Read Tzotzil Éxodo 6 Bible Online

Éxodo 6 - Tzotzil bible

Éxodo 6

¹Ti Diose xi laj staq'ue: —Avi tanae, ta xavil ti c'usi ta jpas ta stojol ti faraone, yu'un ja' to ta xac' loc'uc batel ta steclumal ti mi tsots ta sta ti ilbajinele. Va'i unbi, xu' xa ta xal stuc ti ac'o loq'uicuc batele.

²Ti Moisese xi albat yu'un ti Dios yan veltae: —VU'UN TI AJVALILUNE.

³Ti jbiinoj Dios ti scotol xu' cu'une, laj cac' jba iluc ta stojol ti Abrahame, ti Isaaque, ti Jacobe. Ja' no'ox un, mu'yuc laj jvinajes AJVALIL xi ti jbats'i bi ta stojolique:

⁴Ac'o mi jech taje, ja' no'ox un, laj jpas jun jtrate ta stojolic. Laj cal ta xcac'beic ti Canaán banomil bu co'ol s'elan jyanlum xanavic c'uc sjalile.

⁵Avi tana une, quiloj xa ti oyic ta vocol ti israeletique. Yu'un tsots ta sujatic ta abtel yu'un ti egipcioetique. Ja' yu'un un, t'ab ta co'nton ti jtratee.

⁶Ja' yu'un un, batan, ba albo ya'iic ti israeletique ti vu'un Ajvalilune ta jpoj loq'uel ta mosovil ti tsots ta sujatic ta abtel yu'un ti egipcioetique. Ta jvinajes ep ta tos ti c'u s'elan tuc' jna' xichapanvane.

⁷Ta xa jbisoxuc ta calab jnich'nab. Vu'un Diosun avu'unic. Ja' to jech ta xana'ic ti vu'un Ajvalilune, ti Diosun avu'unique, ti ta jpojoxuc loq'uel ti yacaloxuc ta tsots abtel yu'un ti egipcioetique.

⁸Ta xaquic'oxuc batel ta banomil ti calojbe ono'ox ti ta xcac'be ti Abrahame, ti Isaaque, ti Jacobe. Vu'un ti Ajvalilune ta xcac'boxuc abanomilinic.

⁹Ti Moisese bat xcha'albe ya'i ti israeletique. Ja' no'ox un, mu'yuc xa laj yich'beic ta muc'. Yu'un mu xa stac' a'yeluc ta xa'iic yu'un ti tsots mosovinbilique.

¹⁰Ja' yu'un un, ti Diose xi laj yalbe ya'i ti Moisese:

¹¹—Batan, ba albo ya'i ti faraone ti ac'o yac' loc'uc batel ta Egipto ti israeletique.

¹²Ja' no'ox un, ti Moisese xi laj yalbe ti Diose: —Mu xa ja'uc xiyich'ic ta muc' ti israeletique, ¿c'uxi ono'ox ta xcut ta xiyich' ta muc' ti faraone c'alal mu xitojob xic'opoje?

¹³Jech o xal ti Diose laj yalbe mantal ti Moisese, ti Aarone, ti ac'o yalbeic ya'i ti israeletique xchi'uc ti faraone, ti yich'ojic tsots mantal ti ac'o yac' loc'uc batel ta Egipto ti israeletique.

¹⁴Li'e, ja'ic ti banquilaletic yu'un ti jujuchop ta sventa ti stot sme'ique: Ti Rubén ti ja' sbanquilal nich'on ti Israele, xi s'elan sbi ti xnich'nabtaque: ja'ic ti Hanoque, ti Falue, ti Hezrone, ti Carmie. Taje, ja' me jchop snitilul ti Rubene.

¹⁵Xnich'nabtac ti Simeone, xi s'elan ti sbiique: ja'ic ti Jemuele, ti Jamine, ti Ohade, ti Jaquine, ti Zoare, xchi'uc ti Saúl yol ti jun cananea antse. Taje, ja' me jchop snitilultac ti Simeone.

¹⁶Ti Levie ch'i c'opoj vuclajuneb yucvinic (137) jabil. Xi s'elan sbi ti xnich'nabtac ti lic ta banquilale, c'ot c'alal ta its'inal: ja'ic ti Gersone, ti Coate, ti Merarie.

¹⁷Xnich'nab ti Gersone, xi s'elan xcholet ti jujuchop sbiique: ja'ic ti Libnie xchi'uc ti Simeie.

¹⁸Ti Coate ch'i c'opoj oxlajuneb yucvinic (133) jabil. Xi s'elan sbi ti xnich'nabtaque: ja'ic ti Amrame, ti Izhare, ti Hebrone, xchi'uc ti Uziele.

¹⁹Yan ti xnich'nab Merarie, xi s'elan ti sbiique: ja'ic ti Mahlie, ti Musie. Taje, ja' me jchop snitilul ti Levi ti lic ta banquilale, c'ot c'alal to ta its'inal.

²⁰Ti Amrame laj yic' ti sjun me'e, ja' ti Jacabed sbie. Ja' tey voc' talel ti Aarone xchi'uc ti Moisese. Ti Amrame ch'i c'opoj vuclajuneb yucvinic (137) jabil.

²¹Xnich'nab ti Izhare, xi s'elan ti sbiique: ja'ic ti Coree, ti Nefege, xchi'uc ti Zicrie.

²²Xnich'nab ti Uziele, xi s'elan ti sbiique: ja'ic ti Misaele, ti Elsafane, xchi'uc ti Sitrie.

²³Ti Aarone laj yic' ti Elizaba ti ja' xchi'il ta voq'uel ti Nahsone. Ti Elizabae, ja' yantsil nich'on ti Aminadabe. Ja' jech sbitac ti yol laj svoq'uese, ja' ti Nadabe, ti Abihue, ti Eleazare, xchi'uc ti Itamare.

²⁴Xnich'nab ti Coree, ja'ic ti Asire, ti Elcanae, xchi'uc ti Abiasafe. Taje, ja'ic sts'unubal ti coreítaetique.

²⁵Ti Eleazar ti ja' jun ta scotol xnich'on ti Aarone, laj yic'be stseb ti Futiele, voc' talel ti Fineese. Taje, ja' totil me'il yu'un ti levitaetic ti xcholet laj ech'uc ta jujuvoq'ue.

²⁶Ti Aarone xchi'uc ti Moisés taje, ja'ic ti buch'utic albatic yu'un Dios ti ac'o sloq'uesic batel ti israeletic ta Egipto banomil jech c'u cha'al junuc soldado ta svol loq'uele.

²⁷Ti Moisese xchi'uc ti Aarón taje, ja'ic ono'ox ti buch'u ay sc'oponic ti faraón ti ja' ajvalil yu'un ti jteclum Egiptoe yo' jech xu' ta sloq'uesic batel ta jteclum ti israeletique.

²⁸C'alal sc'ac'alil c'oponat yu'un Dios ti Moisés ta Egiptoe,

²⁹xi laj yale: —Vu'un ti Ajvalilune, scotol ti c'usi ta xacalbee, albo ya'i ti faraón ajvalil yu'un ti Egiptoe.

³⁰Ja' no'ox un, ti Moisese xi laj staq'ue: —Cajval, mu xitojob xic'opoj. Ja' yu'un un, ¿c'usi chcut yo' ta xiyac'un ta venta ti faraone?