Read Tzotzil Job 12 Bible Online

Job 12 - Tzotzil bible

Job 12

¹Ta melel ti vo'oxuque, toj lec bijoxuc. C'alal mi c'ot yorail lachamique, laj o sc'oplal ma' ti oy buch'u ta xac' ta na'el ti bijilile.

³Ja'uc le' ec une, xca'ibe to xchiquinal ya'yel ma' ti xavale, mi ja'uc ma' ti tsalbilun avu'unique. ¿Buch'u xa ono'ox mu sna' avalojic scotol ti va'i s'elane?

⁴Ac'o mi mu ta scojuc jmul jchopolal ti vi j'elane, ti buch'utic lec xquil jba xchi'uque, c'ajomal no'ox ta stse'inic ta jtojol. Lajem to ta alel yu'unic ma' ti oy bu laj ya'ibun jc'op ti xivocolet ta stojol ti Diose.

⁵Ti buch'u stsinanoj sbae, ta sjip sten ti buch'u abol sbae, mu xa sventauc mi ta x'ech' stacolta batel ti buch'u ta xa xbaje.

⁶Ti j'eleq'uetique lamajem ma' ti c'op ta snaique; ti jcontrainej Diose mu'yuc c'usi sna'ic, ta snopic ti ta yip no'ox yoc sc'ob ta staique.

⁷¿Mi jech la taje? uto ava'i ti chon bolometique, mi ja' ti mutetique, ta xa xchanubtasot.

⁸Ti c'usitic ch'iem ta banomil xtoque, xchi'uc ti choyetic oyic ta muc' ta nabe, albo ya'i ti ac'o xa sbijubtasote.

⁹¿Mi oy la buch'u mu sna' xana' ti ta yoc ta sc'ob Dios laj smeltsan scotol taje?

¹⁰Scotol ti c'usi cuxule, oy ta yoc ta sc'ob ti xcuxlejale.

¹¹Ti chiquinile ta xa'i ti c'opojele, ti eile ta xa'ibe smuil ti c'usi jtosucale.

¹²Ti buch'utic molibemique, oy xa sbijilic, xa'ibeic lec xchiquinal ti jech vulem xa ti xch'ulelic ta xch'iel c'opojele.

¹³Ja'uc ti Diose jelavem ti sbijile, ech'em ti smuc'ul stsatsale; ti yacal ta snopel ti c'usi ta spase, ta xc'ot ta tsutsel yu'un.

¹⁴Ti c'usi ta xc'ot ta lilinel yu'un ti Diose, mu'yuc xa buch'u xu' yu'un ta xcha'va'an; ti buch'u ta xbaje ta maquel yu'un ti Diose, mu'yuc xa buch'u xpojun loq'uel yu'un.

¹⁵Mi ta spajes ti mu xac' taluc ti vo'e, ta xtaquij scotol; mi ech'em no'ox ta xac' taluque, ta xmut'ij ti banomile.

¹⁶Ta sventa ti smuc'ul stsatsale, tsalbil ta xc'ot yu'un scotol; mu xa c'usi stac' spas ti jlo'lavaneje, xchi'uc ti buch'u lo'labile.

¹⁷Ta xc'ot ta pasel yu'un ta xch'aybe sbijil ti buch'u oy sbijile, ti ta xchuvajib yu'un ti jchapanvanejetique.

¹⁸Ta xch'ay yip yabtel ti ajvaliletique, ti t'anajtic ta x'iq'ueic batel ta chuquele.

¹⁹Ta xch'aybe yip yabtel ti paleetique; jipbil ta xloq'uic yu'un ti buch'utic tsots yabtel yich'ojique.

²⁰Ti jbijubtasvanej yu'unic ti co'ol yo'ntonique, mu xa xac' sjolic c'usi xu' ta xalic; ta xch'aybe snopbenal ti moletique.

²¹Ta xc'ot ta pasel yu'un ti mu'yuc xa ich'bil ta muc' ti banquilaletique; ch'abal xa yipic ta xc'ot yu'un ti buch'u tsots xa'i sbaique.

²²Ta xac' ta ojtiquinel ti bu mu xa xvinaje, ta svinajes ti bu spajeb chucul ti smelole.

²³Ja' x'epaj yu'un ti muc'tiquil lume, ja' ta stubbe sc'oplal, tan puc ta xbat yu'un, ta svol ta tsobel.

²⁴Ta xch'aybe sbijil ti banquilaletic yu'un ti muc' ta lume, ta xc'ot ta ch'ayel yu'un ta sbajtical banomil ti mu xa sna' bu oy ti bee,

²⁵ti xchav-chav pic xa ech'el ti be ta ic'al osile, ti xtamlajet ta jujujot jech c'u cha'al ti jyacubele.