Read Tzotzil Éxodo 9 Bible Online

Éxodo 9 - Tzotzil bible

Éxodo 9

¹Ti Diose xi laj yalbe ya'i ti Moisese: —Ba q'uelo ti faraone, ti xi xavalbe ya'ie: “Xi ta xalbot ava'i ti Ajvalil ti ja' Dios yu'un ti hebreoetique: ‘Ac'o ave ati' ti xu' ta xloc' batel ti calab jnich'nabe yo' jech chbat yich'icun ta muc'.

²Mi mu xavac' loc'uc batele, mi ja' no'ox ti apajtsanoje,

³ti smuc'ul stsatsal ti Diose, ta slaman talel ta sba ti chon bolometic avu'un ti oy ta osile, jtsutsesvanej xa ta j'ech'el ti xchamelic ta xvul ta loq'uele. Ta xcham ti ca'etique, ti burroetique, ti camelloetique, ti vacaxetique, xchi'uc ti chijetique.

⁴Yo' jech mu xcham jcotuc chon bolometic yu'un ti israeletique, ti Diose, jelel ti c'usi ta spasbe ta stojol ti chon bolometic yu'un ti israeletique xchi'uc ti chon bolometic yu'un ti egipcioetique.’ ”

⁵Ti Diose laj to yac'be sc'ac'alil. Ja' yu'un xi laj yale: —Taje, oc'om ta xc'ot ta pasel cu'un.

⁶Ta yoc'omal un, jech laj spas ti Diose. Cham scotol xchon sbolomic ti egipcioetique. Yan ti israeletique, mi ja'uc jcotuc cham ti xchon sbolomique.

⁷Jech ti faraone laj yal mantal ti ac'o ba yich' q'uelbel ti chon bolometic yu'unic ti israeletique. Vinaj ti mu'yuc xcham jcotuc ti chon bolometic yu'unique. Ac'o mi jech laj ya'i un, pucujib ti yo'ntone. Mu'yuc laj yac' loc'uc batel ti israeletique.

⁸Jech ti Diose xi laj yalbe ti Moisese xchi'uc ti Aarone: —Jopic batel jopuc stanil ti jornoe. Ti tane, ac'o svij muyel ta vinajel ti Moisés ta sba ta sat ti faraone.

⁹Jech ti tane ta xjoybij ta epal pucuc ti ta xtanij batel ta sjunlej ti jteclume. Ta xlic tsacaticuc ta c'a'emal chin scotol ti jnaclejetique xchi'uc scotol ti chon bolometic ta Egiptoe.

¹⁰Jech ti Moisese xchi'uc ti Aarone laj sjopic batel jop ti stanil jornoe, batic ta sc'oponel ti faraone. Jech ti Moisese laj svij muyel ta vinajel ti tane. Ja' yu'un un, ti jnaclejetique xchi'uc ti chon bolometique, bololic no'ox liquel ta c'a'emal chin.

¹¹Ti viniquetic ti xilic toyol cajale, mu'yuc xa xcuch yu'unic ta stsalel ti Moisese. Yu'un bololic xa ta chin ec jech c'u cha'al scotolic ti egipcioetique.

¹²Ja' no'ox un, ti Diose laj yac' pucujibuc yo'nton yan velta ti faraone. Jech o xal un, mu'yuc laj yich' ta muc' ti Moisese, ti Aarone. C'ot ta pasel jech c'u cha'al albil ono'ox yu'un Dios ti Moisese.

¹³Ja' yu'un un, ti Diose xi laj yalbe ti Moisese: —Sob xalic oc'om, ba q'uelo ti faraón ti xi xavalbe ya'ie: “Ti Ajvalil ti ja' Dios yu'unic ti hebreoetique, xi ta xalbote: ‘Ac'o ave ati' ti xu' ta xloc' batel ti calab jnich'nabe yo' jech chbat yich'icun ta muc'.

¹⁴Avi tana li'e, ta xcac' taluc scotol ti vocol ta atojole, ta stojol ti avaj'abteltaque, xchi'uc ta stojol ti avinquileltaque, yo' jech xana' ti mu'yuc buch'u jech yan ti li' ta banomil jech c'u cha'al ti vu'une.

¹⁵Ch'abal xa li' oyot ta banomil xchi'uc ti ateclumaltac ti lajuc jlaman ta aba scotol ti jmuc'ul jtsatsal ta yac'belot ti vocole.

¹⁶Ja' no'ox un, yu'un laj to cac' ch'ian c'opojan yo' jech ta xavil ta aba ta asat ti jmuc'ul jtsatsale, yo' jech ta aventa ta xiyojtquinicun ta sjunlej banomil.

¹⁷Manchuc mi jech un, ti vo'ote avac'ojbe yipal ta xamacbe yo'nton ti calab jnich'nabe, yu'un mu xacolta batel.

