Read Tzotzil Éxodo 40 Bible Online

Éxodo 40 - Tzotzil bible

Éxodo 40

¹Ti Diose xi laj yalbe ti Moisés ti c'alal laj sc'opon talele:

²“Ti sba c'ac'al yu'un ti sliquebal ue, ac'o sta yav avu'un ta smeltsanel ti Axibalna ti bu nupel ta be yu'un ti Diose.

³Tic'o ochel xcaxail ti tratee. Lich'anbo smaquin ti muc' ta poq'ue.

⁴Ja' jech xtoc, tic'o ochel ta yut ti mexae xchi'uc ti spajleb cantilae. Cotano lec ti mexae. Ac'bo slamparailtac ti pajobil cantilae.

⁵Cotano lec xtoc ti oro altar sventa xchic'obil ti pome ta yelov xcaxail ti tratee. Joc'ano xtoc ti muc' ta poc' ta ochebal sti' ti Axibalnae.

⁶Ts'acal to un, ti xchic'obil matanal altare, ac'o ta sti'il ochebal Axibalna ti bu nupel ta bee.

⁷Mi laj taj une, ti muc' ta lech-lech taq'uine, nojesbo ya'lel. Ac'o ta o'lol yu'unic ti bu nupel ta bee xchi'uc ti altare.

⁸Va'i un, chapano ti c'u s'elan lec ta xcom ta joyob ti amaq'ue, xchi'uc xtoc, joc'ano ti muc' ta poc' ta ochebal yu'un ti amaq'ue.

⁹“Mi laj taj une, ti jtunel aceite sventa abtelale, vijo ta malel ta sjunul ti Axibalnae xchi'uc scotol ti c'usitic oy yu'une. Ja' jech scotol ta xc'ot ta jtunel. Ja' to jech ta xc'ot ta jtunel un.

¹⁰Ja' jech xtoc ti jtunel aceite sventa abtelale, vijo ta malel ta sba ti xchic'obil matanal altare, xchi'uc scotol ti c'usitic ta xtun teye. Ja' jech ta xc'ot ta jtunel ta j'ech'el ti altare.

¹¹Vijo ta malel ti jtunel aceite ta sba ti muc' ta lech-lech taq'uine xchi'uc ti xlechlebe yo' jech ta xc'ot ta jtunel.

¹²“Ta ts'acal to un, ic'o batel ti Aarón xchi'uc ti xnich'nab ta sts'el sti' ti Axibalna ti bu nupel ta bee. Ac'o atinicuc avu'un.

¹³Ja' yu'un un, ti Aarone, ac'o slap avu'un ti tunelal c'u'ile. Mi laj une, yo' jech ta xc'ot ta pale cu'un, vijo ta malel ti jtunel aceite ti c'alal nijile.

¹⁴Ja' jech xtoc un, ac'o nopajicuc jelavel ec ti xnich'nabe. Lapbo ti sc'u'ique.

¹⁵Yo' jech ta xc'otic ta cajpaletac ec, vijo ta malel ti jtunel aceite c'alal nijilic jech c'u cha'al laj apasbe ta stojol ti Aarone. Ti jech laj yich' malbel ti jtunel aceite ta stojolic ti c'alal nijilique, ja' svinajeb ti yich'oj yabtelic ta paleal ti sjel sts'ac sba ta x'ech'ic sbatel osile.”

¹⁶Jech laj spas scotol ti Moisés jech c'u cha'al albat mantal yu'un ti Diose.

¹⁷C'alal ta xa xlic stam xchibal jabil sloq'uelic talel ta Egiptoe, ta sba sc'ac'alil yu'un ti sliquebal ue, ja' o c'ot ta chapajel ti lic va'iuc ti Axibalnae.

¹⁸Jech ti Moisese lic sva'an ta smeltsanel ti Axibalnae. Yu'un lic xchotanbe ti stsaclebtaque. Laj xcholbe ti stenel-te'altaque. Laj yac'be ti sc'atlomte'altaque. Laj sva'anbe ti yoyaltaque.

¹⁹Laj xlich'anbe smac ti Axibalnae. Laj yac'be jc'ol smac ta sba ti Axibalna ti bu nupel ta bee. Co'ol laj yich' pasel jech c'u cha'al yaloj mantal ti Diose.

