Read Tzotzil Éxodo 8 Bible Online

Éxodo 8 - Tzotzil bible

Éxodo 8

¹va'i un, ti Diose xi laj yalbe ya'i ti Moisese: —Batan, ba q'uelo ti faraone, xi xavalbe ya'ie: “Xi ta xal ti Diose: ‘Ac'o ave ati' ti xu' ta xloq'uic batel ti calab jnich'nabe yo' jech chbat yich'icun ta muc'.

²Yan ti mi mu xavac' loc'uc batele, ta xquilbajin ta epal ranaetic sjunlej ti alumale.

³Ti ta uc'ume, ta xvoc' talel epal ranaetic. Ta xloq'uic batel, chba stic'anan sbaic ta ana, ta avayeb. Ta xmuyan batel ta sba atem, ta snaic xtoc ti avaj'abteltaque, xchi'uc scotol ti avinquileltaque, ti ta sta'ajesobil apane, xchi'uc ti bu ta xich' vots'ele.

⁴Ti ranaetique xbitlajet liquel ta aba, ta sba ti avaj'abteltaque, ta sba xtoc scotol ti avinquileltaque.’ ”

⁵Ti Diose xi laj yalbe ya'i ti Moisese: —Albo ya'i ti Aarone ti ac'o stoy ti svaxton ta sba ti uc'ume, ti bic'tal uc'ume, ti nabe, ti bu ts'anajtic ti vo'e, yo' jech ta xloq'uic talel ti ranaetique. Ac'o snojesic sjunul ti jteclum Egiptoe.

⁶Jech ti Aarone laj stoy ti svaxton ta sba ti vo' ti oy ta jteclum Egiptoe. Scotol ti jteclume noj ta rana ti loq'uic talel ta uc'ume.

⁷Manchuc mi jech un, laj spasic jech ta sc'op spucujic ec ti viniquetic ti xilic toyol cajale. Sjunul yosilal Egipto nojem com ta rana.

⁸Jech o xal ti faraone xi laj yalbe ti Moisese xchi'uc ti Aarone ti c'alal laj sta ta iq'uele: —C'anbeic ti Diose ti ac'o sloq'ues batel ti ranaetic ti oy ta jtojole xchi'uc ti jvinquileltaque. Ta xcac' loc'uc batel ti avinquileltaque. Ac'o ba yac'beic smoton ti Diose.

⁹Ti Moisese xi laj stac'be ti faraone: —Albun ca'i c'usi ora ta xac'an ta jc'anbe ti Dios ti ta sloq'ues batel ti ranaetic ti oy ta atojolale, xchi'uc ta stojol ti avaj'abteltaque, xchi'uc ta stojol ti avinquileltaque, xchi'uc ti oy ta anae. Yan ti oy ta uc'ume, tey ta xcom.

¹⁰—Oc'om no'ox —xi laj yal ti faraone. Ti Moisese xi laj staq'ue: —Jech ta xich' pasel yo' jech ta xana' ti mu'yuc xa yan Dios jech c'u cha'al ti Dios cu'uncutique.

¹¹Ti ranaetique chlaj loc'uc batel ti oy ta anae. Ja' no'ox ta xcom ti oy ta uc'ume. Mi ja'uc xa ta xayilbajinot. Mi ja'uc xa ta xilbajin ti avaj'abtelique, ti avinquileltaque.

¹²Ti Moisese xchi'uc ti Aarone loq'uic batel ta sna ti faraone. Ts'acal to un, ti Moisese laj sc'anbe ti Ajvalil ti ja' Diose, ti ac'o sloq'ues batel ti ranaetic ti laj stac talel ta stojol ti faraone.

¹³Jech laj spas ti Diose jech c'u cha'al laj sc'an ti Moisese. Cham ti ranaetic ti oy ta yut nae, ti oy ta amaq'ue, xchi'uc ti oy ta osiltique.

¹⁴Jech ti jnaclejetique laj stsobic ti chamem ranaetique. Buyuc no'ox laj sbusanic ta jujubus. Xva'et no'ox stuil ti banomile.

¹⁵Ac'o mi jech laj yich' pasel taj une, c'alal laj yil ti faraón ti mu'yuc ti svocole, pucujib xtoc. Mu'yuc laj yich' ta muc' ti Moisese xchi'uc ti Aarone. C'ot ta pasel jech c'u cha'al albilic ono'ox yu'un ti Diose.

¹⁶Ti Diose xi laj yalbe ya'i ti Moisese: —Albo ya'i ti Aarone ti ac'o smaj ta svaxton spucuquil ti banomile yo' jech ta xjoybij ta us ti pucuque. Ac'o tanijuc batel ta sjunlej Egipto.

¹⁷Ja' jech laj spasic. Ti Aarone laj smaj ta svaxton spucuquil ti banomile. Scotol ti pucuc ti oy ta Egiptoe joybij ta jti'vanej usetic. Laj yilbajin ti jnaclejetique xchi'uc ti chon bolometique.

