Read Tzotzil Job 8 Bible Online

Job 8 - Tzotzil bible

Job 8

¹¿Bu to c'alal ta xavicta aba ta yalolanel ti va'i s'elan ti ac'op taje, ti xvo'o'et to ac'op jech c'u cha'al junuc sutub iq'ue?

³Ti Dios ti scotol xu' yu'une j'ech'el mu syanijes ti lequil chapanele, mi ja'uc ti oy c'usi tsots sc'oplal ta xtune.

⁴Ta j'ech'el ti anich'nabe laj sta smulic ta stojol ti Diose, ti laj stojic yu'un ti loc' ta sa'el yu'unique.

⁵Sa'ilano ti Dios ti scotol xu' yu'une, c'anbo ti c'uxubajuc ta atojole.

⁶Mi oy slequil stuq'uil ti c'usi ta xlic apase, ta xlic xchabiot, ta xlic yac'bot ana ac'uleb ti jech ono'ox sc'oplal ta xatae.

⁷Ti ac'ulejal laj ata to oxe, ma'uc jech c'ulejal ma' le'e, yu'un x'ech' to yepal ma' ti ta xata liquele.

⁸Jac'o ava'i c'u s'elan laj ech'uc ti totil me'iletique, tac'al c'otuc avu'un c'u s'elan ech' ta stojolic ti ba'yel totil me'ile.

⁹Ti vo'otique, volje chabje to no'ox lij'ayan talel, ti mu jutebuc c'usi jna'tique; ti jc'ac'alil corailtic ta x'ech' li' ta banomile, co'ol s'elan jun queoval ti xtemet no'ox jelavele.

¹⁰Ti ba'yel jtot jme'tic laj ech'uque ta slo'iltabot ava'iic xchi'uc ep c'usi xu' ta xchanubtasot.

¹¹Ti puje, ti jtos o ta puje, xch'ieb xa'i ti ts'anleb vo'tique.

¹²Manchuc mi jech un, mi lec yox ta q'uelele, mi mu'yuc yich'oj coq'uele, ta jech yepal ta xlic taquijuc, yox to ta xcom ti yan momoletique.

¹³Ja' jech sc'oplal ti buch'u mu'yuc xch'ulel ta spas sbaique, ti ta xch'ay ta yo'nton ti Diose. Xi s'elan ta xc'ot ta stojole: mu'yuc c'usi ta smaqui ti oy c'usi spatoj yo'nton ta stae.

¹⁴Ti spatoj xa yo'nton xchi'uque, ti stsinanoj xa yo'nton xchi'uque, co'ol no'ox s'elan jbej najel om.

¹⁵Stsoyan xa sba ya'i ta jbej snaul, mu'yuc xcuch yu'un; stsacuc xa ya'i yicobin ti najel ome, mu'yuc xu' yu'un.

¹⁶Ti buch'utic mu'yuc xch'ulel xa'i sbaique, co'ol s'elan momol yaxju'an no'ox ta q'uelel yu'un ti c'ac'ale, ti q'uiil ta xch'iel ech'el ta sjunul yavil ti ts'unbil nichime.

¹⁷Naca sts'un no'ox ech'el yibel ta tontic ta sts'uts'el ti vo'e, ti slim no'ox sba ech'el ta ba tontique.

¹⁸Mi oy buch'u ta spits loq'uel ti bu ch'iem une, mu'yuc xa buch'u sna' mi oy to ox c'usi ch'iem.

¹⁹Laj sc'oplal ti jalal to ox ch'ieme, yan xa momoletic ta xlic ch'iuc ti bu ch'iem to oxe.

²⁰Ti vinic buch'u laj stuc'ulan sbae, mu xtenat comel yu'un ti Diose, mi ja'uc ta sva'an sba ta stojol ti buch'u mu'yuc xch'ulel xa'i sbae.

²¹Ta spas ti ta xlic tse'inan yu'une, ti ta xlic avanan ta muyubajel yu'une,

²²ja'uc ti avajcontratac une, smac xa satic yu'un ti q'uexlale. Ti buch'u mu'yuc xch'ulel xa'i sbaique, ta xlilinbatic ti snaic ta j'ech'ele.