Read Tzotzil Job 13 Bible Online

Job 13 - Tzotzil bible

Job 13

¹Scotol taje, laj quil ta jba ta jsat; laj ca'i ta jni' ta jchiquin.

²Ti c'usi xana'ique, xca'ibe xchiquinal ec; mi jutebuc ma' ti tsalbilun avu'unic une.

³Ja' xloc' venta ta xca'i ta jc'opon ti Diose; xloc' venta ta xca'i ta jvul jba xchi'uc ti Buch'u scotol xu' yu'une.

⁴Ti vo'oxuque ta xavalic ta jutbil c'op ti c'usi melel ono'oxe; jpoxtavanejoxuc ti mu'yuc buch'u xpoxtaj avu'unique.

⁵Ti tauc xats'ijan abaic ca'itique, ta nan xcaltic ac'oplalic ti bijil vinicoxuque.

⁶Avocolicuc, ts'etano ani' achiquinic c'alal ta xcal talel ava'iic ti jlo'il ca'yeje.

⁷¿Mi ta xanopic xana' ti xu' xapacbeic sc'oplal Dios ta sventa ti ajutbil c'opique, ti abisoj xa abaic ta yajtunel ti naca lo'lavanej ta xapasic xchi'uc ti ac'opique?

⁸Ti vo'oxuque nabaloxuc ta stojol ta spacbel ava'iic ti sc'oplale.

⁹Ja'uc le' une, ¿c'usi van ta xc'ot ta pasel xana' ti ta xlic yich'boxuc ac'opic ti Diose? ¿Mi stac' xalo'laic xana' jech c'u cha'al ta xapasbeic ti vinique?

¹⁰Ti xats'ijetic no'ox ta xapas abaic yilel ta stojole, ta jbel sc'oplal tsots ta xastsitsoxuc.

¹¹Xu' ta xbat ach'ulelic ta xi'el yu'un smuc'ul stsatsal ti Diose.

¹²Ti vo'neal lo'il maxil xavulajetic xchi'uque, naca c'a'ep ta j'ech'el, co'ol s'elan ti jpojuc xa jba ca'itic ta jun pojobbail ti naca ta ach'el meltsanbil ti smocale.

¹³Avi tana une, ¡ts'ijlanic to ca'itic, ta xic'opoj ava'iic, c'otuc xch'a ta pasel ti c'usi sc'an ta xc'ot ta jtojole!

¹⁴Jechuc mi cac' ti jol jbaquil xchi'uque, quil xa quic bu xic'ot ta loq'uel xchi'uc.

¹⁵Mi j'ech'el laj smilune, staoj yav jtsinanoj jba, yavil ti ta jpac ti jc'oplal c'alal jq'uelojbe jba jsatcutic xchi'uque.

¹⁶Ti jech taje, yic'al nan ta xc'ot ta pasel ta jta ti jcolele, ti buch'u mu'yuc xch'ulel xa'i sbae, mu nan x'och batel ta stojol.

¹⁷Ts'etano ani' achiquinic ta ya'yiel ava'iic ti c'u s'elan ta xloc' ta que ta yalel ta atojolique.

¹⁸Ta jpac ava'iic ti jc'oplale, jna' lec ti oy smelole.

¹⁹Mi oy buch'u ta xac'bun quil jmul ti jech ono'ox jpasoje, ts'ijil ta xicom, chamcun xch'a unbi.

²⁰Cha'tos no'ox ta jc'anbot ti c'uxubajuc avo'nton cu'un ti xi s'elane, ch'ul Dios, ti mu ja'uc ta jnac' jba ta atojole:

²¹Ictao aba ta stsitselun, mu xa xavac'bun xi'el ta j'ech'el.

²²C'oponun talel un, ta jtac'bot, mi ba'yel ta xic'opoje tac'bun talel.

²³Albun ca'i, ¿c'usi jtosucal ti jmule, ti jtoyobbaile? ¿C'usi jtosucal ti tsots laj jta ti jmule?

²⁴¿C'u cha'al ta xanac' aba ta jtojol? ¿C'u cha'al abisojun ta avajcontra?

²⁵Co'ol j'elan jech c'u cha'al junuc yanal te' ti bec'bil ta xbat ta iq'ue, ¿c'u cha'al ta xatsutsesun ava'i ta j'ech'el? Co'ol j'elan jech c'u cha'al ti taquin jobele, ¿c'u cha'al xabitet ta snutselun un cha'e?

²⁶Mu ts'icbaj ta xava'i ti ta xabusan ta jba ti jmule, ti ta yich'el que yu'un ti bu lijelav c'alal jqueremal to oxe.

²⁷Achucojbun ta carina taq'uin ti coque, ti avac'oj asat bu ta xixanave, ti atuc'ulanoj lec ti bu yalel muyelune.

²⁸Ta jujuti' xa ta xicocaj batel jech c'u cha'al ti c'usi sna' xc'a'e, jech c'u cha'al junuc c'u'il ti jomoch'tic xa yu'un ti xchanule.