Read Tzotzil Salmos 106 Bible Online

Salmos 106 - Tzotzil bible

Salmos 106

¹Jun yutsil ta j'ech'el ma' ti Dios une. Colaval, utic ma' ti Diose, yu'un oy slequil yo'nton, yu'un sbatel osil oy ma' ti syail xc'uxul yo'ntone.

²¿Mi oy la buch'u ta xal jtosucal c'u s'elan ta stsalvan ti Diose? ¿Mi oy la buch'u ta xalbe slequilal jech c'u cha'al sc'otebal oe?

³Mu'yuc c'usi sna'ic ti buch'utic ta spasic ti c'usi leque, ta spasel ono'ox xtoc ti c'usi oy stuq'uil smelole.

⁴Vulesun ta avo'nton un, Cajval, c'alal oy c'usi lec ta xapasbe ti ateclumale; oyucun ta aventa ec un c'alal ta xtal acoltae,

⁵yo' jech ta xquil ta jsat ti mu'yuc c'usi sna'ic ti buch'u t'ujbil avu'une, ti ximuyubaj ti jtuc xa no'ox mu'yuc buch'u xtaun ta xca'i xchi'uc ti jteclum ti c'otem ta avu'une.

⁶Laj jta jmulcutic ec jech c'u cha'al laj spasic ti jtot jme'cutique; laj jyanijes jbacutic ta be, chopol ti bu jtamojcutic batel une.

⁷Ti le' ta Egiptoe, ti jtot jme'cutique mu'yuc laj yaq'uic ta venta ti c'usitic muc'tic laj avac' ta ilele; ta sti'il ti Tsajal Nabe, lic stoy sbaic ta atojol, ch'ay xa'iic ti syail xc'uxul avo'ntone.

⁸Le' une, coltabilic yu'un ti Diose, ac'bat yilic ti smuc'ul stsatsal une, ta sventa ti ich'biluc c'otuc ta muq'ue.

⁹Ti Tsajal nabe, laj spas ta mantal, mac ti yoque, taquin com yu'un; co'ol s'elan sbajtical banomil jelavic ech'el yu'un ta spul-pulil ti snabile.

¹⁰Ja' jech c'otic ta pojel yu'un ta yoc ta sc'ob ti scontraic ti xti'et sjolic ta stojolic une.

¹¹Ti scontraic une, laj smut'ibe ta vo', mi junuc cuxul com yu'un.

¹²Va'i un, c'ot ta yo'ntonic ti xc'ot xc'opoj no'ox ti Diose; lic sq'uejintaic q'uejimoletic ta stojol.

¹³Le' une, ta jech yepal laj xch'ay ta yo'ntonic yabteltac ti Dios laj spas ta stojolic une, mi ja'uc laj smalaic c'usi snopoj ta spase.

¹⁴Ta sts'ijlajan sbajtical banomil xa une, lic sq'uelbeic yo'nton ti Diose; laj sujic ti ac'baticuc spasic c'usi xal ti yo'ntonique.

¹⁵Ac'batic ti c'usi laj sc'anbeic ti Diose, jech xtoc tacbatic talel chamel ti j'ech'el chamic o yu'une.

¹⁶Ti bu vololique, lic sc'a'epal satiic ti Moisese, xchi'uc ti Aarone, ti t'ujbilic yu'un ti Diose.

¹⁷Va'i un, jav ti banomile, mut'ij yalel ti Datane, scotol ec ti c'u yepal tijilic ta sliquesel c'op xchi'uc ti Abirame.

¹⁸Lic tiluc c'oc' ta stojol scotolic. Chiq'ueic ta leb c'oc' ti buch'u mu'yuc xch'ulel xa'i sbaique.

¹⁹Ta vits Horeb une, lic sloc'taic ch'iom tot vacax, unijesbil ta oro ti xi s'elan lic yich'ic ta muq'ue:

²⁰Laj sbisic ta jlo'-yaxal-vacax ma' ti lequilal Ch'ul Dios une.

²¹Laj xch'ay ta yo'ntonic ma' ti Dios une, ti jpovanej yu'unique, ti yepal no'ox c'usitic muc'tic laj spas ta Egiptoe,

²²ti ch'ayal no'ox ta xc'ot o'ntonal yu'un laj yac' iluc ta yosilal Came, xchi'uc ti mu'yuc to ox vinajem o ti c'usitic laj spas ta Tsajal Nabe.

²³Laj yal ti Diose ti j'ech'el ta stsutsesbe ti sc'oplale. Ti Moisés ti t'ujbil yu'une, laj to spac sutel ti c'ope, lamaj sc'ac'al yo'nton ti Diose, laj spajes sba, mu'yuc stsutses.

