Read Tzotzil Éxodo 5 Bible Online

Éxodo 5 - Tzotzil bible

Éxodo 5

¹Ts'acal to taj une, ti Moisese xchi'uc ti Aarone xi bat yalbeic ya'i ti faraone: —Xi laj yal ti Ajvalil Dios yu'un ti Israele: “Ac'o ave ati' ti xu' ta xloq'uic batel ta sbajtical banomil ti calab jnich'nabe yo' jech xba spasic q'uin sventa quich'el ta muc'.”

²C'u stu un, ti faraone xi laj staq'ue: —¿Buch'u ti Ajvalil taje yo' jech ta jch'unbe smantal ti xu' xcac' que ti xu' ta xloq'uic batel ti israeletique? Mu xcojtiquin ma' ti Ajvalil taje. Ja' jech xtoc mi ja'uc ta xcac' loc'uc batel ti israeletique.

³Jech ti stuquique xi laj yalique: —Ti Dios yu'un ti hebreoetique tal sa'uncutic. Jech o xal un, ta xibatcutic ta sbajtical banomil ti ja' oxibuc c'ac'al ti sbelele yo' jech ta xcac'becutic smoton ti Ajvalil Dios cu'uncutique. Yu'un mi mo'oje, xu' ta xichamcutic ta chamel, mi ta milel ta espada.

⁴Ja' no'ox un, ti ajvalil yu'un ti Egiptoe xi laj yale: —Ti vo'ote, Moisés, xchi'uc ti vo'ote, Aarón, ¿c'u cha'al ta xach'aybe yo'nton ti jnaclejetic yacalic ta abtele? Batanic, ba abtejanic.

⁵Xi laj yal xtoc ti faraone: —Ti jech epic xa ti israeletic ti li' ta jteclum avi tanae, ¿mi yu'un ta xac'anic ti ta xicta sbaic ta abtel avu'unique?

⁶Ti jech c'ac'al taje, ja' o ti faraone xi laj yalbe mantal ti jq'uel-abteletic yu'une, xchi'uc ti banquilal yu'un ti jujuvoc' j'abteletique:

⁷—Mu xa xasa'beic talel sjobelic ti israeletic jech c'u cha'al ta xapasic to ox c'alal ta spasic ti xamite. ¡Ac'o ba sa' talel stuquic!

⁸Ja' no'ox, sujic ta spasel jech c'u cha'al yepal ta spasic ono'ox ti xamit ta ba'yele. ¡Mi ja'uc jbejuc xamit ta xch'ay! Yu'un toj ch'ajic ta abtel. Yu'un xi x'avlajet ta xalique: “Ba cac'betic smoton ti Dios cu'untique.”

⁹X'ech' to sujic ya'i ta abtel ti jnaclejetique. Ch'aybeic yo'nton ta abtel yo' jech mu xch'unic jutbilal c'op —xi ti faraone.

¹⁰Jech ti jq'uel-abteletique xchi'uc ti banquilaletic yu'un jujuvoq'ue, loq'uic batel ti xi laj yalbeic ya'iic ti jnaclejetique: —Ti faraone laj yal mantal ti mu'yuc xa ta xasa'bat talel ajobelique.

¹¹Avi tana une, ta xba asa' talel atuquic ti bu xataic talele. Ja' no'ox un, mi ja'uc jbej xamit ta stsul ti c'u yepal albil ono'ox ta xapasique.

¹²Jech ti israeletique tanijic ta sbejel Egipto ta sa'el c'ajben yo' jech ta stunesic ta sventa sjobelal ti xamite.

¹³Ti jq'uel-abteletic yu'un ti faraone, scotol c'ac'al ta sujvanic ta abtel ti staojuc yav ta spasic ti xamit jech c'u cha'al c'alal ac'bilic to ox ti sjobelique.

¹⁴Ja' jech xtoc ti israeletique ta xich'ic majel yu'un ti banquilal jq'uel-abteletique, ti xi ta x'albatique: —¿C'u cha'al mi ja'uc ti voljee, ti naxe, ti ja' to mu xc'ot ta stsutsel avu'unic ta spasel ti xamite jech c'u cha'al ta xapasic to oxe?

¹⁵Ti jujuvoc' jtsobvanejetic yu'unic ti israeletique, xi laj yalic ti c'alal bat sc'anic parte ta stojol ti faraone: —¿C'u cha'al jech ta xapasbe ti avajtuneltaque, Jcuch abtel?

¹⁶Mu'yuc xa bu ta xi'ac'batcutic ti jobelcutique. Yu'un sujbiluncutic ta spasel ti xamite. Ma'uc no'ox taje. majbiluncutic, ja' ta smulic ti avinictaque, Jcuch abtel.

¹⁷Ja' no'ox un, ti faraone xi laj staq'ue: —Mu'yuc xa c'usi yan ti vo'oxuque. Ja' no'ox toj ch'ajoxuc ta abtel. Yu'un ja' no'ox ta xavalic: “Batic, ba cac'betic smoton ti Diose.”

¹⁸Batanic, ba abtejanic. Ac'o mi mu'yuc xa ta xavich'ic ac'bel ti ajobelique, ja' no'ox un, jech ono'ox yepal ta xapasic ti xamit jech c'u cha'al albil sc'oplale.

¹⁹Ti jtsobvanejetic yu'unic ti jujuvoc' israeletique, ochic ta at-o'nton c'alal ya'iic albatic yu'un ti ajvalil mu ja'uc ta stsulesbatic jbejuc c'u yepal ta spasic jujun c'ac'al ti xamite.

²⁰C'alal laj yo'ntonic ta sc'oponel ti ajvalil faraone, laj snupic ta be ti Moisese xchi'uc ti Aarone, yu'un malabilic xa.

²¹Ja' yu'un un, xi albatique: —Ac'o yich' ta venta Dios ti c'usi laj apasique. Ac'o xastsitsoxuc. Ti vo'oxuc ta amulic ti chopol ta xiyilcutic ti faraone xchi'uc ti yaj'abteltaque. Vo'oxuc laj avac'beic ta sc'ob ti espadae yo' jech ta xismiluncutic.

²²Ja' yu'un un, ti Moisese xi laj yalbe Dios c'alal laj sta ta c'oponele: —Cajval, ¿c'u cha'al ta xavac'be svocol ti anich'nabe? ¿C'u cha'al laj atacun talel?

²³C'alal tal jc'opon ti faraón ta aventae, ti stuque x'ech' to lic yac'be svocol ti anich'nabe. Ti vo'ot une mu'yuc c'usi ta xapas yo' ta xatic' aba ta spojel.