Read Tzotzil Salmos 105 Bible Online

Salmos 105 - Tzotzil bible

Salmos 105

¹Colaval, utic ti Diose, albeic ti sc'oplale, chapbeic ya'i ti jteclumetic ti yabtel laj spase.

²Q'uejintaic q'uejimoletic sventa yich'el ta muc'. Lo'iltabeic ti c'usitic muc'tic laj spase.

³Mu'yuc xa c'usi xtaun o yutsil xava'iic ta sventa. Muyubajicuc no'ox yo'nton ti buch'utic ta sa'ic ti Diose.

⁴Nabano abaic ta stojol ti Diose ta sventa ti smuc'ul stsatsale; scotoluc c'ac'al, nablanic ta stojol ti Dios une.

⁵Vo'oxuc snitilul Abraham ti c'otem ta yajtunele, vo'oxuc xnich'nab Jacob ti t'ujbil yu'une, vuleso ta avo'ntonic un, ti yabteltaque, ti c'usitic muc'tic ta spas ti ch'ayal o'ntonal ta xc'ot yu'une, ti scaj'aloj c'usitic nopbil yu'une.

⁷C'otem ta Ajvalil ma' ti Dios cu'untic une; sbainoj ta sventainel sbejel ti banomile.

⁸Manchuc mi ta x'ech' jaylajun-q'uexel ti totil me'iletique, mu xch'ay ta o'ntonal ma' ti strate yaloje,

⁹ti strate ti laj xchap xchi'uc ti Abrahame, ti c'u s'elan laj sva'an sba ta yalel ta stojol ti Isaaque,

¹⁰ti c'ot ta jbel c'usi tsots albil ta sventa ti Jacobe, ti c'ot ta trate sventa sbatel osil un ta stojol ti Israele,

¹¹ti c'alal xi laj yale: “Ta xcac'bot ta avosil ma' ti Canaane, ta xc'ot ta arexto cu'un un.”

¹²Manchuc mi xi yuni epalic ti stuquic une, mi uni jtsop jyanlumetic c'otic ta banomil taje,

¹³ti xloc' x'ochic batel ta jujun muc'tiquil lume, ti xloc' x'ochic batel ta stojol ti jujun ajvaliletique,

¹⁴mu'yuc laj yac' ye Dios ti ilbajinbilique, ti xi laj scaj'albe ya'i ti ajvaliletique:

¹⁵“Mu xayales avoc ac'obic ta stojol ti buch'u t'ujbilic cu'une, mi ja'uc xavilbajinic ti caj'alc'optac une.”

¹⁶Lic vi'nal yu'un ta banomil taje; mu xa bu sta ti sve'elic yu'une.

¹⁷Le' une, tacbatic jelavel ti Josee, ti buch'u chonbil bat ta mosovile.

¹⁸Jotesbat yacan ta carina taq'uin; yuinoj carina taq'uin, laj stiq'uic ochel ta chuquinab un.

¹⁹C'ot ta pasel un c'u s'elan scaj'aloj ti Josee manchuc mi lajeltsael s'elan sc'opojel ti Diose.

²⁰Ti ajvalil ti sbainoj ta sventainel ti epal jnaclejetique, laj yal mantal loc'uc ta chuquinab ti Josee.

²¹Lic yac'be sventain scotol ti c'usi oy ta snae, c'ot ta ajvalil yu'un ti c'usi x'ayan yu'une

²²yo' ta xchanubtas, ta sbijubtas ti banquilal jpas-mantaletique, xchi'uc ti moletic ich'bil ye sti'ique.

²³Ta ts'acal to un, c'ot ec ti Israel ti Jacob sbie, co'ol s'elan jyanlum naqui ta Egipto ta yosilal ti Came.

²⁴Laj sboles ta j'ech'el steclumal ma' ti Dios une, ti jelavem xu' yu'unique, mu sta ti egipcioetique.

