Read Tzotzil Job 28 Bible Online

Job 28 - Tzotzil bible

Job 28

¹Oy xminaxil ti bu ta xich' loq'uesel talel ti platae. Oy yavil ti bu ta xich' loq'uesbel sc'a'epal ti oroe.

²Ti tsatsal taq'uine, mucul ta lum ta xich' loq'uesel talel; ti tone, mi laj yich' unijesel une, ta xlic pasuc ta c'anal taq'uin.

³Ti vinique mu labluc xa'i ti ic'al osil ti xi s'elan ta spase: ta xyal batel bu xa spajeb ti snatile, ta ic'al osil une, ta sa' ti tonetique.

⁴Xt'uyet ta jbej ch'ojon ta sjom ta sa'el ti minax ti bu sts'ijlajane, ti mu'yuc xa buch'u junuc ta x'ech'e, ti nom to xil ti jteclume.

⁵Ta sba ti banomile, lec ta xch'i ti trigo yu'une; ta yolon une, co'ol s'elan volibil ta c'oc'.

⁶Ti bu taje, ja' yavil ta tael loq'uel ti c'upil sba yax-elan baxtonetique, xchi'uc ti oro capal ta lume.

⁷Ti sbelel taj une, mi ja'uc yilojic ti jti'oval cuj'e mutetique, mi ja'uc ti xulemetique.

⁸Mi ja'uc ta x'ech'ic ti te'tical chonetique, mi ja'uc ti leónetique.

⁹Ti vinic une ta stsac yabtejeb ta sjomel ti tonetic ti stsacanojan sba ta yoc vitstique.

¹⁰Ta sjom ochel sbe ta lican ch'entic, ta xil ta sat un ti c'usi ep ta tos c'upil sba nac'ale.

¹¹Xchaj xa ta q'uelel bu ta xtuc talel ti uni uc'umetique, ta sloq'ues talel ta jamalaltic ti c'usitic nac'al to oxe.

¹²¿Bu liquem talel ti bijilil ti va'i s'elan xcal taj une? ¿Bu to ono'ox yavil q'uejbil ti bijilil xcale?

¹³Mu sna' lec ti vinic mi cajal sc'oplal ta j'ech'el ti bijilile, mu ja'uc sta li' ta banomile.

¹⁴“Mu'yuc ma' li' une”, xi ta xal ti pimilal vo' ti bu tsobol ta scotole. “Mu'yuc li' oy ta jtojole”, xi ta xal ti muc' ta nabe.

¹⁵Mu stac' tael ta sventa ti oro une, mi ja'uc stac' manel ta plata.

¹⁶Mu stac' tojel o ta c'upil sba oro ta j'ech'el, mi ja'uc ta c'upil sba baxtonetic ti yax'elan no'ox yutsile, ti sts'ayts'un xojobal yutsile.

¹⁷Jelavem stojol ta j'ech'el, ja' mu sta ti oroe, xchi'uc ti ton ta xac' xojobale, mi ja'uc stac' jelel o ti c'usitic meltsanbil ta bats'i oroe.

¹⁸Ti bijilile, cajal sc'oplal ta j'ech'el, ja' mu sta sc'oplal ti baxton ti sbiinoj coral ti jun yutsil ta j'ech'ele, mi ja'uc sta yutsil ti bax ton ta xac' xojobale, xchi'uc ti yan bax tone.

¹⁹Mi ja'uc sta sc'oplal ti baxton ti sbiinoj crisólito ti oy ta Etiopia banomile, mi ja'uc stac' tojel o ti bu slajeb xa yutsil ti oroe.

²⁰¿Bu ta xlic talel xcaltic un cha'e ti bijilil une? ¿Bu xa ono'ox yavil tiq'uil ti snopbenale?

²¹Mu xilic ta satic ec ti jti'oval chon bolometique, mi ja'uc ti mutetic xvilet ta vinajele.

²²Ti jtsutsesvaneje, xchi'uc ti lajebale, xi ta xalic eque: “Ya'yejal no'ox laj ca'i ma' ti c'ot ta jchiquincutic ti sc'oplale.”

²³Ja'uc ti Dios une sna' bu sbelel ta xlic talel ti bijilile, sna' stuc bu ta tael.

²⁴Yiloj un ti bu xa c'alal spajeb ti banomile, xchi'uc scotol c'usitic oy ta yolon ti vinajele.

²⁵Ti Diose, c'alal laj yac'be spajeb ti bu c'alal ta xpaj yip yu'un ti iq'ue, c'alal laj yac'be sbisol ti bu c'alal ta xnoj ti vo'e,

²⁶c'alal lic xchapan jbel c'usi tsots albil sc'oplal sventa c'usi ora ta xac' ti vo'e, c'alal laj yac'be ech'el xaneb ti bu c'alal ta x'ech' ti xi'bal sba ic' xchi'uc ti tsots ya'lele,

²⁷laj yil un bu oy ti bijilile, laj yil ti cajal sc'oplal ta j'ech'ele, laj stuc'ulan lec, “Jun yutsil ta xquil un”, xi xchi'uc.

²⁸Ti Diose xi laj yalbe ti viniquetique: “Ti jun o'ntonal ich'bil ta muc' ti Diose: ja' bijilil ma' taj une; ti yictael ta spasel ti chopole: ja' snopbenal ma' taj une.”