²⁰Ts'acal to ti Moisese laj stsac ti pech-pech tonetic yu'un ti oy c'usi tsots sc'oplal albile. Laj stic' ochel ta yut xcaxail ti tratee. Laj taj une, laj yac'be sc'atlomte'altac ti caxae. Laj snujanbe ti smac sti'e. Laj yich' ochel ta yut ti Axibalnae.

²¹Ma'uc no'ox taje, laj xlich'anbe ti muc' ta poq'ue, macal com ti caxa jech c'u cha'al yaloj mantal ti Diose.

²²Ts'acal to un, ti mexae, bat yac' ta yut ti Axibalna ti bu nupel ta bee, ti xi ta yolon ti yolon xocon sloq'ueb c'ac'ale, ta spat ti muc' ta poq'ue.

²³Ta sba ti mexae, laj scajanan lec ti pan ta xch'ul tojolal Dios jech c'u cha'al albil mantal yu'un ti Diose.

²⁴Ja' jech xtoc ti spajleb cantilae, laj yich' ochel ta yut ti Axibalna ti bu nupel ta bee. Laj yac' ta yeloval mexa, ta stuq'uil yolon ti yac'ol xocon sloq'ueb c'ac'al yu'un ti Axibalnae.

²⁵Laj stsan xtoc ti lamparaetic ta xch'ul tojolal ti Diose jech c'u cha'al albil mantal yu'un ti Diose.

²⁶Ti oro altare, laj yac' ta yut ti Axibalna ti bu nupel ta be, ta yeloval ti muc' ta poq'ue.

²⁷Lic xchic' ti muil pom jech c'u cha'al albil mantal yu'un ti Diose.

²⁸Ts'acal to ti Moisese laj sjoc'an ti muc' ta poc' ta sventa ochebal sti' ti Axibalnae.

²⁹Laj taj une, ti xchic'obil matanal altare, laj yac' ta ochebal sti' ti Axibalna ti bu nupel ta bee. Lic xchic' ti matanal chon bolometique, xchi'uc ti jchop o ta trigoe jech c'u cha'al yaloj mantal ti Diose.

³⁰Jech ti muc' ta lech-lech taq'uin sventa atinebale, laj snojesbe ya'lel. Bat yac' ta o'lol yu'unic ti bu nupel ta bee xchi'uc ti altare.

³¹Ti bu taje, tey ta spulic loq'uel vo' ti Moisese, ti Aarone, xchi'uc ti xnich'nabe yo' jech ta spoc ti sc'obique xchi'uc ti yacanique.

³²Yu'un ta spoc sbaic ochel ti c'alal ta x'ochic batel ta Axibalna ti bu nupel ta bee, xchi'uc ti c'alal ta xnopajic batel ta sts'el ti altare jech c'u cha'al albil mantal yu'un Dios ti Moisese.

³³Ta slajeb xa un, ti Moisese laj xchapanbe yamaq'uil ti Axibalnae xchi'uc ti altare. Laj sjoc'an ti muc' ta poc' ta ochebal sti' ti amaq'ue. C'alal tsuts yu'un ti Moisés ta sva'anel ti c'usiticuque,

³⁴volibil c'ot ta toc ti Axibalna ti bu nupel ta bee, yu'un sjunul yut Axibalna, vul yutsilal slequilal ti Diose.

³⁵Ti Moisese, mi ja'uc xa xil ta x'och batel ta Axibalna ti bu nupel ta bee, yu'un volibil c'ot ta toc, ja' ti sjunul Axibalnae, vul yutsilal slequilal ti Diose.

³⁶C'alal ta xlic toyuc batel ti toc ta sba ti Axibalnae, ti israeletique ta stotsic batel ti Axibalna yu'unique. Ta stam batel ti sbeique.

³⁷Yan ti mi mu'yuc ta stots batel ti toque, mi ja'uc ti stuquique ta stotsic ti Axibalna yu'unique. Yu'un ja' ta smalaic ti mi ta stots batel ti toque.

³⁸Yu'un ti c'u sjalil snatil xanavic ti israeletique, yilojic ta sba ta sat scotolic xtoc ti toc yu'un ti Diose. Yu'un ti ta c'ac'altique, tey ono'ox oy ta sba ti Axibalnae. Yan ti ta ac'ubaltique, xtililet ono'ox ti c'oc' ta sbae.