²⁵Le' une, laj sliquesbe sjol ti egipcioetic ti licuc contrainbatuc ti steclumale, slo'laicuc yajtuneltac ti Diose.

²⁶Va'i un, ti Diose laj stac batel ti Moisés ti c'otem ta yajtunele, xchi'uc ti Aarón ti t'ujbilic yu'une.

²⁷Xi s'elan laj yaq'uic ta ilel senyailtac yu'un Dios ta sbajtical banomile; muc'tic no'ox ch'ayal ta xc'ot o'ntonal yu'un ti c'usitic laj spasic ta yosilal ti Came.

²⁸Tal ic'ubel ta osil yu'un ti Diose, scotol ic'uneb com yu'un, ti egipcioetic une mu'yuc laj yaq'uic ta venta.

²⁹Co'ol s'elan ch'ich' chacpulan joybij yu'un ti uc'ume, ti laj chamicuc ti xchoyaltac une.

³⁰Laj snojes ta poc'oq'uetic sjunul ti jteclume, ti och batel ta jc'ol sna ti ajvalile.

³¹Ta sventa c'opoj ti Dios une, co'ol s'elan lumal toc tal yu'un muc'tiquil jts'uts' ch'ich' vovetic xchi'uc usetic ti xvolet ta sjunul steclumal ti Egiptoe.

³²C'alal oy sc'oplal ta xtal ti vo'e, tal bot yu'un; xjaplajet no'ox ti sac tsel ti co'ol s'elan c'oc' vul ta stojolic ti jteclume.

³³Lilinbat scotol ti sts'unub uvaique, xchi'uc ti icuxetic yu'unique; jepantic com sc'ob ti te'etic ta Egipto une.

³⁴Mi ja'uc xa stac' chapel c'u yepal ta j'ech'el vul ta loq'uel ti c'ulub ta sventa sc'opojel ti Diose.

³⁵Laj stsutsesic ta j'ech'el ti momoletic ta osiltique, xchi'uc scotol ti c'usitic xa xch'i ta banomil une.

³⁶Ti ta Egiptoe, ti Diose laj syayijesbe ta milel scotol sba yol xnich'onic ti jnaclej egipcioetique.

³⁷Ta ts'acal to un, ti Diose laj sloq'ues batel ti steclumal ti xcuchojic loq'uel ti oroe, xchi'uc ti platae, ti mu'yuc c'usi laj snuptanic ti jujuvoc' nitiluletique.

³⁸Xmuyubajic xa ti egipcioetic ti loq'uic batele, yu'un batem xa xch'ulelic ta xi'el.

³⁹Laj yac' taluc voletel toc ti Diose yo' ta xqueovtaatic batel, xchi'uc voletel leb c'oc' yo' sac jaman ta xilic batel ta ac'ubaltique.

⁴⁰Laj sc'anbeic ve'lil, tacbatic talel muc'tiquil ubetic, xchi'uc vaj ti lic talel ta vinajele, nojesbat lec ti xch'utique.

⁴¹Jav ti ch'ene, va'i un, loc' talel ti vo'e, jun to uc'um xanav batel yoc ta sbajtical banomil.

⁴²Laj svules ta yo'nton ti xch'ul trate laj spas ta stojol ti Abraham ti yajtunele.

⁴³Jech c'ot ta pasel ti laj sloq'ues talel st'ujbil-teclumal ti Diose, ti xmuyubajic no'ox ta avanele.

⁴⁴Slumalic ti yan muc'tiquil lume, ac'bat yu'ninic, xchi'uc slubel xchamel yoc sc'obic ti yan jteclumetique.

⁴⁵Xi s'elan oy ti sc'oplal une, ti ich'vanicuc ta muq'ue, ti spasicuc c'u s'elan ta xal ti c'usi jbel tsots albil sc'oplale, xchi'uc ti chanubtasel yu'un ti Diose. Jun yutsil ta j'ech'el ma' ti Ajvalile.