¹⁸¡Lec ti jech avo'ntone! Jech ora oc'om jech c'u cha'al li'e, ta xcac' taluc tsots bot ti sba to velta jech ta xc'ot ta pasel li' ta Egiptoe.

¹⁹Ja' yu'un un, alo me mantal ti ac'o sa'beic snail bu ta xich' naq'uel ti avacaxe xchi'uc scotol ti c'usi x'ayan avu'un ta osiltique. Yu'un ti c'alal ta xbaj yalel talel ti bote, ta smilan ti jnaclejetique xchi'uc ti chon bolometic ti mu'yuc yaxibe.’ ”

²⁰Oy jun chib yaj'abteltac ti faraone xi'ic yu'un ti va'i s'elan laj yal ti Diose. Jech o xal un, laj sa'beic snailic ti smosovique xchi'uc ti chon bolometic yu'unique.

²¹Ja' no'ox un, oy jlom mu'yuc laj yaq'uic ta venta. Com ta osiltic ti c'usi oy yu'unique.

²²Jech ti Diose xi laj yalbe ya'i ti Moisese: —Toyo ac'ob ta vinajel. Ac'o yaluc talel bot ta sjunlej ti Egiptoe. Ac'o bajuc ta sbaic ti jnaclejetique, ta sbaic ti chon bolometique, xchi'uc ta sba ti c'usi sts'unojanic ta osiletic yu'un ti egipcioetique.

²³Ti Moisese laj stoy muyel ti sc'ob ta vinajele. Jech ti Diose, xc'avlajet no'ox liquel yu'un ti chauque. Xjaplajet no'ox liquel yu'un ti sac tsele. Xvajet no'ox liquel yu'un ti bot ta banomile. Sjunlej Egipto noj com ta bot.

²⁴Mu'yuc spajeb ti xc'avlajet no'ox ti chauque. Jech ti bote mu'yuc spajeb ta xyal talel. Ja' to sba velta vinaj sc'oplal ti tsots laj yac' ti bot ta Egiptoe.

²⁵Ti bote laj slilin ta c'asel scotol ti c'usi x'ayan ta yosilal ti egipcioetique: Laj smilan ti jnaclejetique, ti chon bolometique, xchi'uc scotol ti ts'unbolal te'etic ta osile. Jepanantic com yu'un scotol sc'ob-c'obtac ti te'etic yu'un ti jteclume.

²⁶Ac'o mi jech un, yan ti ta Gosén banomil ti bu nacalic ti israeletique, mi ja'uc jbej bot c'ot tey.

²⁷Jech o xal ti faraone xi laj yal ti c'alal laj stac ta iq'uel ti Moisese xchi'uc ti Aarone: —Laj xa jna' jba ti oy jmule. Jmul jtuc xchi'uc ti jvinquileltaque. Ma'uc smul ti Diose.

²⁸Mu xa ts'icbaj ta xca'i ti xc'avlajet no'ox ti chauque xchi'uc ti bot xvajet no'ox ta xtal ta jtojolcutique. Jech o xal mu'yuc xa ta jpajtsanoxuc. C'oponic ti Dios ta jtojolcutique. Ta xcac' batanic.

²⁹Ti Moisese xi laj staq'ue: —Mi liloc' batel ta jteclume, ta ora no'ox ta jtoy jc'ob ta sc'oponel ti Diose. Ja' yu'un un, ta xpaj ti chauque xchi'uc ti bote yo' jech xana' ti ja' yu'un Dios ti banomile.

³⁰Ja' no'ox un, jna' lec ti vo'ote xchi'uc ti avaj'abteltaque, mu to ta xaxi'taic ti Dios ti ja' Ajvalile.

³¹Ti ts'unbiquil tuxnuque xchi'uc ti jchop o ta trigoe, lilij ta j'ech'el. Yu'un ti jchop o ta trigoe, ja' to no'ox ta xac' sjol. Jech ti tuxnuque yacal ta nich.

³²Yan ti trigoe xchi'uc ti yan trigo xtoque, mu'yuc xlaj, yu'un xu' to sbotsin talel ta ts'acal.

³³Ti Moisese loc' batel ta jteclum ti c'alal laj xa ox sc'opon sba xchi'uc ti faraone. Laj stoy sc'ob ta sc'oponel ti Diose. Ta ora no'ox paj ti chauque, ti vo'e, xchi'uc ti bote.

³⁴Ja' no'ox un, c'alal laj yil ti faraón ti mu'yuc xa ta xac' ti vo'e, ti bote, xchi'uc ti mu'yuc xa xc'avlajet ti chauque, lic sa' smul yan velta. Ja' no'ox un, ma'uc xa no'ox stuc ti pucujib ti yo'ntone, ja' jech pucujib yo'ntonic ti yaj'abteltac eque.

³⁵Ti jech pucujib yo'nton ti faraone, ja' yu'un un, mu'yuc laj yac' loc'uc batel ti israeletique. C'ot ta pasel jech c'u cha'al albil ono'ox yu'un Dios ti Moisese.