Read Tzotzil Salmos 10 Bible Online

Salmos 10 - Tzotzil bible

Salmos 10

¹Dios, ¿c'u cha'al toj nom ti bu avictaoj aba comele? ¿C'u cha'al ta xanac' aba c'alal yorail ti ilbajinele?

²Ti buch'u mu'yuc xch'ulel xa'i sbae, stoyoj xa sba ta soquemal sjol xjipet ta yilbajinel ti buch'u biq'uit yac'oj sbae; le' une, yacal comuc ya'i yacan ta spets' ti laj smeltsan une.

³Ti buch'u mu'yuc xch'ulel xa'i sbae, chi' xa no'ox ta xa'i ta yac'bel sba c'usi ta sc'an ti yo'ntone; ti bic'tajem yo'nton yu'un ti c'usi ta sc'ane, ta sbis ta cotol chaval, ta sjip ta sten ti Diose.

⁴Ta sbo'latil bichil tu'ul xa sni', xi ta xale: “Mu'yuc ma' ti Dios une. Mu'yuc buch'u ta xich' que jti'.” Jech yepal snopoj scotol ti va'i s'elan taje.

⁵Lec ta xc'ot ta loq'uel yu'un yilel ti c'usi ta spase. Ti ventainel avu'une, nom oy ta stojol, mu xc'ot ti sate; tse'in no'ox ta sna'leel ti scontrataque.

⁶Ta snop ti mu'yuc buch'u stsalun yu'une, ti j'ech'el mu'yuc c'usi chopol ta xc'ot ta stojole.

⁷Xbet'bun no'ox ma' ti ye ta yalel ti c'usi cotol chavale, ta sjutilanel ti c'ope, xchi'uc ta soquesel ti jol o'ntonale; yeinoj no'ox ta yalel ti ilbajinvaneje, xchi'uc ta yalel ti c'usi chopole.

⁸Xpaq'uet ta xmucul-pa'ivan ta bic'tal lumetic, naca smilel no'ox yu'un ta mucul ti buch'u ch'abal ti smule. Xi s'elan mu xch'ay ta satic ti buch'u mu'yuc xa spojelic ta xa'iic une:

⁹co'ol s'elan jcot león tiq'uil ta xch'en, snac'oj xa sba spa'ioj ti bu ta x'ech' ti me'un mu'nate, smalaoj xa no'ox ti slubioj ta xc'ote, c'alal mi slubioj c'ot une, ta xjoch ochel ta syacobil yu'un.

¹⁰Scujan xa sba, svuts'an xa sba yo' sloc'obinoj ta xc'ot ti buch'u ch'abal spojele.

¹¹Ti buch'u mu'yuc xch'ulel xa'i sbae, ta snop ti sna' xch'ayvan ti Diose, ti xu' ta sq'uej liqueluc ti sate, ti oy bu jtosuc ti mu xile.

¹²Va'lan tec'lan, Dios, yaluc xch'a ti avoc ac'ob une. Mu xach'ay ta avo'nton ti buch'u ilbajinbilique.

¹³Ch'ul Dios ¿c'u cha'al ti xlabanvanic no'ox ti buch'u chopolique, ti ta snopic mu'yuc xa ta x'ac'batic stojic ti c'usi ta spasique?

¹⁴Aviloj atuc ti ech' jelav xa xchopolal ti c'usi ta spasique; chajal lec ta aba ta asat un, ta xavac'be stoj. Ta svol sbaic talel ta atojol ti buch'u mu'yuc xa spojelic ta xa'i une; c'otemot ta jcoltavanej yu'un ti me'un mu'natetique.

¹⁵C'asbo ya'i yoc sc'obic ti buch'u mu'yuc xch'ulel xa'i sbaique. Ich'bo ye sti' ya'i ti spajebal xa chopol laj spasique, ti mu'yuc xa quechel ta xcom yu'unic ta stojole.

¹⁶Ajvalil o sbatel osil ma' ti Diose; ti buch'u yan yajvalique, ta xtenatic loq'uel ta slumalic.

¹⁷Dios, ta xava'ibe sc'opojel sti'inelic ti buch'u biq'uit yac'oj sbaique; ta xavac'be yip yo'nton, ta xava'ibe sc'op.

¹⁸Xiuc s'elan xachapanbe sc'oplal ti me'une, xchi'uc ti buch'u ilbajinbilique: ech'uc xa sc'oplal ta sibtasvanej ti viniquetic ti naca meltsanbil ta lum ach'ele.