Read Tzotzil Job 1 Bible Online

Job 1 - Tzotzil bible

Job 1

¹Ti ta yosilal jteclum Uze, nacal jun vinic ti sbiinoj Jobe, ti lec stuc'ulanoj sbae. Lec ti xcuxlejale. Jun lequil yajtunel Dios ti xchabioj sbae, ti mu'yuc buch'u oy c'usi chopol ta spasbee.

²Oy vucub (7) squerem nich'nab, xchi'uc oxib (3) stsebetic ti Job taje.

³C'otem ta yajval vucmil (7,000) ta cot chij, oxmil (3,000) ta cot camello, vo'ob ciento (500) ta cot jchabajom vacax, xchi'uc vo'ob ciento (500) ta cot me' burroetic. Yepal no'ox smosovtac xtoc. Spajeb banquilal jc'ulej vinic ti oy ta yeloval sloq'ueb c'ac'ale.

⁴Xnich'nabtac ti Jobe, stalelic xvoletic ta ve'el uch'ubajel ta stsob sbaic ta snaic ta jujun, ti ta xiq'uic ta ve'el ec ti oxib antsetic xchi'ilic ta voq'uele.

⁵C'alal ta stsuts ti ve'el uch'ubajel c'u sjalile, ta stsob xnich'nab ti Jobe. Sob xa ta xlic ta sva'an sba ta yaq'uel chic'bil matanal ta sventa ti jujunic yo' ta smese stuseic yu'un ti smulique. Jech stalel ta spas ti Jobe, ti ta snopilan ti oy bu xu' laj sta smul ti xnich'nab ta scoj ti mi oy bu ta yut yo'ntonic laj sbisic ta cotol chaval ti Diose.

⁶Oy jun c'ac'al, sta yorail ta sva'an sbaic ta stojol Dios ti jtuneletic ti oyic ta vinajele. C'ot ec ti jtic'-mulil ánjel ta stojolique.

⁷Xi jac'bat yu'un ti Diose: —¿Bu lalic talel le' ec une? Xi laj stac' ti jtic'-mulile: —Xiyal ximuy no'ox ta xaniel ti banomil ta jujujote.

⁸Va'i un, xi albat yu'un ti Diose: —¿Mi mu atuc'ulanojuc lec ti cajtunel Jobe? Mu'yuc xa yan jech ta banomil, ti yutsil yo'nton ta xac' sba ta tunel ta jtojole, ti xchabioj sba ta spasel ti c'usi oy yutsile, ti stuc'ulanoj sba leque, ti mu'yuc buch'u oy c'usi chopol ta spasbee.

⁹Le' une, xi laj stac' ti jtic'-mulile: —Mu ta jeche'uc no'ox ti spajeb yutsil yo'nton ta xac' sba ta tunel ta atojole.

¹⁰Yu'un ti vo'ote mu xavac' ti oy c'usi chopol ta xc'ot ta stojole, mi ja'uc ti yalab xnich'nabe, mi ja'uc jset'uc ti c'usitic oy yu'une. Ava'anoj aba ta stojol ti c'usi ta spase, ti spajeb xa no'ox jun vinic yepal sc'ulejal ta sventa xchon sbolom ta sjunul ti muc' ta lume.

¹¹Ja'uc ti le' une, pojbo avil scotol ti c'usi oy yu'une. Ta aba ta asat, ta xavil ta sbisot ta cotol chaval.

¹²Ti Diose xi laj stac'be ti jtic'-mulile: —Lec oy un cha'e, ba paso avil ta stojol scotol ti c'usitic x'ayan yu'un ti Jobe, ti mu'yucuc c'usi chopol xapasbe ti stuque. Ti jtic'-mulil une loc' batel ta stojol ti Diose.

¹³Le' une, squerem stseb ti Jobe, oy jun c'ac'al, ta spasic q'uin ti tsobolic ta ve'el uch'ubajel ta sna ti sbanquilique.

¹⁴C'ot jun vinic ta sna ti Jobe, ti xi yich'oj c'otel ti lo'il a'yeje: —Yacaluncutic ta sloquel banomil ta osiltic xchi'uc ti vacaxetique, xchi'uc nopol xlamet ta xve' ti me' burroetic xtoque.

¹⁵Ta jech to yepal, vulic ta loq'uel ti sabeoetique. Laj yelc'anic batel ti chon bolometique. Laj smilic ta cuchilu ti viniquetique. Jtuc xa no'ox cuch cu'un jatobal yo' tal calbot ava'ie.

¹⁶Mu to ta stsuts lec slo'il ya'yej ti vinic taje, c'alal c'ot yan vinic ti xi laj yale: —Xc'avluj no'ox vulel ánjel ti toj lajel c'ot yu'un ti jq'uel-chijetique, xchi'uc ti chijetique. Jtuc xa no'ox cuch cu'un jatobal yo' tal calbot ava'ie.

¹⁷Mu to ta stsuts lec slo'il ya'yej ti vinic taje, c'alal c'ot yan ta yoxibal xa ti xi laj yale: —Oxvoc' to caldeoetic vulic ta loq'uel ti laj stsacuncutic ta majele. Laj yelc'anic batel ti camelloetique. Laj smilic ta cuchilu ti viniquetique. Jtuc xa no'ox cuch cu'un jatobal yo' tal calbot ava'ie.

¹⁸Mu to ta stsuts lec slo'il ya'yej ti vinic taje, c'alal c'ot to yan ti xi laj yale: —Ti aquerem atsebtaque tsobolic ta ve'el uch'ubajel ta sna ti abanquilal nich'one,

¹⁹ta jech to yepal, xjumet talel tsots ic' ti lic talel ta sbajtical banomil ti laj svuq'uilan ta voq'uel xchanjotal spac'obal ti nae, ti jin yalel ta sba ti anich'nabe, lajic scotolic. Jtuc xa no'ox mu'yuc xicham yo' tal cal ava'i une.

²⁰Ti Job une lic va'iuc. Xtuch'et yo'nton laj ya'i. Mu'yuc xa c'usi x'ech' o ta xa'i ti lic xch'i' ta jatel ti sc'u'e. Laj xch'ul loq'uel ti tsotsil sjole ti snupilan xa banomil laj spatan sba ta lumtique.

²¹Va'i un, xi lic yalbe sbae: —T'anal livoc' ti livul ta banomile. T'anal ta xipalch'uj batel yo' ta xquicta comel ti banomile. Dios laj yac'bun scotol ti c'usi laj jtae. Dios ta spojbun sutel xtoc. ¡Lequil c'optabiluc ta j'ech'el ti Diose!

²²Ti jech c'ot ta stojol scotol ti Job une, va'i un, mu'yuc laj sa' smul. Mi ja'uc oy c'usi chopol jbeluc laj yal ta stojol ti Diose.