¹⁸Ti viniquetic ti xilic toyol cajale, sc'an ox ta spasic jech ta sc'op spucujic ti ta xesomtaic ti usetic eque. Ja' no'ox un, mu'yuc xa xu' yu'unic. Jech ti usetique lic yilbajin ti jnaclejetique xchi'uc ti chon bolometique.

¹⁹Jech o xal un, ti buch'utic xilic ti toyol cajale, xi bat yalbeic ya'i ti faraone: —Le'e, ja' xa yabtel ti Diose. Ja' no'ox un, ti faraone pucujib ti yo'ntone. Mu xich' ta muc'. C'ot ta pasel jech c'u cha'al yaloj ono'ox ti Diose.

²⁰Ti Diose xi laj yalbe ya'i ti Moisese: —Ti faraone sob ta xbat oc'om ta uc'um. Ja' yu'un un, sob xalic. Batan, ba q'uelo ti xi xavalbe ya'ie: “Xi ta xal ti Diose: ‘Ac'o ave ati' ti xu' ta xloq'uic batel ti calab jnich'nabe yo' jech ta xbat yich'icun ta muc'.

²¹Yu'un ti mi mu xavac' loc'uc batele, ta jtac talel jts'uts'-ch'ich' vov ta atojol, ta stojol ti avaj'abteltaque, ta stojol ti avinquileltaque, xchi'uc ti c'u yepal oy ta anae. Ta jnojes ta jts'uts'-ch'ich' vov scotol snaic ti egipcioetique, xchi'uc ti banomile.

²²Ja' no'ox un, c'alal jech ta xc'ot ta pasel taje, ti jnich'nab ti nacalic ta Gosene, mu xlajic ta ti'el ta jts'uts'-ch'ich' vov. Yu'un mu jcotuc ta xc'ot tey. Yu'un ch'acbilic cu'un. Ja' to jech xana' ti li' oyun ta alumal ti Vu'un Ajvalilune.

²³Ta xcac' ta ilel ti mu xco'olaj ta jpas ta stojol ti avinquileltaque xchi'uc ti calab jnich'nabe. Taje, oc'om ta xc'ot ta pasel.’ ”

²⁴Jech laj spas ti Diose. Co'ol s'elan lumal toc x'ic'ubin no'ox tal ti jts'uts'-ch'ich' vovetic ta sna ti faraone, ta sna ti yaj'abteltaque, xchi'uc ta jteclum yu'un ti egipcioetique. Ti jts'uts'-ch'ich' vove laj soquesan scotol ti c'usi x'ayan ta sjunlej Egiptoe.

²⁵Ja' yu'un un, ti faraone laj sta ta iq'uel ti Moisese xchi'uc ti Aarone, ti xi laj yale: —Batanic, ba ac'beic smoton ti Dios avu'unique. Ja' no'ox un, mu xaloq'uic batel ti li' ta jteclume.

²⁶Ti Moisese xi laj staq'ue: —Mu lecuc ti jech ta jpascutic taje. Yu'un ti chon bolometic ti ta jmilcutic ta sventa smoton ti Ajvalil Dios cu'uncutique, ch'ul chon bolometic ta xilic ti egipcioetique. C'alal ta xilic ti egipcioetic ti ta jmilcutic ti chon bolometic ti ja' ch'ul chon bolometic ta xa'iique, ta jbel sc'oplal ta xismiluncutic ta ton.

²⁷Jech o xal tsots sc'oplal ta xibatcutic c'alal to sbajtical banomil ti ja' yich'oj oxib c'ac'al sbelele. Yu'un tey to c'alal chbat cac'becutic smoton ti Dios cu'uncutique co'ol jech c'u cha'al laj yalbuncutique.

²⁸Ja' yu'un un, ti faraone xi laj yale: —Lec oy, batanic ta sbajtical banomil ta yac'bel smoton ti Ajvalil Dios avu'unique. Ta xcalboxuc ava'iic ti mu me toj nomuc xabatic une. Ja' jech xtoc, c'anbeic vocol ti Dios ta jtojole.

²⁹Xi laj stac' ti Moisese: —C'alal mi liloc' batele, ta jc'anbe ti Dios ti ac'o sloq'ues batel oc'om ti jts'uts'-ch'ich' vovetic ti oy ta atojole, ta stojol ti avaj'abteltaque, xchi'uc ti avinquileltaque. Ja' jech ta jc'anbe ti Diose, ti mi mu staojuc yav ti ja' no'ox ta xalo'launcutique, ti mi mu'yuc ta xamacbe yo'nton ti israeletic ti chbat yac'beic smoton ti Diose.

³⁰C'alal loc' batel ti Moisés ta sna ti faraone, laj sta ta c'oponel ti Diose.

³¹Ti xi s'elan laj sc'an ti Moisese, jech laj spas ti Diose. Loc' batel ti jts'uts'-ch'ich' vovetic ta stojol ti faraone, ta stojol ti yaj'abteltaque, xchi'uc ta stojol ti svinquileltaque.

³²Ja' no'ox un, ti faraone lic pucujibuc yo'nton yan velta. Mu'yuc laj yac' loc'uc batel ti israeletique.