Read Tzotzil Job 41 Bible Online

Job 41 - Tzotzil bible

Job 41

¹Ti muc' ta ayin sbiinoj Leviatane, ¿mi xu' van xatsac loq'uel ta junuc stsacobil no'ox? ¿Mi xu' ti ts'apal ta xc'ot ta ye avu'un stsacobil ti chucbil ta jich'il ch'ojone?

²¿Mi xu' avu'un xajelubtasbe ch'ojon ta sni', mi ta xjoybel ch'ixal taq'uin ta yolon ye?

³¿Mi xvocolet xa van ta atojol ti c'uxubajan yu'une, ti stsulet ye ta sc'anbot ti vocole?

⁴¿Mi ta van xc'ot yu'un ti ta xalbot ta jamal ta xcom ta amosov ti c'u sjalil cuxulote?

⁵¿Mi xatajin xa xchi'uc jech c'u cha'al junuc mut? ¿Mi xachuc xa ti ta xc'ot ta yixtol ti atsebtaque?

⁶¿Mi xu' van ti xyal xmuy xa stojol avu'un ta xaye'ilan ta ch'ivite? ¿Mi sbic'tal bojilanic xa yo' ta xchonic?

⁷¿Mi xu' xats'apbe jelavel sni' yolob ta snuculil, mi ta sts'apbel jelavel ta sjol junuc stsacobil ti sbiinoj arpone?

⁸Mi ta xayales ac'ob ta yilbanijele, ta spac sc'oplal ti mu xch'ay ta avo'nton ti c'usi laj spasbote, ti mu xlic xa ajol ti jech ta xapase.

⁹Mi laj yich' tael ta ilel ti muc' ta chon Leviatán sbie, buch'uc no'ox ta xyal ta lum yu'un ti xi'elale.

¹⁰Mi oy buch'u ta sa'be sjole, ta xcap sjol ta j'ech'el, mi ja'uc oy buch'u xu' ta stsal yu'une.

¹¹¿Mi cuxul to van, mi mu'yuc c'usi snuptanoj ti buch'u ta stsal sba ya'i xchi'uque? Mu junuc un, sbejel banomil sna'ic lec.

¹²Mu xquicta ta yalbel sc'oplal ti stuc xa no'ox ech'em yip stsatsal ti yacantaque.

¹³¿Buch'u la xu' yu'un ta xcho'be loq'uel ti snuculil ti c'otem ta smaque, mi ta sjatbel ti cha'lamal smac ti volol xchi'uque?

¹⁴¿Buch'u la xu' yu'un ta xjach'bel ye ti ts'ubajtic ta joyob ti xi'bal sba stanal yee?

¹⁵Ti co'ol s'elan macobbail stsalalet no'ox ti snequebe, lec pac'al ta j'ech'el ti co'ol s'elan jbujuc ton ti syijile.

¹⁶Lec stsacanoj sba ti jujupeche, mi ja'uc juteb cayal ta x'ech' ti ic' yu'une.

¹⁷J'ech'el lec sjelojan sba, ti mu'yuc buch'u xt'ol loq'uel yu'une.

¹⁸Ti yic'al sni' ta spuruntae, co'ol s'elan junuc sac tsel ti xjapluje; xojobin no'ox ti sbec' sat jech c'u cha'al xojobal c'ac'al c'alal ta sacub talel ti osile.

¹⁹Xvolet no'ox ta xloc' c'oc' ta yee, ti co'ol s'elan nich c'oc' xvajet no'ox ta xloc' tal yu'une.

²⁰Xtomet no'ox ta j'ech'el ta xloc' ti xch'ail ta sni'e, ti co'ol s'elan sjob bin xvocvun xchi'uc ya'lel ta c'oq'ue.

²¹Xtil no'ox ac'al yu'un ti ta xich' ti iq'ue, ti xvolet no'ox yu'un c'oc' ta xloc' ta yee.

²²Ech'em yip ti snuq'ue, ti ta xbat xch'ulelic ta xi'el yu'un scotole.

²³Ti bu naca beq'uet ti sbec'tale, yij ta j'ech'el ti mu'yuc c'usi xats'apbee, yu'un co'ol s'elan unijesbil taq'uin.

²⁴Co'ol s'elan yijil ton ti yo'ntone, ti yij ta j'ech'el jech c'u cha'al stanal mulinoe.

²⁵C'alal ta scotan sbae, ta xi'ic ti buch'u tsots xa'i sbaique, ti mu'yuc xa xchi'uc xch'ulelic ta xjatavic batel.

²⁶Xlaj xcham to me xachi mi ta xich' ti espadae, ti lanzae, ti yolobe, mi yan ti c'usi ta xich' tenbel batele.

²⁷C'otem ta jun uni jobel ta xil ti tsatsal taq'uine, co'ol s'elan junuc c'a' te' ta xil ti c'anal taq'uine.

²⁸Mu xjatav yu'un mi xvajet no'ox ti ni' yolob ta xc'ot ta stojole, co'ol no'ox s'elan jobel ta xa'i mi ta xich' tenbel batel ti tone.

²⁹Co'ol no'ox s'elan ta xich' jisbel aj ta xa'i c'alal ta xpujbat maso te'e. Sat no'ox sq'uel ti xjimte-jimte no'ox ti puya' ta xc'ot ta stojole.

³⁰Xpolet no'ox yav ta xcom ta banomil ti bu ta x'ech' xjoch sba batele, ti co'ol to s'elan tusbil ta jun chiv-chiv taq'uine.

³¹Co'ol s'elan bejuc bin ta xvocan yu'un ti sninabil nabe, ti co'ol s'elan junuc sbinal poxil ta xvocan ti lacale.

³²Co'ol xa s'elan saquilal jolal sts'aylajet no'ox xojobin sac mesan ta xcom yu'un svoc ta sba ti vo'e.

³³Mu'yuc xa yan xco'olaj li' ta banomile; pasbil meltsanbil o jech yo' mu xa'i xi'el ta j'ech'el.

³⁴Mu'yuc ta yo'nton ti bu xa slajeb pucuj xa'i sbae; totil xa'i sba yu'un scotol ti chon bolometique.