Read Tzotzil Job 2 Bible Online

Job 2 - Tzotzil bible

Job 2

¹C'alal sta sc'ac'alil ta sva'an sbaic ti yajtuneltac Dios ti oy ta vinajele, c'ot ec ti jtic'-mulil ánjele.

²Xi jac'bat yu'un ti Diose: —¿Bu lalic talel le' ec une? Ti jtic'-mulile xi laj staq'ue: —Xijipet ta xaniel ti banomil ta jujujote.

³Va'i un, xi albat yu'un ti Diose: —¿Mi mu c'otemuc ta asat ti cajtunel Jobe? Mu'yuc xa yan jech ti ta banomil ti yutsil yo'nton ta xac' sba ta tunel ta jtojole, ti xchabioj sba ta spasel ti c'usi oy yutsile, ti stuc'ulanoj sbae, ti mu'yuc buch'u oy c'usi chopol ta spasbee. Ac'o mi chac'an chajip ta lum ti jeche' muts'ul sba sat ta yac'bel svocol ti c'alal mu'yuc c'usi spasoje, j'ech'el stsinanoj yo'nton ta jtojol.

⁴Ja'uc le' une, ti jtic'-mulile xi laj stac'be ti Diose: —C'alal mu'yuc to ta xich' tijbel ta c'op jutebuc ti sbec'tal stacopale, scotol x'ech' xjelav no'ox ta xa'i. Ti vinique, xu' to yu'un ti smeyoj yoc sc'ob ta xcom yo' mu xtub ti sc'oplale.

⁵Yaleso avil avoc ac'ob ta stojol. Ta xavil ta xlic sbisot ta cotol chaval.

⁶Ti Diose xi laj stac'be ti jtic'-mulile: —Pasbo avil un cha'e ti c'usi lec ta xava'i ta stojole, ja' no'ox un, ma'uc aventainojbe ti xcuxlejale.

⁷Ti jtic'-mulil une loc' ech'el ta stojol ti Diose. Laj stacbe talel jun chamel ta sbec'tal ti Job ti ech'em chopol ta jmeque. Bolol no'ox liquel ta sjunul sbec'tal ti lic ta yoc ti c'ot ta sjole.

⁸Va'i ti Job une bat xchotan sba ti bu busul ti c'a'epe. Laj stam sjepelul bin yo' ta sjot' sba.

⁹Ja'uc le' une, xi albat yu'un ti yajnile: —¿Buch'uot xa no'ox avaloj ti avac'ojbe to yipal ta yaq'uel iluc ti yutsil slequil avo'ntone? Lic biso no'ox xcha' ta cotol chaval ti Diose, chaman xa.

¹⁰Ti Jobe xi tac'ave: —Ants, ts'ijlan jutucuc ca'itic ti va'i s'elan abolil ta yalilanele. Mi xye'et jc'obtic ta stsaquel ti c'usi lec ta xac' talel ti Diose, ¿c'u cha'al mu jch'amtic ti c'usi chopol ta xvul ta jtojoltic yu'une? Manchuc mi jech un, va'i un, ti Jobe mi juteb oy c'usi chopol loc' ta ye yo' ta sta smul.

¹¹Va'i ec un, ti Jobe xi s'elan oy oxib buch'u lec xil sbaic xchi'uque: Ti Elifaz liquem talel ta yosilal Temane. Ti Bildad liquem talel ta yosilal Súahe. Ti Sofar liquem talel ta yosilal Naamate. C'alal laj ya'iic scotol ti mu albajuc vocol c'otem ta stojol ti Jobe, laj stam batel sbeic ta spatbel yo'nton, ta sq'uelel xchabiel yu'un ti svocole.

¹²Xi to snatil laj staic ta ilel ti Jobe. Ti laj to yojtiquinic jutuc ti ja'e, x'oc' x'avanic xa liquel. Mu x'ech' ta xa'i ti svocolic lic xch'i' ta jatel ti sc'u'ique. Lic svajic pucuc ta sjolic.

¹³Ts'acal to un, jmoj lic chotiicuc xchi'uquic ta lumtic, ti jalijic vucub c'ac'al vucub ac'ubal ti bu taje, ti mu jbel oy c'usi loc' ta yeique. Laj yilic ti spajebal xa no'ox vocol c'otem ta stojol ti Jobe.