Read Tzotzil Salmos 104 Bible Online

Salmos 104 - Tzotzil bible

Salmos 104

¹Ta sjunul jch'ulel canima, ta jlequil-c'opta ma' ti Diose. Cajval, Dios, tixil ta j'ech'el ti amuc'ule. Xojobin no'ox ac'u'inoj c'ot ma' ti avutsil alequilale;

²sac jaman no'ox xojobal ti c'u'iletique. Co'ol s'elan jlic muc' ta poc' laj alich'an ti vinajele.

³Ta ba vo' laj ava'an liquel yoyaltac ana ti oy ta cajale, c'ot ta acarreta ti toquetique, cuchbil ta xaxanav ta ic' ti buyuc no'ox ta xabate.

⁴C'otem ta j'al-mantal j'ich'-c'op avu'un ti jumetel iq'ue; c'otem ta jtuneletic avu'un slebtac ti c'oq'ue.

⁵Laj achotan lec yic ti banomile yo' jech j'ech'el stsinanoj sba ta yavil.

⁶Ti banomile, co'ol s'elan sc'u' c'otem to ox mut'ibil yu'un ti muc'ul nabe; ti vo'e smut'ioj ti muc'tiquil vitsetique.

⁷Le' une, laj apas ta mantal, ts'ij xi batel; jatav ta anil c'alal laj ya'i xc'avlajet no'ox ti ac'opojele.

⁸Xbalaq'uin no'ox talel ta toyol vitstic, ta stenlejaltic, bat stsob sbaic bu ono'ox ac'bil ti yavil avu'une,

⁹ta sts'anleb ti laj avalbe mantal ti bu c'alal ta xpaje yo' jech mu xa xcha'mut'i ti banomile.

¹⁰Ta xavac' tucuc talel ti sat vo'etique, ti uc'umetique xbalaq'uin no'ox ta x'ech' ta muc'tiquil vitsetic.

¹¹Ta xuch'ic te'tical chon bolometic ma' ti vo' taje yo' mu xa'iic taqui ti'il ti te'tical ca'etique.

¹²Ti mutetic xvilte-vilte ta toyole ta xlic smeltsan yuni tasic ta sti'il ti uc'umetique; xch'ivlajet no'ox ta xq'uejinajic ta sc'ob-c'obtac ti te'tique.

¹³Ti bu ana ta toyole, ta xamalta talel ti vitsetique; siquet to ta xa'i ti banomil c'alal xchajet no'ox ta xyal talel ti vo' ta vinajele.

¹⁴Ta xapules momol yaxaletic ta sventa ta slo' ti chon bolometique, xchi'uc ti buch'utic oy c'usi ta sts'unic yo' ta sta ti sve'elique.

¹⁵X'ech' to c'u cha'al aceite xch'ulet no'ox xchacjapanil sat ti oy yipal yu'un ti lec sve'ele, ti ts'ajal no'ox ta muyubajel yu'un ti vinoe.

¹⁶Mu'yuc ta xilic taqui ti'il ti te'etique, ti ch'ut te'etic ts'unbil yu'un Dios ta Libanoe.

¹⁷Ti uni bic'tal mutetique ta spas yuni tasic ta stojol un; ti muc'tiquil tojtic une, c'otem ta yavil ti muc'tiquil saquil ichine.

¹⁸Ti muc'tiquil vitsetique, c'otem ta snaic ti te'tical tentsune; ti lican ch'entique, c'otem ta snac'obbailic ti cotometique.

¹⁹Ti u laj ameltsane, ja' ta xac' ta na'el c'u s'elan ta x'ech' ti c'ac'ale; ti c'ac'ale sna' c'u s'elan ta xch'ay batel avu'un.

²⁰Mi ta xlic ic'ubuc ti osil avu'une, ta xtal ti ac'ubal une, xc'uletic no'ox loq'uel ta xanobal ma' ti colemal chon bolometique.

²¹X'avlajet no'ox ma' ti leonetic ta sa'el c'usi staic ta milele; ta sc'anbeic Dios ti ac'baticuc ti sve'elique.

²²Le' une, mi loc' tal ti c'ac'al une, ta xbatic un, ta xbat sluban sbaic ta xch'enic un.

²³Va'i un, ti vinic une ta xloc' batel ta yabtel, ta yic'ubel to osil ta sut talel ta yabtel.

²⁴¡Mu xlaj ta albel sc'oplal ti jaytos laj apase, Dios! Meltsaj avu'un scotol ta sventa ti abijile. Noj ta banomil avu'un scotol ti c'usitic laj ameltsane.

²⁵Oy ta venta ec un ti nabe, ti mu'yuc spajeb ti sjamleje, ti mu xlaj ta albel sc'oplal c'u yepal ti xchanul oye, ti yalel toyol xa ti smuc'tiquile.

²⁶Ti bu taje, xcajet no'ox ta xanav ti barcoetique. Xtajin no'ox nuxet ta xanav ec un ti muc' ta ayin Leviatán sbie,

²⁷Scotolic smalaojot ta yac'bel sve'elic c'alal yoraile.

²⁸Ta xavac'be un, naca ta stsac ti stuquique; xye'elet ac'ob ta yac'bel, spajeb yutsil ta staic ta stunel slajesel.

²⁹Mi ta xajoybin asat ta stojolique, ta xi'ic; mi mu xavac'be yich' ti iq'ue, ta xchamic, ta xjoybij ta lum ach'el.

³⁰Mi ta xavuch'ta ta sventa ti xcuxlejale, ta xcuxiic, yu'un naca pasbilic, ta xlic ach'ubuc avu'un ti c'usitic oy ta banomil unbi.

³¹Sbatel osil ma' ti yutsil slequilal Diose. Xmuyubaj no'ox xchi'uc ti c'usitic smeltsanoj ti Diose.

³²Xnicnun no'ox ti banomil c'alal ta xq'uele yu'une; xtomet no'ox liquel xch'ailal ti vitsetic c'alal ta sta ta tijele.

³³Ti jech li' to xvic'vun jsat cuxulune, ta jq'uejinta q'uejimoletic sventa ti Ajvalil Dios cu'une.

³⁴Jc'anuc ti muyubajuc cu'un Dios ta sventa ti c'usitic ta jnope, ta jta stojol ti ximuyubaje.

³⁵Tubuc sc'oplal ta banomil ti jsa'muliletic une. Ch'ayuc sts'unubal ti buch'utic mu'yuc xch'ulel xa'i sbaique. Ta sjunul jch'ulel canimae, ta xcalbe slequilal yutsilal ti Diose. Jun yutsil ta j'ech'el ma' ti Diose.