Read Tzotzil Salmos 11 Bible Online

Salmos 11 - Tzotzil bible

Salmos 11

¹Ta jsa' jpojel jnaq'uel ta stojol Dios ma' ti vu'une. X'ech' xjelav no'ox ta jchiquin ma' ti xi ta xi'albat une: “Ta lec no'ox, jatavan ech'el ta te'tic jech c'u cha'al junuc mut.

²Ti buch'u mu'yuc xch'ulel xa'i sbaique, q'uel avil ti xi s'elan ta spasique: stic' xa ti sni' syolob ta stenobile, xach'et no'ox ta j'ech'el yu'unic ti syolobique, ti bu xa nac'al lec une, ac'o mi oy slequil stuq'uil ti buch'u ta xile, xach'luj no'ox syolob yu'un.

³C'alal jin xa ta j'ech'el ti c'usi lec liqueme, ¿c'usi xa ono'ox la stac' ta spas ti buch'u oy slequil stuq'uil une?”

⁴Le' une, oy ta slequil ch'ulna ti Diose. Ti Dios une chotol ta spasob mantal ta vinajel, chajal lec ta sba ta sat ti c'usi ta spas ti jnaclejetique.

⁵Yac'oj talel sat ti Diose, sq'ueloj c'usi ta spas ti buch'u oy slequil sjol yo'ntone, xchi'uc ti buch'u mu'yuc xch'ulel xa'i sbaique; ta j'ech'el soquet sjol yu'un ti buch'utic ic'bil xa xch'ulel yanima ta spasel ti c'usi mu lecuque.

⁶Ti Diose ta xac' talel tilemal ac'al, xchi'uc c'oc' ta xtil ta azufre ti ta slamanbe talel ta stojolic ti buch'u toj chopolique, xchi'uc ta xac' taluc jchic'vanej ic' yo' ta xchic' scotol. Loc' ta sa'el yu'unic ti ta x'ac'batic stojic yu'un ti Diose.

⁷Ti Diose oy yutsil slequil, mu tenbaj ta xa'i ti c'usi leque; jech o xal un, ti buch'u jamal lec yo'ntonique ta sq'uelbe sba satic xchi'uc.