Read Tzotzil Job 20 Bible Online

Job 20 - Tzotzil bible

Job 20

¹Mu stac' a'yeluc ta xca'i c'usi ta jpas, mu ts'icbaj ta xca'i avu'un; jech o xal ta jtac'bot talel ava'i ma' ti c'op une.

³Mu tabaj ta be ti xajajet no'ox ta jtojole, jna' lec ec un c'u s'elan xu' ta jtac'bot talel.

⁴Xana' lec ti xi ono'ox s'elan sc'oplal ti vinic c'alal vul ta bajel li' ta banomile:

⁵Mu jaluc xmuyubaj ma' ti buch'u mu'yuc xch'ulel xa'i sbae, ti jliquel no'ox ma' ti mu'yuc c'usi sna'e.

⁶Manchuc mi xtu'et ti sni'e, mi c'otem c'alal vinajel ti stoyobbaile,

⁷co'ol s'elan junuc c'a'ep ta xc'ot ta stsutsel. Ti buch'utic lec xil sba xchi'uque mu sna'ic bu bat.

⁸Ch'ab xi batel jech c'u cha'al junuc vayel, mi co'ol s'elan jech c'u cha'al oy c'usi ta xich' ilel ta ac'ubaltic ti mu xa xtae ta sa'ele.

⁹Ch'ay ech'el ta sba ta satic ti buch'utic jmoj naquiic xchi'uque, laj to sc'oplal ma' ti xilic une.

¹⁰Ti xnich'nabe ta sutesbeic ti c'usitic yelc'anoj ti stotic ta stojolic ti me'un mu'natetique.

¹¹Naca to squeremal, yipal to lec yu'un palch'uj xa batel ta muquinal.

¹²Toj lec chi' laj ya'i ta slajesel ti c'usi chopole, ti slec' sts'it xa ye xchi'uque.

¹³Yumoj xa ta ye ta xa'ibe ti smuile, ti c'un c'un xa ta xpach'olan ye yu'un ti smuile.

¹⁴Ta jech yepal un, ta xlic joybijuc ta svenenoal chon ta yut xch'ut.

¹⁵Ta xlic xeta ti c'usi laj stun laj slajes yu'un ti sc'ulejale; ta sloq'uesbat ta xch'ut yu'un ti Diose.

¹⁶Co'ol s'elan sts'uts'ilan xa svenenoal chon, ti ta xmilat yu'un ti veneno taje.

¹⁷Mu sc'upin ta stunel slajesel ti mu albajuc yepal ti co'ol s'elan uc'um ta x'oquin ti chu' vacaxe, xchi'uc ti ajapome.

¹⁸Scotol ti c'u yepal laj sta ta tsobele, tsots sc'oplal ta sutes, jeche' x'ech' ta sba ta sat; mi ja'uc ta sc'upin yutsil slequilal ti sc'ulejale.

¹⁹Laj yilbajin, mu'yuc stu laj yil ti me'unetique. Laj yu'ninan ti naetic ti ma'uc sva'anoj ta meltsanele.

²⁰Mi jset'uc sta yo'nton xchi'uc. Yac'ojbe yipal ti c'usi xal xchi'uc ti sbic'tal yo'ntone.

²¹Naca xac'be no'ox sba ti c'usi xal ti yo'ntone, ja'uc le' une, mu xjalij ti c'usi oy yu'une.

²²Toj ech'em no'ox svocol xchi'uc c'alal ep c'usi x'ayan yu'une. Ta x'ilbat svocol yu'un ti buch'u mu'yuc xch'ulel xa'i sbaique.

²³C'alal snojes xa ya'i ti xch'ute, xi s'elan ta sloq'ues ti sc'ac'al yo'nton Dios ta stojole: lamal ta xvul ta sba scapemal ti Diose.

²⁴Mi col to yu'un ti abtejebal ti meltsanbil ta taq'uine, ta xtae ta yolob ti meltsanbil ta c'anal taq'uine.

²⁵Ts'apluj jelavel ta sbec'tal ti sni' yolob ti ta x'ech' jombatuc ti secube. Toj batel xch'ulel ta xi'el xchi'uc.

²⁶Toj ic'ubel ma' ti osil banomil xa'ie. Mu xa jubeluc sc'an ti c'oc' yo' ta stsutsesbat sc'oplal xchi'uc ti snae.

²⁷Ta xvinajesbat smul yu'un ti vinajele. Ti banomile ta sva'an sba ta yalel ec ti oy smule.

²⁸C'alal cunul ta xvul ta stojol sc'ac'al yo'nton ti Diose, ta xch'ay scotol ti sc'ulejale.

²⁹Ja' jech nopbil sc'oplal yu'un Dios ti buch'u mu'yuc xch'ulel xa'i sbae. Jech chapanbil yorail ta xc'ot ta stojol.