Read Tzotzil Job 31 Bible Online

Job 31 - Tzotzil bible

Job 31

¹Calojbe jba mantal ta j'ech'el ti mu xc'upij co'nton yu'un ti tsebal antsetique.

²¿C'usi xa ono'ox jtosuc matanal ta x'ac'bat ti vinic yu'un ti Buch'u scotol xu' yu'un ti oy ta vinajele?

³¿Mi mu ja'uc lamal ta xc'ot vocol ta sba ti buch'u mu'yuc xch'ulel xa'i sbae, xchi'uc ti jsa'mulile?

⁴¿Mi yu'un mu sq'uel Dios ti c'usi ta jpase? ¿Mi yu'un mu stuc'ulan jujuteq'uel ti coque?

⁵Jamal xcal, mu'yuc bu jpasoj ma' ti yan xa ti jol jbaquile, ti juteb xa ta co'nton ti oy buch'u ta jlo'la ca'ie.

⁶Ti Diose sbisucun ta jun sbisobil ti jbel xale, ta xilun ti ch'abal ti jmule.

⁷Mi oy bu laj jch'ac jba ta tuq'uil be ti bu jtamoj batele, mi jq'ueloj xa no'ox jba yu'un ti sc'upijel co'ntone, ti oy c'usi ma'uc xa cu'un laj staic ta jnae,

⁸stunicuc slajesicuc yan ti c'usi jts'unojane, sbulicuc c'alal ta yibel ti c'usitic tec'ajtic cu'une.

⁹Mi ca'binoj xa no'ox jba ta slo'labun co'nton ti antse, mi xiva'et xa ta sq'uelel yajnil ti jlac'nae,

¹⁰smosovinuc yan ti cajnil unbi, vayuc xchi'uc yan vinic ti nom bu liquem talele.

¹¹Yu'un ti c'usitic laj jpas une, chopol ta j'ech'el unbi, xitun o ta xquich' ti tsitsele.

¹²Sc'otebal o unbi, licuc junuc muc' ta tsutsesvanej c'oc' ti ta xch'aybe sc'oplal scotol ti c'usi x'ayan cu'une.

¹³Mi ta xvulvanic ti cajmosovtac ti oy c'usi ta sc'anique, ta xca'ibeic ti sc'opique.

¹⁴¿C'usi xa ono'ox sc'an pasel ti ta xc'ot jva'an jba ta stojol ti Dios une? ¿C'usi xa ono'ox ta jtac'be c'alal ta xich'bun ti que une?

¹⁵Jun no'ox ma' ti Dios ta snabanotic ta ch'utile, jechic ec un xchi'uc ti vu'une, laj yac'botic ti cuxleje.

¹⁶Mu'yuc laj quicta jba ta scoltael ti me'un mu'natetic c'alal ch'abal c'usi x'ayan yu'unique, mu jq'uelojuc no'ox ta xchamic ta vi'nal ti me'un antsetique.

¹⁷Mu'yuc jtic' ta que jtuc ti c'usi laj jta ti mu'yuc laj cac'beic ti buch'u ch'abal buch'u x'ayan yu'unique.

¹⁸Laj jbis ta junuc jtot ti buch'u ch'abal buch'u oy yu'unique; lic'ot ta jpojvanej yu'un ti me'unal antsetique.

¹⁹C'alal laj quil ti oy buch'u xcham o xa ta xa'i ch'abal ti sc'u'e, mi jun me'un ti mu'yuc c'usi smac o sbae,

²⁰ta stsotsil jchijtac, laj jc'u'iltas ti xq'uixet to ta xa'ie, ti colaval xiyutic une.

²¹Mi jset'uc oy bu laj jsibtas ti buch'u mu'yuc buch'u oy yu'une, ti tsots xa xca'i jba ti ac'bilun ta muc' yu'unic ti jchapanvanejetique.

²²Mi mu jechuc ti va'i s'elan taj une, yich'uc c'asel ti jc'obtaque, yich'uc jepel ti jnequebtac unbi.

²³Ti jech jxi'taoj ti ta stsitsvan ti Diose; laj to c'op ti jtic' no'ox jba ta spasel ti c'usi chopole.

²⁴J'ech'el ma'uc c'otem ta spatobil co'nton ti oroe.

²⁵Mu'yuc ma' ti xitse'in xa yu'un oy ti jc'ulejale, ti yepal no'ox ta jta ti taq'uine.

²⁶Quiloj xtixet xojobal ma' ti c'ac'ale, ti sac jaman no'ox talel ta banomil xojobal ti ue.

²⁷Mi ja'uc oy bu laj jnijan jchiman jba ta yich'el ta muc' ta mucul, mi ja'uc ti jnub xa batel jc'ob ta stojole.

²⁸Ti jechuque, xitun o ti quich'uc tsitsele, yu'un laj xa jpec'tsanbe sc'oplal ti Dios ti oy ta vinajel unbi.

²⁹Ta j'ech'el mi ja'uc ximuyubaj xa yu'un svocol ti jcontrae, mi ja'uc ti oy c'usi chopol ta snuptan syaine.

³⁰Ta j'ech'el mi ja'uc laj jbis ta cotol chaval, mi ja'uc laj jc'anbe ti xchamel slajele.

³¹Mi oy jlom jvinquileltac ti jmoj nacaluncutic xchi'uc ti ta xilbajinic ti jun jyanlume,

³²mu jq'uelojuc ti ta x'ech' yu'un ac'ubaltic ta osiltique. Laj ono'ox quic'an ochel ta jna ti j'ech'el-beetique.

³³Ma'uc ma' ti jmucoj no'ox jba yu'un ti c'usi chopol ta jpas jech c'u cha'al ta spasic ti yane, mi ja'uc ti ts'ij xichi yu'une,

³⁴ta scoj ti xca'ibe to xi'elal ti jnaclejetique. Mu bajbilucun ta xicom ta scoj ti ta xisna'leicun ti cuts' calaltaque, mi jtenuc ts'ijilun xa jmacoj jba ta jna.

³⁵Oc no'ox la ta alel ti oyuc buch'u sts'etan sni' xchiquinic ta ya'yiel ti va'i s'elan ta xcale. Ta xcac' cuni pirma unbi, spac xa jc'oplal ti c'usi ta xcale; ti Buch'u scotol xu' yu'une, stac'uc talel ti c'op avi tanae. Sts'ibauc talel ta vun c'u s'elan ti jmule,

³⁶jechuc xa xch'a unbi, ta jlap ech'el ta sronail jol.

³⁷Ta jchapan ta stojol Dios ti c'usi laj xa jpasilan talele, mi jutebuc xi'el ta xinopaj ta stojol.

³⁸Ti cosil jbanomile, mi ja'uc xvulajetic xa ta sc'anic parteal ta vinajel ta scontrainelun, mi ja'uc x'oc' x'avanic xa ti xpolte-polte no'ox ti surcoale.

³⁹Mi oy buch'u laj quelc'anbe ti c'usi xloc' x'ayan yu'unique, mi laj quilbe svocolic ti buch'utic ta x'abtejic ta osile,

⁴⁰¡ti ta cosil jbanomile, ch'iuc talel ch'ix c'alal oy sc'oplal ta xch'i ti trigoe, ch'iuc talel chopol momoletic c'alal oy sc'oplal ta xch'i talel ti jtos o ta trigoe! Jech yepal laj spac sc'oplal ti Job taj une.