²⁴Ta ts'acal to un, mu c'usi bal o laj ya'i ti jun yutsil muc' ta lume; mu'yuc xc'ot ta yo'ntonic c'usitic yaloj no'ox ti Dios ta spase.

²⁵Sbiseluc no'ox ta cotol chaval ti Dios ta yut yaxibalnaique; mu'yuc laj yaq'uic ta venta ti oy c'usi yaloje.

²⁶Va'i un, ti Diose laj sva'an sba ta yalel ti ta xchamic yu'un ta sbajtical banomile,

²⁷ti ta xchamic ti snitilultaque, ti tan puc ta xbatic yu'un ta yan muc'tiquil lum ti yan yajvalique.

²⁸Lic yac' sbaic ta mosovinel yu'un ti Baal-peore; lic slajesic matanaletic ta sventa diosetic ti mu cuxuluque.

²⁹Ti c'usitic mu lecuc ta spasique, laj soquesbeic yo'nton ti Diose, lamal vul ta sbaic ti yilbajinelic une.

³⁰Ti Fineese lic sva'an sba ta xchapanbel sc'oplal ti j'ac'vanej ta vocole, ch'ab xi liquel ti vocolajel une.

³¹Ich'bil c'ot ta muc' yu'un Dios ti va'i s'elan c'ot ta chapel yu'une, ti j'ech'el jech com ta stojol ti totil me'iletique, xchi'uc ti alab nich'nabiletique.

³²Laj sliquesbeic sc'ac'al yo'nton Dios ta sts'el vo' ti Meriba sbie; laj sa' svocol yu'unic Moisés ta scoj taje.

³³Laj yipal yu'un ti laj stsiq'uesbeic yo'ntone, ti oy c'usi loc' ta alel yu'un ti ma'uc snopoje.

³⁴Mu'yuc laj stubbeic sts'unubal jteclumetic ti yaloj no'ox Dios ta stsutses ta j'ech'ele.

³⁵Le'e, lec laj ya'iic lic scap sbaic ta naclej, xchi'uc lic xchanbeic c'u s'elan liquem yu'unic ti buch'u yan yajvalic ti xi s'elan lic spasique:

³⁶Laj squejan sbaic ta yich'el ta muc' ti c'usi meltsanbil ta c'abale, lic sta svocol xchi'uquic ta scoj taj une.

³⁷Laj yac'beic yich' svocol ta milel squerem stsebic ta sventa smoton ti pucujetic taje.

³⁸Ta jech yepal, muts'ul sba satic ti buch'u laj smalbeic ti xch'ich'ele, xch'ich'el ti squerem stsebique, laj yac'beic smotonin ti diosetic oy ta Canaane. Balom ch'ich' com yu'unic ti banomil ta xch'ich'elic une.

³⁹Laj soques sbaic yu'un ti c'usi laj spasique, yanijem yo'ntonic ta stojol ti Diose.

⁴⁰Lic capuc sjol ti Dios ta stojol ti steclumale; laj sbaj laj sten ti c'otem ta yu'untac to oxe.

⁴¹Xq'uelatic no'ox ti ilbajinbilic yu'un ti scontraic ti yan yajvalique, tsalbil c'otic yu'un ti scontraique.

⁴²Net'bil c'otic yu'un ti scontraique, c'otic ta j'ac'-lo'il-maxil ti tec'bil c'otic yu'un ti scontraique.

⁴³Ep ta coj coltaatic yu'un ti Diose, ja'uc ti stuquic une mu'yuc laj yaq'uic ta venta ti c'u s'elan snopoje, bat ta yoc xchi'uc ma' ti mu'yuc xch'ulel xa'i sbaique.

⁴⁴Manchuc mi jech ti oy xa svocol ileique, ti a'yibatic ti x'oc' x'avanic xae,

⁴⁵laj svules ta sjol ti strate spasoj ta stojolique. Laj sjel ti c'u s'elan snopoj oxe, yu'un xi s'elan yepal ta j'ech'el ti syail xc'uxul yo'ntone:

⁴⁶C'ot ta pasel yu'un ti ayan slequil yo'nton yu'un ti scontraique.

⁴⁷Pojuncutic un, Cajval, Dios cu'uncutic. Tsobuncutic loq'uel ti capaluncutic xchi'uc ti yan muc'tiquil lume yo' ta xilequil-c'opojcutic ta aventa, ti ximuyubajcutic ta xcalcutic alequilale.

⁴⁸Lequil c'optabiluc sbatel osil ti Ajvalile, Dios yu'un ti Israele. Scotoluc xiuc yalique: “¡Jechuc!” Jun yutsil ta j'ech'el ma' ti Dios une.