Read Tzotzil Job 22 Bible Online

Job 22 - Tzotzil bible

Job 22

¹Ac'o mi ech'em xa no'ox staoj sbijil ti vinic ta j'ech'ele, ¿mi atac'oj xana' ti oy c'usi ta to xtun yu'un ti Diose?

³¿Mi oy la c'usi ta sta, ta xloc' venta yu'un ti Buch'u scotol xu' yu'une, ti atuc'ulanoj abae, ti lec ac'oplale?

⁴Mi ta stuq'uibtasote, mi ta xchapanote, ma'uc ta scoj ti ta xavac' aba ta tunel ta yutsil avo'ntone.

⁵Le'e, yu'un yepal ta j'ech'el ti mu'yuc atuq'uile, ti mu'yuc spajeb asa'oj ti amule.

⁶Ac'o mi mu'yuc stu avu'un un, laj ono'ox atsatsal c'anbe ti yaq'uicuc ta rental ti c'usi oy yu'un ti avinquileltaque, laj apojbe comel ti sc'u'ique, ti t'anal bat avu'une.

⁷Mu'yuc xavac'be jbochuc vo' yuch' ti buch'u ta xa'i taqui ti'ile; ti buch'u ta xcham ta vi'nale, mu'yuc xavac'be sve'el.

⁸Ti jech xi'bilote, ti ich'bilot ta muq'ue, laj abis aba ta yajval ti banomile.

⁹Smeyojan yoc sc'ob ta xbat avu'un ti me'un antsetique, laj avilbajin ti buch'utic mu'yuc buch'u x'ayan yu'unique.

¹⁰Jech o xal avi tana une, lamal ta aba ti c'usi xi'bal sbae, ta jech to yepal, mu x'ech' xjelav ta xava'i ti sibtasele.

¹¹Ic'ubem ti osil banomil ta xava'ie, mi ja'uc xavil ti osile, co'ol s'elan junuc nojemal vo' ti ta x'ech' smut'iote.

¹²Ti Diose, ja' tey oy ti bu xa c'alal spajebal toyol ti vinajele, ta yolon yoc comem yu'un ti c'analetic ti oy ta toyole.

¹³¿C'u ono'ox la xachi ta xaval ti mu xil ti Diose, ti macal ta jun pimil toc ti mu xtavan ta chapanele?

¹⁴¿Mi yu'un ta xaval ti mu xil ti Diose, yu'un xlajun xanubaj no'ox ta sq'uel jujujot ti vinajele?

¹⁵¿Mi yu'un anopoj ta xatam ech'el sbelel ic'al osil jech c'u cha'al laj stamic ech'el ti buch'u mu'yuc xch'ulel xa'i sbaique?

¹⁶Ta jech no'ox yepal, cham lajic, co'ol s'elan bec'bil batic yu'un ti nojemal uc'ume.

¹⁷Xi ta xalbeic ti Diose: “¡Ch'an xa utuncutic! ¿Mi yu'un oy la c'usi stac' ta spas ta jtojolcutic ti Buch'u scotol xu' yu'une?”

¹⁸(Manchuc mi jech un, ja' ono'ox Dios nojesbatic ta snaic ti c'usitic x'ayan yu'unique. Mu xac' jol jech c'u cha'al ta snopic ti buch'utic chopol xa'i sbaique.)

¹⁹Ti buch'u xa'ibeic xchiquinale, ta xilic, xchi'uc xmuyubajic no'ox yu'un; ti buch'u mu xtabat smulique, stse'inic no'ox

²⁰c'alal ta xilic volibil ta c'oc' ta xlaj sc'ulejalic ti buch'u chopol xa'i sbaique.

²¹Tamo aba liquel ta ach', lamajeso ac'oplal ta stojol ti Diose, jech ta xata ti mu'yuc c'usi xana' liquele.

²²Ts'ijlan xa no'ox ava'i ti ta xa xchanubtasote, bejano ta avo'nton ti sc'ope.

²³Mi ta xabic'tajes abae, mi ta xasut talel ta stojol ti Buch'u scotol xu' yu'une, mi ta xaten loq'uel ti c'usi chopol oy ta anae,

²⁴mi ta xc'ot ta avo'nton ti co'ol s'elan junuc spucuquil stanal ti' uc'um ti c'upil sba oroe,

²⁵va'i unbi, ta xc'ot ta avaj-pac-c'op avu'un ti Buch'u scotol xu' yu'une, ti busul no'ox liquel ti oroe, ti plata avu'une.

²⁶Ta xc'ot ta smuyubajel avo'nton, ti jun xa avo'nton ta xaq'uelbe ti sate.

²⁷Mi oy c'usi ta xac'anbee, ta xac'bot, jech ta xc'ot ta pasel avu'un ec un ti c'usi avaloj ta xavac'bee.

²⁸Lec ta xc'ot loq'uel avu'un ti c'usi ta xapase, xojobin no'ox ech'el ti saquilal osil ti bu ta xaxanave.

²⁹Ti Diose ta xac' ta lo'il maxil ti jtoyobbaetique, ta spoj ti buch'u nijil chimil yac'oj sbaique.

³⁰Ta scoltaot mi mu'yuc c'usi chopol apasoj, mi ch'abal ti amul ta stojole.