti Diose.

³⁰Ja' jech xtoc laj smeltsan jun pech-pech taq'uin ta bats'i oro ti bu ta xvinaj sc'oplal ti ta xc'ot ta pale yu'une, ti co'ol s'elan ts'ibabil seyo ti mu xtub sc'oplal ti “C'otem ta yajtunel ti Diose”.

³¹Ts'acal to un, ta xac'beic yaq'uil ta ic'-ic' losantic sba tsajal no yo' jech ta xich' noch'anbel ta pech-pech oro ta sba ti ts'ot jolale jech c'u cha'al albat mantal ti Moisés yu'un ti Diose.

³²Ti smeltsanel ti Axibalna ti bu nupel ta be xchi'uc ti Diose, c'ot sc'ac'alil ta tsutsel. Yu'un ti israeletique jech laj spasic scotol co'ol jech c'u cha'al albat mantal ti Moisés yu'un ti Ajvalile.

³³Ja' yu'un un, xi s'elan laj yac'beic ta sc'ob Moisés ti Axibalna ti bu nupel ta bee xchi'uc scotol ti c'usitic ta xtun teye: ti sluc-luc taq'uinaltaque, ti stenel-te'altaque, ti sc'atlomte'altaque, ti yoyaltaque xchi'uc ti spajleb oyetique,

³⁴ti smac ta sjunul ti ja' nuculil chij ti bonbil ta tsoje, xchi'uc ti jun yutsiquil nucul ti laj yich' lich'anel ta toyole, ti muc' ta poc' ti smacoj ti caxae.

³⁵Ma'uc no'ox taje, laj yac'beic ta sc'ob Moisés ti xcaxail tratee xchi'uc ti sc'atlomte'altaque, ti smac sti'e,

³⁶ti mexae xchi'uc scotol ti c'usitic ta xtun teye, ti pan ti bevbil ta stojol ti Diose,

³⁷ti spajleb cantilaetic ti meltsanbil ta bats'i oroe, xchi'uc ti lamparaetique, (ja' ti lamparaetic ti q'uelbil tuc'ulanbil leque), xchi'uc scotol ti c'usitic ta xtun teye, ti aceite sventa ta xtun ta stilesobile.

³⁸Ma'uc no'ox taje, laj yac'beic ta sc'ob Moisés ti altar ti meltsanbil ta oroe, ti jtunel aceite sventa abtelale, ti muil pome, ti muc' ta poc' ti oy ta sti' ti ochebal Axibalna ti bu nupel ta bee,

³⁹ti altar ti pasbil ta c'anal taq'uine, ti chaj-chaj c'anal taq'uine xchi'uc scotol ti c'usitic ta xtun teye, ti muc' ta lech-lech taq'uine, xchi'uc ti xlechlebe.

⁴⁰Ma'uc no'ox taje, laj yac'beic ta sc'ob Moisés ti muc' ta poq'uetic ti oy ta amaq'ue, ti oyetique, ti spajleb oyetique, ti muc' ta poc' sventa ti ochebal yu'un ti amaq'ue, ti yaq'uiltaque xchi'uc ti pajob-te'etic yu'un ti amaq'ue, scotol ti c'usitic ta xtun ta Axibalna ti bu nupel ta bee,

⁴¹ti jalbil c'u'il ti ta xtun yu'unic ta Axibalnae, ti c'u'il sventa tunel yu'un ti pale Aarone, xchi'uc ti sc'u'tac ta paleal ti xnich'nabtaque.

⁴²Ti israeletique jech laj spasic scotol jech c'u cha'al albat mantal ti Moisés yu'un ti Diose.

⁴³C'alal laj yil ti Moisés ti ja' jech laj spasique, laj yac'be yich'ic slequilal ti Diose.